KUKAMI ATUGHIU 22 - Sumi Naga CL (Re-edited) Bible (BSI)

Ahab ngo Kichile Tungkupmi

¹ Ampe küthü dolo Israel ngo Syria ye aghüshi mono ae.

² Ikemu ampe aküthüu lono Judah kükau Jehoshaphat no Israel kükau lau ighi.

³ Israel kükau no pa qemi vilo pi, “Nongu ye Ramoth-gilead ye niw keghi ishi kutolo ningu ye Syria kükau launo luchile mono iqünhei ani kehu ithi anima?”

⁴ Ahab no Jehoshaphat vilo pi, “No ye I sasü Ramoth-gilead lewu nima?” Jehoshaphat no Israel kükau vilo pi, “Ni ye no ampi thoke, Iw timi eno Iw khurshimi ye ow paphi ke.”

⁵ Ikemu Jehoshaphat no Israel kükau vilo pi, “Ampeu launo kimchiju paghilo.”

⁶ Israel kükau no tungkupmi 400 qhalo kukütsü no pi, “Ni ye Ramoth-gilead lewu kepu kema?” Panongu no pi, “Lewulo, kughengu Ampeu no tokulu akükau tsü nani.”

⁷ Ikemu Jehoshaphat no pi, “Nino ighijulu kepu Ampeuw tungkupu kütami küha keshea?”

⁸ Israel kükau no Jehoshaphat vilo pi, “Ampeu lau ighiju luni keu milakhi Imlah nu Micaiah aphi, ikemu ni ye pa mithie, kughengu pa ye alhoksa thono I ghenguno khilemu tungkuptsa akivi pitsü chemoe.” Jehoshaphat no pi. “Akükau ye tishi pikepu kumoe.”

⁹ Tile Israel kükau no kijemi lakhi kuno pi, “Mtazü Imlah nu Micaiah saghilo.”

¹⁰ Akükau pama no küka phimini pepusü Samaria khagho lo athi kütsüghü-a lo kükalakhü lo iqa, eno tungkupmi kümtsü no pama zülono tungkuptsa piae.

¹¹ Chenaanah nu Zedekiah no pa sala ayi kiboqo mlape Ahab vilo pi, “Ampeu no ishi piani, ‘Akibo hipaqo pesü nono Syriami kütsa khamoke kutolo tuchile nani.’”

¹² Tungkupmi kümtsü no athoshi pi, “Ramoth-gilead lewu no tokulu shilo; Ampeu no tipau pesü akükau u lo süvetsü nani.”

Micaiah no Ahab Küla

¹³ Micaiah kuniye wu keu atsapeu no Micaiah vilo pi, “Tungkupmi kümtsü no akükau lopushi pivae. No ghi akivi tsa pivelo.”

¹⁴ Ikemu Micaiah no pi, “Ampeu xü anike Pa no kiu I vilo pi keno ni ye ti pi nani.”

¹⁵ Kughou pa no akükau Ahab zülo ighi keno akükau no pa vilo pi, “Micaiah, ningu ye Ramoth-gilead lewu kepu kema?” Pa no khochile, “Iqho lo, eno tokulu shilo; Ampeu no tipau pesü akükau u lo süvetsü nani.”

¹⁶ Ikemu akükau no pa vilo pi, “Ni ye ghuthu khije nono Ampeu je lono pi kelo, kuchou nguno kütau ye pipemo nike o pelo ashoqhi shipeni kea?”

¹⁷ Pa no pi, “Israel ghüshimi kümtsü akheu küha keu mbe toi apanagha naghuto lo chekeu I no ithulue. Eno Ampeu no pi, ‘Hipaqo ye ampeu kühae; panongu pelo iqüghai aki lo wove pelo.’”

¹⁸ Israel kükau no Jehoshaphat vilo pi, “Pa ye I ghenguno akivi kumono alhoksa likhi pi nani kepi I no o vilo pike kumo?”

¹⁹ Eno Micaiah no pi, “Tighenguno Ampeu tsa inilo: Ampeu no Pa kükalakhü lo iqa akeu, eno Paw kungumi no Pa u piyiu ngo ajeu puthugho akeu I no ithulu,

²⁰ eno Ampeu no pi, ‘Khuu no Ahab pelo Ramoth-gilead lono ikiqive penike züizalu nani kea?’ Lakhi no hipau pi, lakhiu no hupau piae.

²¹ Tile aghawu lakhi no Ampeu zülo ipeghi no pi, ‘I no pa züizani.’

²² Ampeu no pa vilo pi, ‘Kishi no shini kea?’ Aghawu no pi, ‘I no wuno paw tungkupmi kümtsü kichi lo akimki ghungu süve tsüni.’ Pa no pi, ‘No ye pa züiza no tolu nani ke wulo.’

²³ Tighenguno itehi julo, Ampeu no ow tungkupmi kümtsü lolo akimki ghawu süve tsüae; Ampeu no amhekiqi o shou pukuvae.”

²⁴ Tileno Chenaanah nu Zedekiah no Micaiah lau ighi no pa gilo ghatsü no pi, “Ampeu Ghungu ye kishi I pheve no o pütsa ighi kea?”

²⁵ Micaiah no pi, “Nono achebo alou itshüni ye wuke tsalani no ithi nani.”

