KUKAMI ATUGHIU 3 - Sumi Naga CL (Re-edited) Bible (BSI)

Solomon no Alokütsü Khu

¹ Solomon no Egypt kükau Pharaoh nga sasü külano pa sasü kütshükime luve. Pa no pa kungo ki ngo Ampeu ki eno Jerusalem homxa atupi yelu moke kutolo li sasü David phughi lo ache.

² Ampeu je ghenguno achineki shimono ache kehu timiqo ye qhemghaike-a lono aghashi che.

³ Solomon no Ampeu kimiye eno papu David pimheyeqo papeche, ikemu pa ye qhemghaike-a lono aghashipe mlla che.

⁴ Akükau no Gibeon lo aghashi niye wu, kughengu tino aghakishi-a kije ke; Solomon no tileno ghuthu qhethonhe akipti kümllagho tsüche.

⁵ Tipa ji Gibeon lo Ampeu no asamou no pa zülo ipeghi no pi, “I pelo kiu o tsü penishi ani kea?”

⁶ Solomon no khochile, “Nono I pu David o qeu lau iqemokeu kikimiye kije piye, kughengu pa no O zülo pükhükulu eno mikucho lono, eno müzüchoi xüche ke. Nono O kikimiye kije tipau pa ghenguno qhitsü eno ishi ye pa kükalakhü lo iqalu penike anu pa tsüe.

⁷ Itehi O Ampeu I Lhou, I no itimi shi anamu Nono I pu David-a lo o qeu pelo akükau shipe. Ni ye ayekipe vehumu mthae.

⁸ O qeu ye Nono kisheluve kemi, shishe ajekipimi, eno kihikhakümla timi hijeje dolo ani.

⁹ Tighenguno timiqo shou achipiu eno kiviküsa kimchilu no ayepelu penike alokütsü I tsülo. Tishimo aye ow timi hijeje shou khuu no ayepe luni kea?”

¹⁰ Solomon no hi khukeu no Ampeu lopu shive.

¹¹ Alhou no pa vilo pi, “Nono axü kushu, küakini, momu o ghümi pithive tsü penike züqhulo kiu no achipi keno ti ithini keu lokütsü khu kehu,

¹² julo, I no o tsa kiqi lono shitsüni. I no alokütsü eno kimchi kulupu o tsüni, eno o züu o thiu khunomu o toi ipeghimo nani.

¹³ Nono khumo keu ghi I no o tsüni, o küxü tivilo kükami kütami khunomu o toi kinikülü ngo agigihu ithulu pemoni.

¹⁴ O pu David toi nono I gholu, I yezah eno azakütsü pelu no I laghi lo cheche aye, I no o xüpushu tsüni.”

¹⁵ Solomon no züida ithughi kelo ti ye asamou shi aghi. Pa no Jerusalem lo ighi no Ampeuw Puloshoqhi bohu zülo puthugho no akipti eno külakishi kümllagho shipe Ampeu tsü, eno paw kijemi kümtsü kughulhu.

Solomon Lokütsü

¹⁶ Ghulo lakhi kütüqhalimi kini ighi no akükau zülo puthugho.

¹⁷ Pama gholo lakhi no pi, “O I mpeu, atotiu hipau nikujo kümtsa aki lakhi lo acheni eno li küa lono I no anu lakhi punu.

¹⁸ I no punuwo atsala aküthüni li ghi kiptimi lakhi punue. Aki tipau lo nikujo likhi acheni. Kütami khumu kühae eno nikujo likhi ngoae.

¹⁹ Atotiu hipau no putho lono li nu qhada pithive.

²⁰ Ikelo li no zübumta lono ithu I no züake lono I nu ikhiluve tsüno li nu akithiu pesü I phivilo püzüve tsü.

²¹ Kughou I no thanau ithughi no I nu lojini ye shikeno, anu huye thive aghi, Ikemu I no tsaqüi jukelo ti ye I no punu keu nu kumove aghi.”

²² Ikemu atotiu lakhiu no pi, “Moe, xüakeu no I nu eno thive keu huno o nue.” Atotiu atüghüu no pi, “Moe, thive keu no o nu eno xüakeu no I nue.” Hitoi pama no akükau zülono kighekile.

²³ Tile akükau no pi, “Nokujo lakhi no, ‘Hi xüakeu no I nu eno thive keu no ow’ ipi ani; eno lakhiu no, ‘Moe; o nu ye thivae, eno xüakeu no I nu,’ ipi ani.”

²⁴ Ikehu akükau no pi, “Azütakikihi I lau süghilo,” ikehu akükau lau ti süghitsü.

²⁵ Eno akükau no pi, “Xüakeu nu xapha kini shipe tüxaxa atotiu pama kijeve tsülo.”

²⁶ Tileno aza khuu nu no xü akeno, li no amlo lono anu kimiye akehu akükau vilo pi, “O I mpeu, anu pesü li tsüve lo eno kiukiu shimu anu pithitsü kevilo.” Ikemu lakhiu no pi, “Anga ye Iw mu shimo, ow mu shimoe; xaphave lo.”

²⁷ Tileno akükau no khochile, “Anu heqhi kevi no atotiu atüghüu tsüve lo; li no paza kuchoue.”

²⁸ Israelmi kümtsü no akükauw xakütha hipau chilu no agigihu pa tsü, kughengu pa ye achipiu shinike Alhou lokütsü pa lolo anipi panongu no ithive.