KUKAMI ATUGHIU 8 - Sumi Naga CL (Re-edited) Bible (BSI)

Puloshoqhi Bohu Achineki lo Süghi

¹ Tithiu Solomon no Israel sakiphemi, ashiaye eno ali kümtsü lo akütsüqo, pa lau Jerusalem lo saghi, ti ye Ampeuw Puloshoqhi bohu David phughi Zion lono achineki lo qhini kehue.

² Ikehu aqhi akütsüniu Ethanim qhi lo, timi kümtsü Solomon no kusü keu ghulhu lo ighi kumqolu.

³ Israel sakiphemi kümtsü ighive, eno achinemi no Puloshoqhi bohu peluve.

⁴ Levimi ngo achinemi no Ampeuw Puloshoqhi bohu, kuposhukulu phiki ngo tile akimthe bohu kümtsü peluve.

⁵ Akükau Solomon ngo Israelmi kümtsü no Puloshoqhi bohu zülo kumqo no ambe ngo amshitsü kutomo kihikha mla kepushi heqhi no akipti kümllagho shi.

⁶ Tishino achinemi no Puloshoqhi bohu pesü Shishe Akimthe-a Cherubim chishibo sükhope akeu qholo qhive.

⁷ Cherubim chishibo no abohu ngo akipesü nhape qhi.

⁸ Akipesüqo ye kushuo kehu Akimthe-a zülono pishipuwo akemtsü ithulu, ikemu Akimthe-a nguno khalacheu ye ithulumoe, eno tipau ye ishi kutolo tile achephi.

⁹ Puloshoqhi bohu alou kütau ye kiumu küha, ikemu panongu no Egypt lono ipeghi kethiu, Ampeu no Israelmi sasü Puloshoqhi shikeu-a, Horeb lono Moses no atupha kini sükeu likhi ae.

¹⁰ Achinemi no Akimthe-a lono ipeghi kemtsa khüngküsü no Ampeu ki nhaluve,

¹¹ ikehu achinemi ye khüngküsü no nhaluve no akümla shimlave, kughengu Ampeu juküvü no Pa ki nhapho luve ke.

Solomon no Ampeu Sheqhe

¹² Tileno Solomon no pi, “Ampeu no Pa ye ighono aküzü lo anani pike,

¹³ O pelo alholo ache penike I no O ghenguno akighiche ki shive tsüae.”

¹⁴ Timiqo no puthugho akelono akükau no panongu lau tsüghü ighi no kümghatsü.

¹⁵ Pa no pi, “Israel Lhou Ampeu sheqhelo! Pa no I pu David lau tushoqhi püakeu, Pa u no ti shikupuvae; Pa no hitoi piqhi püake,

¹⁶ ‘I no Iw timiqo Egypt lono saipeghi ke tsalani no, Ni ye Israel shiaye phughi lakhi lomu I je qhinike ghenguno kishe phemoe. Ikemu Iw timi Israelmi shou ka penike I no David kishe ke.’

¹⁷ I pu David no Israel Lhou Ampeu je ghenguno achineki shinike pa mlo lo ae.

¹⁸ Ikemu Ampeu no I pu David vilo pi, ‘Nono I je ghenguno achineki mla tsünike o mlo lo aghikeu ye akivie.

¹⁹ Tishimu aki ye nono kumono o nu o polo kiyighi no I je lono mla nani.’

²⁰ Ikehu Ampeu no Pa shoqhi shikupuvae. Kughengu I no I pu züqhulo Israelmi kükau shive no Ampeu no piqhike toi Israel kükalakhü lo iqaluvae, eno I no Israel Lhou Ampeu je ghenguno aki shivae.

²¹ Ampeu no ni puasüqo Egypt lono saipeghi kelono panongu sasü puloshoqhi shikeu bohu qhi penike I no a-a kutope qhive tsüae.”

Ikhiphekütsü Kighini

²² Tishino Israelmi qoaho zülo Solomon no Ampeu kümlla khache lo puthugho no pa u kungugha küdau süqhe,

²³ eno pi, “O, Ampeu Israel Lhou, atsütsü qholo eno ayeghi shou khumu O toike kühae, Nono O qemi no amlo kuchopu ikhiphepe aghokulu shi ake thaqhü lo Ow timiqo sasü puloshoqhi shikeu pape eno O kikimiye panongu lau pephe piye ke.

²⁴ Nono I pu David lau piqhi keu shikupue. O kichi lono piqhi eno O u no ishi tsala lono shikupu tsüe.

