KUKAMI ATUGHIU 7 - Sumi Naga CL (Re-edited) Bible (BSI)

Solomon no Pa Kükaki Mla

¹ Solomon no ampe chighiküthü lono pa kükaki shiqhilu.

² Pa no Lebanon Ghasü Ki no achebo akijeu mla, akushulau aunhekipshe 150, akijelau aunhekipshe 75, eno akiqhelau aunhekipshe 45, ti ye cedar no atsükucho ajo bidi shi, eno akika shike.

³ Atsükucho lhobidi pungu shou achebo shi püakeu mqha ye cedar no shi, ajo kümtsü lo atsükucho chighipungu ae.

⁴ Akuchughi kinikujo lo alashe kujolha küthüthü shi.

⁵ Ahukikha eno alashe kümtsü kobidi, eno alashe kujolha küthü shino kujukile mlae.

⁶ Atsükucho bokütha ye akushulau aunhekipshe 75 eno akijelau aunhekipshe 45. Atsükuchoqo gholo akisheqho mlape qhi.

⁷ Pa no küghakütha sheshu kepu asahusü no Kükalakhü Chebo mla, eno Küghakütha Chebo ghi mlae. Ti ye aghüza lono iku amqha kutolo Cedar no shie.

⁸ Achebo thiu Solomon no pa kungoki shino tighi kütau ki koghe lono shi. Pa nipu Pharaoh nonga pelo ngo penike aphiphi lono aki lakhi shie.

⁹ Aki hi kümtsü akughupu tu no mlae, akimghi kiqi lono hetha, azübou ngo agizüu xikümdü, aghüza lono iku ayitha kutolo, eno khalau no akikhala akijeu kutolo tishi mlae.

¹⁰ Aghüza ye amekusho tu, atupha kije, aunhekipshe 12 eno 15 no shi.

¹¹ Tipaqo shou amekusho tu akimghi lono hethape qhave eno cedar no amkhüsü shi.

¹² Achebo akijeu ye atupha ajolha küthü no homxa mla, eno cedar no akika shi; Ampeu kilo achebo alou ngo ahukikha ghi tishi mlake.

Achineki Nanu

¹³ Akükau Solomon no Tyre lono Hiram kusaghipe.

¹⁴ Pa ye Naphtali shiaye lo chimemi nu ke, pa pu ye Tyremi, alazayi kümlami. Pa ye alokütsümi, vethakulumi, eno alazayi kümla lo shitsa shi kiukiumu mla chekemi. Pa no Solomon lau ighi no pa kümla kümtsü shitsüe.

¹⁵ Pa no alazayi tsükucho kini mlatsü, lakhi no akiqhelau aunhekipshe 27, eno akijelau aunhekipshe 18. Ti ye amta lo abokhu shi, akishilau auloti bidi qhemi. Atsükucho lakhiu ghi athoe.

¹⁶ Pa no atsükucho kütsüqa lo qhikepu alazayi kuboho kini mla. Lakhi khilo akiqhelau aunhekipshe tsüni tüxa.

¹⁷ Atsükucho kütsüqa lo ayikichhe no ghoküna pe ajoshi qhi, atsükucho kinikujo lo qhie.

¹⁸ Pa no khaghatu koghe ajo kini shi ayikichhe vehomxa mla eno tino akütsüqa lo alazayi no chopumloi mlakeu kinikujo küzüpe qhi.

¹⁹ Akütsüqa lo alazayi chopumloi keu ye lapu xamunu puile aketoi shi, eno ti ye akushulau aunhekipshe 6.

²⁰ Ti ye atsükucho kini shou qhi. Atsükucho kütsüqa lakhi khilo khaghatu toike 200 no ajo kini shi homxape qhie.

²¹ Hiram no alazayi tsükucho hiküma pesü achineki ilocheke la lo lakhi no apeu, tipau je pesü Jakhin kütsü, eno lakhiu no ahuu, tipau je no Boaz kütsü.

²² Lapu xamunu koghe lono shikeu alazayi pesü atsükucho kütsüqa lo qhi. Hitoi shi atsükucho mlaqhilu.

²³ Hiram no alazayi no azütughuko mla ti ye akijelau aunhekipshe 15, akiqhelau aunhekipshe tsüni tüxa, eno aliho homxa aunhekipshe 45.

²⁴ Azütughuko mütsü qhou apoxi julho no ti homxa aunhekipshe 15 shisü. Apoxiqo ye ajo kini shino abohu ampi lo lhokime puku.

²⁵ Abohu ye amshitsü julho chighikini shou qhi, küthü no ahuu, küthü no kulolau, küthü no apeu, eno küthü no kipelau ju ghi qhie. Abohu no tipaqo shou qhi, amshitsü shibo no alou shie.