²⁶ Israel kükau no pi, “Micaiah küghaluve lo, eno pa sasü aphughi lo angh Amon ngo akükau nu Joash pama lau wuno

²⁷ ishi pilo, ‘Akükau no ishi piani, “Timi hipau akughuki lo khatha püaghi lo eno I no akivishi ideighi moke kutolo asho ngo azü likhi pesü tsülo.”’”

²⁸ Micaiah no pi, “Nono akivishi ideighilu aye, Ampeu ye I pütsa püamoe.” Eno pa no pi, “Nongu kümtsü hi inilo!”

Ahab ye Aghüshi lono Thive

²⁹ Tithiu Israel kükau ngo Judah kükau pama ye Ramoth-gilead lenike iqhove.

³⁰ Israel kükau no Jehoshaphat vilo pi, “I no I ju pekilive no aghüshiqa lo iloni ke no ye o küka nanu pepusü ngolo.” Israel kükau no pa ju pekilive no aghüshiqa lo ilove.

³¹ Syria kükau no paw khurkulu shou kepten pano shighi kini vilo azah tsü, “Israel kükau likhi kumo aye kütami kije aghulo namu sasü aghüshi kevilo.”

³² Kughou panongu no akükau Jehoshaphat ithulu keno panongu no pi, “Hi no Israel kükaue.” Panongu no pa küpüghü thuve kelo Jehoshaphat no ighamku.

³³ Kughou keptenqo no pa ye Israel kükau kumoe pi kimchilu keno, panongu no ideighive.

³⁴ Ikemu timi lakhi no inapügha paw shexilika kapuwu kelono akükau Ahab kichiqho lo vesüve tsü. Ikehu pa no paw khurkulu sakicheu vilo pi, “Tsüghüve no aghüshiqa lono I saipeve lo, kughengu ni ye izavae.”

³⁵ Tipani kupuju aghü shive, eno akükau ye paw khurkulu lo puthughope Syriami küdau jupuwo ae. Pa ghüzaku lono aji chiji keu no khurkulu chhive eno pa ye kijiliu ye thive.

³⁶ Khetsünhe iloche kelo asütsa hipau no ghüshimi gholo veküphave, “Timi kümtsü pütüta ghakhu eno pütüta phughi lo idewove lo!”

³⁷ Hitoi akükau ye thive, eno Samaria lo shiqhove.

³⁸ Panongu no paw khurkulu Samaria zükucho lono qhuvetsü, Ampeu no pikeu kiqi lono atsüqo no pa ji mine, eno kütüqhalimi no tileno azükuchhu.

³⁹ Ahab kümla kütau, pa no akühahu ki shikeu, mishighüna shiqhe keqo ye Israel Kükami Yekikithi Kaku lo yepüani ke kumo keshea?

⁴⁰ Ahab ye pa puasüqo gholo zühuve eno pa nu Ahaziah no pa thisü luve.

Jehoshaphat no Judah lo Kalu

⁴¹ Israel kükau Ahab yepe mpe abidiu lono Asa nu Jehoshaphat no Judah lo ayepelu.

⁴² Jehoshaphat ye ampe shighi pungu lono ayepelu eno Jerusalem lono ampe muku pungu ayepe. Pa za ye Shilhi nonga Azubah.

⁴³ Pa ye pa pu Asa no shikeu kümla kümtsü shino Ampeu zülo kiu no achipi keno ti likhi shike, tipau lono tsüghüve moe. Ikemu qhemghai ke-a ye hephomo eno timiqo ye tipaqo lono aghashi eno akümllagho pesü tsüche.

⁴⁴ Jehoshaphat no Israel kükau ghi sasü külashie.

⁴⁵ Jehoshaphat kümla kütau pa no kiu shi keno, pa kumto piye keqo eno pa no kishi aghüshi keno, tipaqo ye Judah Kükami Yekikithi Kaku lo yepüani ke kumo keshea?

⁴⁶ Pa pu Asa ghuloki lono kiptimi kütüqha kemi haphe khakumo akeu pa no kümtsü shipühave tsü.

⁴⁷ Edom lo kükami kühano Judah kükau no kishe puwu keu no ayepe che.

⁴⁸ Jehoshaphat no Tarshish zükilu kutomo mlano Ophir lono ameshoyi süghi peniye puwu kemu wumlave, kughengu Ezion-geber lono zükiluqo shipüsave ke.

⁴⁹ Tileno Ahab nu Ahaziah no Jehoshaphat vilo pi, “I qemi pelo o qemi gholo wu pelo,” ikemu Jehoshaphat no pulo move.

⁵⁰ Jehoshaphat ye pa puasüqo gholo zühuve eno pa sükumo ye pa sü David phughi lo qhove eno pa nu Jehoram no pa thisü luve.

Ahaziah no Israel lo Kalu

⁵¹ Judah kükau Jehoshaphat yepe mpe chighiakütsüniu lono Ahab nu Ahaziah no Israel lo ayepelu, eno Israel shou ampe kini ayepe.

⁵² Pa ye Ampeu zülo alhoksa kümla shino pa pu ngo pa za pama toi xü, eno Nebat nu Jeroboam khuu Israelmi pelo axine shivepe keno, pa toi xüke.

⁵³ Pa ye Baal mlla eno huthu püzü pa pu toi ala thokha lono Israel Lhou Ampeu mlo shikighide tsüe.