KUKAMI ATUGHIU 4 - Sumi Naga CL (Re-edited) Bible (BSI)

Solomonw Hiyampemi

¹ Akükau Solomon no Israelmi kümtsü kükau shi,

² eno hipaqo no paw hiyampemi atomiqo: Zadok nu Azariah no achineu;

³ Shisha nu Elihoreph ngo Ahijah pama no akiyeu; Ahilud nu Jehoshaphat no yekükütsüu;

⁴ Jehoiada nu Benaiah no ghüshimi zatsüu; Zadok ngo Abiathar pama no achinemi:

⁵ Nathan nu Azariah no hiyampemi atou; Nathan nu Zabud no achineu ngo akükau poshuu;

⁶ Ahishar no kükaki lo atou; eno Abda nu Adoniram no akümla kishimi jukükütsüu.

⁷ Solomon ye Israel kümtsü lo ampemi chighikini ache. Panongu lakhikhi no akükau ngo pa kibolomi ghenguno aqhi lakhikhi kiphi ghi ampe kupuju lo achuqupu tsüche.

⁸ Pano chighikini je: Ephraim ato yeghi lono Ben-hur;

⁹ Ben-deker no Makaz, Shaalbim, Beth-shemesh eno Elonbeth-hanan;

¹⁰ Ben-hesed no Arubboth (Socoh ngo Hepher ghi pa qholo);

¹¹ Ben-abinadab no Naphath-dor (pa nipu ye Solomon nga Taphath);

¹² Ahilud nu Baana no Taanach, Megiddo eno Jezreel qhou Zarethan phivilo Beth-shean kümtsü eno Beth-shean lono Abel-meholah kuto eno tino itaghi Jokmeam ghüngü kutolo.

¹³ Ben-geber no Ramoth-gilead (pa qholo Manasseh nu Jair phu Gilead lo akeqo, eno Bashan lo Argob lo aliwo kumto eno alazayi khadu mishighüna kijeje lhotsügho);

¹⁴ Iddo nu Ahinadab no Mahanaim;

¹⁵ Ahimaaz (pa nipu ye Solomon nga Basemath) no Naphtali;

¹⁶ Hushai nu Baana no Asher ngo Bealoth;

¹⁷ Paruah nu Jehoshaphat no Issachar;

¹⁸ Elah nu Shimei no Benjamin;

¹⁹ Uri nu Geber no Gilead, ti ye Amorimi kükau Sihon ngo Bashan kükau Og pama kükaqha. Eno aghakhu kümtsü shou angh lakhi ache.

Solomon Kini ngo Alokütsü

²⁰ Judah ngo Israel lo timiqo ye azüghi mkülo asaye toi ikowove. Panongu no chusho luno ighono alokivi shilu.

²¹ Solomon no Euphrates lono Philistia eno Egypt lughi kutolo ayepe luve. Tipaqo no sükusho süqha pa tsüno pa küxü tivilo pa qeche.

²² Solomon no atsala lo avehupu shikeu ye ashomkhu ahu 9,000 eno achuqupu no ahu 18,000,

²³ athakupu mishitsü chighi, achu kümza mishi muku, ambe 100, tinguno alau aqhu, achuyi, ashe, eno awu athakupu ishi.

²⁴ Kughengu pa ye Euphrates kulola qha kümtsü Tiphsah lono Gaza kutolo, Euphrates kulolau kükami kümtsü pa no qhasüpe ache. Eno pa hokümxa kümtsü lo külakishi auve.

²⁵ Pa no xüake tivilo Judah ngo Israel yeghi Dan lono Beersheba kutolo sükusho lo ache eno timi kümtsü no pütüta tsailu eno mububo pighilue.

²⁶ Pa ye khurkulu sünhe kiche khurshi 40,000 eno khurshimi 12,000 ache.

²⁷ Paw ampemi chighikini no aqhi lo kiphi no pa eno pa qholo kükaki lo akemi ghenguno thokha avehupu shikeu kümtsü tsüche eno kiumu püqümoe.

²⁸ Pütüta kikiphi lo barley ngo khurshi sala aghijini pewo qhive tsüche.

²⁹ Alhou no alokütsü ngo vethakulu kimghimla kepushi Solomon tsü, eno azüghi mkülo asaye jehi akükümsü kuthoküzü pesü pa tsü,

³⁰ tishikeu lono pa lokütsü ye kipelaumi eno Egypt lokütsü nguno alokütsüu shive.

³¹ Kughengu pa ye timi kümtsü nguno alokütsüu; Ezrami Ethan eno Mahol nuli Heman, Calcol, ngo Darda nguno alokütsüu, eno pa jekipi no acheaxü lo shiye kümtsü lau veküpha wove.

³² Pa no ahole 3,000 eno ale 1,005 iqütsü.

³³ Pa no asüboqo ghili ghi pi, ti ye Lebanon lo cedar sübo lono atupikiye lo thuipeghi chekeu ayilo tsüni ghili kutolo pie. Itaghi tüghashi, aghau, itikiche lhoxü, eno akha ghili pitsüe.

³⁴ Ayeghi lo shiye eno kükami khunono pa ghili chilu keno kümtsü no pa lokütsü tsa inini ke ighi che.