KUKAMI ATUGHIU 21 - Sumi Naga CL (Re-edited) Bible (BSI)

Naboth Tsailu

¹ Jezreelmi Naboth ye Jezreel lo akükau Ahab kükaki phivilo atsailu lakhi ache.

² Ahab no Naboth vilo pi, “O tsailu I tsüvelo; hi ye I ki phivilo kehu I no tüxatini ghutu shini. Eno tipa theli lo I no atsailu kütau akiviu lakhi o tsüni, momu, nono pulo aye, I no tipau me qhemi o tsüni.”

³ Ikemu Naboth no pi, “I no I puasü mheghi o tsüveni keu ye Ampeu pulou kumoe.”

⁴ Naboth no pikeu tsa chilu no Ahab ye ighono amloqi mono agha idesü aki lo ilove kughengu Naboth no pa vilo, “Ni ye I puasüqo mheghi o tsümlae” ipike. Eno pa züalo ihozü no pa gi kughope kiumu chumove.

⁵ Pa nipu Jezebel no pa lau ighi no pi, “Kiu no ighono o ghungu püna anipi ana mu chumove akea?”

⁶ Pa no pi, “I no Jezreelmi Naboth vilo pi, ‘O tsailu I vilo jeve tsülo momu nono pulo aye, I no atsailu lakhi o tsüni.’ Ikemu pa no khochile, ‘Ni ye I tsailu o tsümoe.’”

⁷ Pa nipu no pi, “No ye itehi Israel shou ka ani keshea? Ithu chusho no o ghüthi püxülo; I no Jezreelmi Naboth tsailu o tsüveni.”

⁸ Ikehu li no yesü lakhi Ahab je lono yepe paw jemchi süve no Jezreel lo atomi ngo sakiphemi Naboth gholo mishighüna lo xüküami lau tsüpuwu.

⁹ Li no ishi yepuwu, “Kümvüni keu tsala kughu no Naboth pesü timiqo zülo qhilo.

¹⁰ Eno küsaküghami kini pesü pa zülo küghüqa no pama pelo pa nguku pelo, ‘No ye Alhou ngo akükau ghushovae.’ Tishino pa sasü aphughi khalau ipe no atu pesü veqhive lo.”

¹¹ Aphughi tipau lo atomi ngo sakiphemi no Jezebel no yesü lo yepüake toi shivetsü.

¹² Panongu no ghulo lakhi khaqhi no kümvü eno Naboth pesü timiqo zülo qhi.

¹³ Eno küsaküghami kini no ighi no pa zülono timiqo küa lono Naboth nguku, “Naboth ye Alhou ngo akükau ghushovae.” Ikehu panongu no pa sasü aphughi khalau ipe no atu pesü veqhive.

¹⁴ Tishino “Naboth ye thivae,” pi Jezebel lau pi puwuve.

¹⁵ Jezebel no asütsa chilu kemtsa Ahab vilo pi, “Ithu no Jezreelmi Naboth tsailu khikhi pa no o lau jesü tsümove keno, ti ow shilulo, kughengu Naboth ye thivae.”

¹⁶ Ahab no Naboth ye thivae pikeu chilu kemtsa ithu no atsailu tipau lunike wuve.

Ampeu no Ahab Kileve

¹⁷ Tileno Ampeu tsa Tishbemi Elijah lau ishi ighi,

¹⁸ “Ithu no Samaria lo Israel kükau Ahab lau wulo. Pa ye Naboth tsailu luve tsüniye kuto ani.

¹⁹ Pa vilo pilo, ‘Ampeu no ishi piani, “No ye timi pithive no pa mheghi süxaluve ani keshea?”’ Eno highi pilo, ‘Ampeu no ishi piani: “Atsüqo no Naboth ji mineke-a lono o ji ghi mine nani.”’”

²⁰ Ahab no Elijah vilo pi, “I ghümi, no ye I phuluve akea?” Elijah no khochile, “Iyei, I no o phuluvae kughengu no ye Ampeu zülo kiu no achipi kumo keno shinike o jesüvae.

²¹ Julo, I no o shou amhekiqi puwu nani. I no Ahab lagha lo kiptimi thaqhü, aqüaxemi ililai kemi kümtsü püghave tsüni.

²² I no o kibolomi ghi Nebat nu Jeroboam kibolomi toive tsüni, eno Ahijah nu akükau Baasha toive tsüni, kughengu nono Israelmi sasü axine lo ilove keu no I mlo shikighideve tsüae.

²³ Jezebel ghenguno Ampeu no piani, ‘Atsüqo no Jezreel lono li shi chunani.’

²⁴ Ahab kibolomi khukhumu aphughi lono thive keu ye atsüqo no chuve nani, aluza lono thive kemi no aghauqo no chuve nani.”

Ahab no Xaide

²⁵ (Khunomu Ahab toi anipu no kipe no Ampeu zülo alhoksa shinike pa ampi jesüve keu kühae.

²⁶ Pa ye aphikümqhüpu shi ajulho pape wuve, ti ye Amorimi khunoqo Ampeu no Israelmi zülono hapheve keno, tipaqo toi shiuve ke.)

²⁷ Kughou Ahab no atsa tipaqo chilu keno, pa no pa phiküzü süxüve no yeqhiyephi pepusü kümvü eno ighono amlo saqhiyi itsü wuve.

²⁸ Ikelo Ampeu tsa Tishbemi Elijah lau ighi,

²⁹ “Ahab no kishi I zülo kuchuni ani keno ithulu anima? Pa no I zülo kuchuni ani kehu pa xüloye pa lau amhekiqipu puwu tsümoae; ikemu pa nu ghuloki lono pa kibolomi shou puwu tsüni.”