²⁵ Tighenguno itehi, O Ampeu Israel Lhou, Nono O qeu I pu vilo, ‘Nono I zülo cheche ketoi o nuli no titoi cheche aye, no ye Israel kükalakhü lo iqani keu timi püqümo nani,’ ipi püakeu kümsülu tsülo.

²⁶ Tighenguno itehi, O Ampeu Israel Lhou, Nono O qeu I pu David vilo pikeu tsa shikupu tsülo.

²⁷ “Ikemu Alhou ye kuchou no ayeghi lo xünani keshea? Kungugha akiqheu thotsü O ghenguno ililai moke I no aki hipau shipüa keu ye kishita tülalo kelae!

²⁸ Ikeghi, O Ampeu I Lhou, o qeu no akighini shi akeu eno pa no khu akeu chilu tsülo, eno ishi pa no ighamku O zülo inikhu akeu initsü lo,

²⁹ O nhethi no putho pucho aki hipau lo jupuku tsülo, a-a hipau ye Nono, ‘I je ye tilehi anani,’ ipi kehu o qeu no a-a hipau küdau juno inikhu kelo chilu tsülo.

³⁰ O qeu eno ow timi Israelmi no a-a hipau küdau juno inikhu kelo chilu tsülo. Eno kungugha lo O kungo-a lono ini tsüno ni kipimi qhitsü lo.

³¹ “Timi lakhi no pa kisüghüu zülo pimive no ashoqhi shinike, O ki hipau lo akiptia lono tushoqhi aye,

³² kungugha lono ini tsüno o qeu lau küghatha tsülo eno küqüve keu ghime lo, ikemu amikuchou ye pa mikucho kiqi lono asaxü tsülo.

³³ “Ow timi Israelmi no O zülo axine shike ghenguno pano ghümi zülo tomlave aye, eno panongu no aki hipau lo O lau ighi no O je kulu no akighini lono O lau ighamku aye,

³⁴ kungugha lono chilu tsüno Ow timi Israelmi xine qhive tsülo eno panongu sasü pano puasü tsükeu yeghi lo saghi tsülo.

³⁵ “Ow timiqo no O zülo axine shive kehu atsütsü lakhave tsüno tsüghu move aye, eno panongu no axine lono ideighi no a-a hipau küdau juno inikhu no O je kulu aye,

³⁶ kungugha lono chilu tsüno O qemi Israelmi xine qhitsülo. Panongu no chewu kepu laghi kivi kiche tsüno Ow timiqo lau amheghi shi tsüve keu yeghi lo tsütsüghu puwu tsülo.

³⁷ “Aghakhu lo püqümiye, asagha, amülhü kushu no axabo fupithi, tülhaqu momu katsülanga ighi, momu pano ghümi no leighi no khagho khasü luve, momu püsa eno kiukiu küsü mu ighi aye,

³⁸ lüthü na Ow timi Israelmi kümtsü nomu kiu kiumu inikhu eno qhüiniju pütüta mlo ghime ithi no aki hipau küdau au sükhope inikhu aye,

³⁹ O kungo-a kungugha lono ini tsüno akipimi qhitsü lo eno pütüta mlo Nono ithi akeu kiqi lono panongu lau mla tsülo (kughengu O likhi no timi kümtsü mlo ithi anie),

⁴⁰ tishikeu lono, Nono ni puasüqo tsükeu yeghi lo Ow timiqo no xüake tivilo O sümsa ghi ache penie.

⁴¹ “Titoi inami ow timi Israelmi kumo kemu aghakhu kushuo lono O je ghenguno ighi kelo,

⁴² (kughengu panongu no O je kije, O küka kumto, eno O u kümgha ghili chilu nani), aki hileno O lau inikhu aye,

⁴³ O kungo-a kungugha lono ini tsüno inami huno O lau khukeu kiqi lo kümtsü shitsülo, tishikeu lono ayeghi lo ashiaye kümtsü eno ow timi Israelmi pelo No ithilu eno O sümsa peni, eno panongu no I no aki hipau mla püakeu ye O je ghenguno kepi ithi peni.

⁴⁴ “Tsala ow timiqo no pano ghümi sasü aghü shinike wu aye, Nono kiukiu gholau no panongu puwu aghimu, panongu no Nono kishelu keu phughi eno aki hipau I no O je ghenguno mlatsü keu küdau juno Ampeu lau inikhu aye,

⁴⁵ kungugha lono pano kighini ini tsüno pano vehupu shitsülo.

