KUKAMI ATUGHIU 9 - Sumi Naga CL (Re-edited) Bible (BSI)

Alhou no Solomon lau Ipeghi

¹ Solomon no Ampeu ki ngo kükaki kümsü pulo cheke toi shiqhilu kemtsa,

² Gibeon lo toi, Ampeu no akiniu pa zülo ipeghi.

³ Ampeu no pa vilo pi, “I no o kighini eno nono khukeu chiluvae. Nono aki khikhi shiqhe keno tipau shikimtheve tsüae eno alholo ghenguno I je tile qhivae. I nhethi ngo I mlo ye ado kümtsü lo tile aniae.

⁴ Itehi ye nono o pu David toi akikhi eno amikucho lono I zülo cheche aye, eno I no azah tsükeu kümtsü pelu aye,

⁵ I no o pu David vilo, ‘No ye Israel kükalakhü lo iqani keu timi püqümo nani,’ ipi tushoqhi püake toi I no alholo o kükalakhü Israel shou süsüve tsü nani.

⁶ Ikemu no momu o nuli no I papemo, I zakütsü eno pimheye I no panongu zülo qhitsü keqo hebideve no alhou kütau huthu eno mllauve aye,

⁷ I no Israelmi tsükeu yeghi lono panongu hapheve nani, eno aki khikhi I je ghenguno shikimthe püani keno I nhethe lono ikhive nani. Israel ye ashiayeqo gholo küghakiche eno küthakügha shive nani.

⁸ Aki hipau ye ixapinyive nani, eno hi veche iqhoiqi kemi kümtsü no akümza qhiyi pi nani, ‘Kushiye Ampeu ye hipa yeghi eno aki hipau shou hi shivetsü kea?’

⁹ Tileno timiqo no pi nani, ‘Kughengu panongu no Ampeu pano Lhou khuu no Egypt lono pano puasüqo saipeghi keno, Pa kümsümave eno alhou kütau qhoqhü no mllauve ke. Hi ghenguno Ampeu no pano shou shiküpsa hipau puku tsüe.’”

Solomon Kümla Kütauqo

¹⁰ Solomon no ampe muku lono achineki ngo kükaki shiqhilu,

¹¹ Tyre kükau Hiram no cedar ngo asahusü eno ameshoyi Solomon no lunishi keu thaqhü tsü, eno Akükau Solomon no Galilee lo mishighüna muku Hiram tsüe.

¹² Ikemu kughou Hiram no tipaqo juniye ighi keno, pa ye amlo qimlave.

¹³ Tighenguno pa no pi, “I thiküzüu, no ye kiutoi keu phughiqo I tsü kea?” Eno pa no aphughi tipaqo je Cabul kuvetsü, eno ishi kutolo aje tipau aphie.

¹⁴ Hiram no ameshoyi ahu 4,000 shou Solomon tsüe.

¹⁵ Akükau Solomon no Ampeu ki ngo pa kükaki, Millo, Jerusalem kupuwu, Hazor phughi, Megiddo, eno Gezer phughi mlani ke anguka lono akümlami peitha keqo hitoi ani:

¹⁶ (Egypt kükau Pharaoh no iqho Gezer leve no pitileve, tile küami Canaanmi heqhive, eno tipau pesü külakupu meh shi ghi pa nonga, Solomon nipu, tsüve;

¹⁷ Solomon no Gezer shiqhe kitheve) eno Beth-horon chhiliu shiqhe,

¹⁸ Judah yeghi lo asayeqha Baalath ngo Tamar phughi,

¹⁹ chuqu-kusho pekütsü chekeu phughi kümtsü, paw khurkulu, khurshimi ghenguno aphughiqo, eno Jerusalem ngo Lebanon lo eno pa no qhasülu keu kükaqha lo pa no mlanishi akeqo kümtsü shiqhi luve.

²⁰ Israelmi kumo kemi khunoqo aghakhu lo ngolupe keno Amorimi, Hittimi, Perizimi, Hivimi eno Jebusimi,

²¹ Israelmi no le kelono heqhi khamove keqo Solomon no panongu pesü aqemi shivepe eno ishi kutolo tishi aphie.

²² Ikemu Solomon no Israelmi ye aqüaxe shi peithamoe; panongu ye paw ghüshimi, kijemi, ghüshimi zatsümi, kepten, khurkulu zatsümi, eno khurshimi kiqi lono peithae.

²³ Solomon no akiqo shikelo akümlami jukükütsümi pano 550 süsüke.

²⁴ Pharaoh nga no David phughi lono kiqhesü Solomon no li sala mlatsü keu kilo iqhove kethiu Solomon no Millo mlae.

²⁵ Ampe lo ghuthu küthü Solomon no Ampeu kümlla khache mlatsü keu lono akipti kümllagho eno külakishi kümllagho tsüche. Hitoi pa no achineki shiqhi luve.

²⁶ Akükau Solomon no Edom yeghi lo Akuhu Züghi mkülo Eloth phivilo Ezion-geber lono zükilu kütsasa mlae.

²⁷ Hiram no zükilu lono pa qemi ngo azüghi ghili akivishi ithi no izüche kemi gholo Solomon qemi ishi puwu,

²⁸ panongu no Ophir lo wuno tilauno ameshoyi ahu 16,000 pesü Akükau Solomon lau ighi.