KUKAMI ATUGHIU 5 - Sumi Naga CL (Re-edited) Bible (BSI)

Akümllaki Shinike Kuto

¹ Tyre kükau Hiram no David küsau shiche kehu kughou Solomon no papu David-a lo akükau shiluvae pi chilu keno, pa no Solomon lau pa qemi puwu.

² Solomon ghi pa lau asütsa tsüpuwu,

³ “Nono ithi anike I pu David ye Ampeu pa Lhou ghenguno aki shimlave, kughengu Ampeu no aghümi pa homxape akeqo pesü pa pukhu philo qhitsü moke kutolo pa ye aghü shiche ke.

⁴ Ikemu Ampeu I Lhou no I sükümxa kuchopu lo iqüghai tsüno aghümi na amhekiqi namu kühavae.

⁵ Ikehu Ampeu no I pu David vilo, ‘O nu khuu I no kükalakhü lo o thisülu peni keno, pa no I je ghenguno achineki shi nani,’ ipi püake toi ni ye Ampeu I Lhou chineki shinike kuto ani.

⁶ Tighenguno Lebanon lo Cedar I ghenguno yeqhi tsülopi azah tsülo. I qemi no o qemi gholo küqhano mla peni eno nono betha tsükeu kiqi lono I no ajume panongu tsüni, kughengu nono ithi anike ningu ye Sidonmi toi asüpa küxüthi kemi kühae.”

⁷ Hiram no Solomon tsa chilu kemtsa ighono alovive no pi, “Ishi tsala hipau lo Ampeu sheqhelo, Pa no alokütsü nu pesü ashiaye kuloghi shou ka penike David tsüke.”

⁸ Hiram no Solomon lau asütsa pi puwu, “I no o tsape chiluvae eno nono khu akeu cedar ngo sahu süpa kümtsü tsünike pulovae.

⁹ I qemi no Lebanon lono azüghi kutolo süqighini, tileno I no ashuka toi mlave tsüno nono kichetsü ke-a lo azü lono puwuve tsüni. Tilauno kuqho luve no ow timiqo no peluve peni. Tishino I kibolomi ghenguno chuqu-kusho kutotsü masa keu no o lokümsü shilo.”

¹⁰ Ikehu Solomon no lunishi ke thaqhü Cedar ngo asahusü Hiram no tsüe,

¹¹ eno Solomon ghi ampe lo ashothi ahu ton 6,000 eno tsüghüve keu thazü liter 8,000 pesü Hiram tsüe.

¹² Ampeu no Pa shoqhi kiqi lono alokütsü pesü Solomon tsü. Hiram ngo Solomon dolo külakishi ache eno pama no visho ghi qhive.

¹³ Akükau Solomon no Israel yeghi kümtsü lono timi 30,000 pesü akümla lo süsü.

¹⁴ Pa no timi 10,000 no aqhi lo kiphi ghi Lebanon lo puwu. Adoniram no ampeu shino panongu ye aqhi lakhi Lebanon lo ngo eno aqhi kini aki lo ngoe.

¹⁵ Solomon ye itaghi atu heküthami 80,000 eno akipemi 70,000 ato yeghi lo ache,

¹⁶ eno kijemi atomi 3,300 no akümla ngo akümlami jukütsü che.

¹⁷ Akükau zakütsü lono panongu no amekusho tupha kijeje hephope akivishi xikümzüve no achineki ghüza boqha shie.

¹⁸ Ikehu Solomon ngo Hiram kümla kishimi, eno Gebal lono ighi kemi no achineki shikepu atu hetha eno asüpa küxüthae.