⁴⁶ “Tsala panongu no O zülo axine shive aye—kughengu axine shimo keu timi khumu kühae—eno Nono panongu shou amlo ideve no pano ghümi tsüve, tishikeu lono panongu ye akughumi shisü ala sheshu lona akupunu lonamu, pano ghümi yeghi lo wuve aye,

⁴⁷ ikeghi akughu shiake yeghi lono panongu no amlo pebide no xaide püzü, ‘Nino axine shivae eno kixikila shi xüighivae,’ ipi qhüiniju aye,

⁴⁸ tsala panongu küghaluve kemi yeghi lono panongu no kuchou no amlo eno akükümsü kümtsü xaide no Nono ni puasüqo tsükeu yeghi, Nono kishelu keu phughi hipau, eno I no O ghenguno mla tsükeu ki küdau juno inikhu aye,

⁴⁹ O kungo-a kungugha lono ini tsüno pano vehupu shitsülo.

⁵⁰ Panongu xine eno hekibide kümtsü qhive tsülo eno pano ghümi pelo pano kimiyelu pelo.

⁵¹ (Kughengu panongu ye Ow timi Nono Egypt lo ayikiyiqi miphoki lono saipeghi ke).

⁵² O nhethi pesü O qeu eno ow timi Israelmi lau jupuku tsülo eno panongu no kugho kughomu O vilo inikhu aye, O kini kughope ini tsülo.

⁵³ Kughengu Nono ayeghi lo ashiaye kümtsü gholono Ow timi shinike panongu kishelue, ti ye Nono O qeu Moses vecheo Egypt lono ni puasüqo saipeghi kelono pi püanie, O Ampeu Alhou.”

Kükümgha Kighini

⁵⁴ Kughou Solomon no Ampeu kümlla khache zülo qhoqhünhe no kungugha küdau pa u peqhepe akighini eno qhüiniju keu shitave keno, pa no tileno ithughive.

⁵⁵ Pa no ithughi no asütsa kuloghi lono Israelmi qoaho kümtsü kümgha tsüno pi,

⁵⁶ “Ampeu khuu no piqhi püake toi akulhokiqhi pesü Israelmi tsü keno Pa sheqhelo. Pa qeu Moses vecheo ashoqhi kivi shikeu atsa lakhimu tomlave moe.

⁵⁷ Ampeu Alhou no ni puasüqo gholo acheke toi ni gholo apeni. Pa pelo khilemu ni pheve momu kümsümave pemoniu.

⁵⁸ Pa laghi lo chelu eno Pa zakütsü, pimheye, eno ayezah khikhi ni puasüqo tsü keno kümtsü pelu penike Pa pelo ni mlo tsüghü sawo Pa lau qhilu peniu.

⁵⁹ Atsa hipaqo khikhi I no Ampeu lau qhüiniju khuve akeno tino putho pucho Ampeu Alhou kupunulu peniu, eno Pa qeu eno Paw timi Israelmi no tsalakipe vehupu kümtsü jukuto tsü peniu.

⁶⁰ Tishikeu lono ayeghi lo ashiaye kümtsü pelo Ampeu ye Alhou, eno alhou kütau ye kühae pi ithi peni.

⁶¹ Tighenguno nongu mlo kümtsü pesü Ampeu Alhou tsülo, Pa yezah kiqi lono xülo eno Pa zakütsü ishi tsala lo pelu aketoi papelo.”

Solomon Kümllagho

⁶² Tishino akükau ngo Israelmi kümtsü no aghakishi pesü Ampeu tsü.

⁶³ Solomon no amshitsü 22,000 eno ambe lakh lakhi qhethonhe muku pesü külakishi kümllagho tsü. Hitoi akükau eno timi kümtsü no achineki ikhiphekütsü shilu.

⁶⁴ Tipa tsalani no, akükau no achineki zülo akikhala mtau ghi ikhiphetsü. Tileno pa no akipti ngo athi eno külakishi kümllagho lo atha pesü mlla, kughengu akimthe-a zülo alazayi akiptia ye akipti kümllagho ngo athi-kümllagho eno külakishi kümllagho lo atha pesü mllani keu ye müghülo ke.

⁶⁵ Hitoi Solomon no Israelmi kümtsü sasü atsala tsüni aghulhu shi, tile Lebo-hamath lono Egypt kutolo timi baghi no Ampeu zülo ighie.

⁶⁶ Atsala akütacheni Solomon no timiqo pütüta kilo puwove, eno panongu no akükau kümgha tsüno Ampeu no Pa qeu David ngo Paw timi Israelmi lau akivi kümla shikeu ghenguno shishe alokivi shi pütüta kilo wove.