²⁶ Azütughuko ye akishilau aulotikipshe küthü eno abohu mütsü ye ajukhu mütsü toi lapu xamunu puile akeu koghe lono mla. Azü liter 40,000 ilokulupu shi mlae.

²⁷ Pa no alazayi pesü tuhakulu chighi mla; lakhi khino akushulau aunhekipshe 6, akijelau aunhekipshe 6, eno akiqhelau aunhekipshe bidi tüxa.

²⁸ Tipaqo ye hitoi shi mla: aküqhapa shino ako bidi kümtsü lo axu no kimepe qhie.

²⁹ Ako kümtsü lo abongshuu, amshitsü eno cherubim julho shisü, eno abongshuu ngo amshitsü shou ngo aqhou axamunu shisüe.

³⁰ Tuhakulu lakhi khilo alazayi kuluho bidi mla, alazayi no kuluho kinini kimepe qhi, eno azü bohu choqhepe ngokepu acheku bidi lo mla; ti choqhe kepu shou jukivipu nanu mla.

³¹ Azü bohu shou axu aliho shi mla, tipau kichi ye aunhekipshe lakhi tüxa, eno akutholau aulotikipshe 7. Tipau mütsü lo aye shisü.

³² Kuluho bidi ye aküqhapa qhou qhi, eno kuluho kikime yi ye tuhakulu gholo kime, kuluho ye akiqhelau aunhekipshe 2.

³³ Kuluhoqo ye khurkulu pukhu toi; akikimeyi, amtsü, chokayi kümtsü alazayi no shie.

³⁴ Choqhe pesü ngolu kepushi ako bidi lo amkhüyi bidi sü. Tighi tuhakulu ampi lo ashi lakhishi lhokime.

³⁵ Tuhakulu shou aulotikipshe 9 qhemghai shi kuboho keu yipa ae; eno ti chokiqheyi ngo aküqhapa ghi ampi lo kime.

³⁶ Chokiqheyi ngo aküqhapa lo, pa no Cherubim, abongshuu, amsabo julho, a-a kümsa akeu kiqi lono shisü, eno axamunu no tipaqo homxa shisü.

³⁷ Hipa ghola lono, pa no tuhakulu chighi mlae. Ti kümtsü akimghi eno akoghe aphiphi shi mlae.

³⁸ Eno pa no azübohu chighi mla. Lakhi khilo akijelau aunhekipshe 6, eno azü liter 880 ilokulupu shi mla. Tuhakulu kümtsü ghenguno azübo aküphashie.

³⁹ Pa no tuhakulu pungu no achineki ahuu eno pungu no apeu qhi. Azütughuko no achineki apeu kipela küdau mlae.

⁴⁰ Hiram no ali, sholepu, eno chithakhu jeli mlatsü. Akükau Solomon ghenguno Ampeu ki shikeu lo akümla pa pülü keu kümtsü pa no shive. Akümla hipaqo ke:

⁴¹ Atsükucho kini;

⁴² atsükucho kütsüqa lo chopumloi keu kini lo khaghatu ghola mlakeu 400, ti ye ajo kini shi qhi eno tino atsükucho kütsüqa lo chopumloi keu küzüe;

⁴³ tuhakulu chighi eno azübohu chighi;

⁴⁴ azütughuko lakhi eno tipau qhou amshitsü chighikini,

⁴⁵ Hiram no mlakeu ali, sholepu, eno chithakhu, Ampeu kilo abohu kümtsü phuphushi keu alazayi no mlatsü.

⁴⁶ Akükau no hi kümtsü Jordan qa lo Succoth ngo Zarethan küma dolo ayi lhophe chekeu-a lono mlaphe süghi.

⁴⁷ Solomon no abohu hi kümtsü akimghi shimove, kughengu kutomo shive kehu mighi khamlave.

⁴⁸ Solomon no Ampeu kilo abohu kümtsü mla: ameshoyi kiptia, Ampeu zülo asho kibepu,

⁴⁹ akimthea alou lo, ameshoyi kulu kibepu, ajeu pungu eno piyiu pungu; axamunu, akulu, eno amibalu tsümtsa, kümtsü ameshoyi no shi;

⁵⁰ ajukhu, akulu fukipinhepu, abohu, akiptibo, amibo, kümtsü ameshoyi no shi; eno Shishe Akimthe-a hukikha eno achineki khalacheu hukikha lo tsapayi kümtsü ameshoyi no mlae.

⁵¹ Hitoi Akükau Solomon no Ampeu kilo akümla kümtsü shive. Pa no pa pu David no akimtheshi ikhiphe tsükeu thime, ghükayi, ameshoyi, eno abohu kümtsü süghi no Ampeu kilo akini pekükütsü-a lo qhive.