KUKAMI ATUGHIU 6 - Sumi Naga CL (Re-edited) Bible (BSI)

Solomon no Achineki Mla

¹ Israelmi no Egypt lono ipeghi keu ampe 480 shi akelono, eno Solomon no Israel shou ayepe keu mpe abidiu, aqhi akiniu, ti ye Ziv qhi, lono pa no Ampeu chineki shithu.

² Achineki ye akushulau aunhekipshe 90, akijelau aunhekipshe 30, eno akiqhelau aunhekipshe 45.

³ Akulaghi lo achebo ye akushulau aunhekipshe 30, ti ye aki akijelau pahi, eno agizüu aunhekipshe 15.

⁴ Achineki kupuwu kunguu alasheqo mlasü.

⁵ Khalacheu tozü da ghi aki homxa, axugha shiqhe, eno akuchughi lo acheboqo mla. Eno pa no homxa akuchughiqo lo achebo mla ke.

⁶ Ajolha aqhou no akijelau aunhekipshe tsüni tüxa, amtau no akijelau aunhekipshe toku, eno aküthüu jolha no akijelau aunhekipshe chighi tüxa. Aki boküthaqo ye atozü lo chopuku no aghüzasü sümo namu puthugho kulupu shie.

⁷ Kughou aki mla akeno, atuqo ye chhukütha-a lono akivishi mlave no süwo kimeve kehu achineki loye ayihesü, amüghü momu tinhemgha kiumu qhoqhoshi ighamoe.

⁸ Aqhou jolha kulaghi ye achineki apeu küdau no shi, eno tilauno ajolha akiniu aküthüu lo ikukepu la shike.

⁹ Akükau no hitoi achineki shiqhi luve. Pa no Cedar pesü amqha eno amkhüsü shi.

¹⁰ Pa no aki homxa axugha akiqhelau aunhekipshe tsüni tüxa shiqhe puku eno axugha tipau ye Cedar süpa no amkhüsü shino aki lo kime.

¹¹ Ampeu tsa Solomon lau ighi,

¹² “Nono aki hipau mla akeu vehu lo, nono I yezah lo cheche, I khuaye lo gholu, eno I zakütsü kümtsü pelu aye, I no o pu David lau piqhi püakeu, o vecheo shikupu tsüni.

¹³ I no Israel nuli gholo xüküqhani eno khilemu Iw timi Israelmi phevemo nani.”

¹⁴ Solomon no aki shiqhi luve.

¹⁵ Pa no aki alou kupuwu ye Cedar süpa pesü mla. Alou aghüza lono amqha kutolo asü pesü mla, eno aki lo aghüza ye asahusü no mlae.

¹⁶ Pa no aki alou aküsa küdau aghüza lono akupuwu kutolo cedar sü no aunhekipshe 30 mla, eno alou chebo pesü Shishe Akimthe-a shi mlae.

¹⁷ Shishe Akimthe-a zülo bokütha ye akushulau aunhekipshe 60.

¹⁸ Cedar süpa pesü aki bocho alou apoxi eno axamunu puile akeqo julho aye shisü; kümtsü cedar süpa no shi thono atu ye peithamoe.

¹⁹ Pa no Akimthe-a alou lo bokütha lakhi Ampeuw Puloshoqhi bohu qhikepu mlae.

²⁰ Akimthe-a alou ye aunhekipshe 30, akijelau aunhekipshe 30, eno akiqhelau aunhekipshe 30 shino kümtsü ameshoyi no küzüe. Pa no cedar sü kiptia ghi ameshoyi no küzüve.

²¹ Solomon no achineki alou kuchopu ameshoyi no küzü eno ameshoyi chi no alou bokütha zülo qhi, tighi ameshoyi no küzüe.

²² Pa no achineki alou kuchopu ameshoyi no küzü, eno Shishe Akimthe-a kiptia ghi ameshoyi no küzüpe qhie.

²³ Pa no olivesü no achishibo kupu Cherubim kini mlano Shishe Akimthe-a lo qhie, tiküma lakhikhi no aunhekipshe 15 qhemghai ke.

²⁴ Cherub chishibo lakhi no aunhekipshe tsüni tüxa; eno achishibo akemtsü lakhi lono lakhiu kutolo aunhekipshe 15.

²⁵ Cherub lakhiu ghi aunhekipshe 15; kinikujo akimghi eno akoghe aphiphi.

²⁶ Cherub lakhi akiqhelau aunhekipshe 15, eno lakhiu ghi tipa qhemi.

²⁷ Pa no Cherubim pesü Shishe Akimthe-a lo agi kithe ghi qhive. Eno Cherubim küma chishibo xakhokeu huno atozü hula hila di ghi koküthabo amtau khonha ghi qhi, eno achishibo akemtsü no aki mta lono lakhi no lakhi dikile ke.

²⁸ Cherubim küma gha ameshoyi no küzüve.

²⁹ Aki alou kupuwu kümtsü, koküthabo alou eno ashou chebo lo ghi, pa no Cherubim, amsabo, eno puile akeu xamunu julho shisüpe qhi.

³⁰ Bokütha ghüza kümtsü, koküthabo alou eno ashou chebo lo ameshoyi no küzüpe qhie.

³¹ Shishe Akimthe-a hukikha ye olivesü no shi; eno ahukikhasü ngo akuchosü ye ako pungu.

³² Olivesü hukikha kini lo Cherubim, amsabo eno puile akeu xamunu julho shisü eno ameshoyi no küzüve. Cherubim ngo amsabo shisü püakeu shou ghi ameshoyi no küzüve.

³³ Akümlla-a chebo hukikha sü ghi olivesü no ako bidi shi mlae.

³⁴ Ahukikha kini ye asahusü no mla; ahukikha lakhi lo apa kini shino küqhüchhelu, titoi ahukikha lakhiu lo apa kini shi mlae.

³⁵ Tiküma lo ghi Cherubim, amsabo eno puile akeu xamunu julho shisü no ameshoyi no küzüpe qhi.

³⁶ Pa no akikhala alou mla eno kujolha küthü shi atupha no akupuwu shino kujolha lakhi ye cedar sü no shie.

³⁷ Solomon yepe mpe abidiu, Ziv qhi lono Ampeu ki boqha ghoke.

³⁸ Eno ampe chighiaqhaqhiu, aqhi akütacheu Bul qhi lono aki ye kupukülai, thokha shilo pikeu ghola lono shiqhi luve. Solomon no aki hipau ampe tsüni lono shiqhilue.