KUKAMI ATUGHIU 20 - Sumi Naga CL (Re-edited) Bible (BSI)

Ahab no Syria sasü Aghüshi

¹ Syria kükau Ben-hadad no paw ghüshimi kümtsü hekütsü. Kükami shighi kini no khurshi ngo khurkulu sasü pa gholo küqha, eno pa no Samaria lenike bosü luve no lethu.

² Pa no atsapemi hape Israel kükau Ahab lau hitoi pipe, “Akükau Ben-hadad no ishi piani:

³ ‘Ow ghükayi ngo ameshoyi ye Iw eno o nipuqo gholo akiviu ngo o nuliqo ghi Iw ke’”

⁴ Israel kükau no khochile, “I mpeu, nono pike toi shilo, O akükau, ni ye ow, eno I no akeu kümtsü ow ke.”

⁵ Atsapemi no itaghi ighi no pi, “Ben-Hadad no ishi piani: ‘I no o lau ishi pi puwu, “Ow ghükayi ngo ameshoyi eno o nipu anuliqo I tsüpuwu lo.”

⁶ Ikemu itaghi thoghiu hipa ghuloki lo I no I qemi puwuni, panongu no o ki ngo o qemi ki xuju peni eno nono kiu küpü cheni keno, kümtsü luvetsü peni.’”

⁷ Tileno Israel kükau no aghakhu lo sakiphemi kümtsü kuno pi, “Hi ithilo, timi hipau ye kishino alhoksa shini keno phu ani, kughengu pa no I vilo I nipu I nuliqo, eno Iw ghükayi ngo ameshoyi kümtsü khuke ni ghi milive moe.”

⁸ Sakiphemi eno timi kümtsü no khochile, “Khilemu pa tsa ini momu pulotsü kevilo.”

⁹ Ikehu Ahab no Ben-hadad tsapemi vilo pi, “I mpeu akükau vilo pilo, ‘Nono khu akeu atüghüu ye shitsüni, ikemu akiniu ye shimlae.’” Atsapemi no wuve no itaghi ideighi no pi,

¹⁰ Ben-hadad no pa vilo pi puwu, “I papemi no Samaria yeghimkhu müdüniyi pewu khamla aye, alhouqo pelo alau I ghime peniu.”

¹¹ Akükau Ahab no khochile, “Pa vilo pilo, ‘Aghü shiniye ananu pepu akemi ye aghü toluve no ananu xaqhi akemi toi qheza kevilo.’”

¹² Kughou Ben-hadad no apusho lo kükami sasü aji sho akelono atsa hipau chilu keno, pa no paw timiqo azah tsü, “Aghü shinike kutolo.” Panongu no aphughi lenike kutove.

Ahab no Ben-hadad Theqhive

¹³ Tile tungkupu lakhi no Ahab lau ighi no pi, “Ampeu no ishi piani, No ye ghüshimi aqokitikhi ithulu anima? Julo, ishi tsala lono I no hipaqo o u lo sütsüni, tishianguno o pelo Ni ye Ampeu kepi ithi penie.”

¹⁴ Ahab no pi, “Khuu vecheo shinani kea?” Tungkupu no khochile, “Ampeu no ishi piani, Atokujo lo angh qholo kijemi vecheo shinani.” Ahab no pi, “Khuu no aghüshi huthuni kea?” Pa no khochile, “Nonoe.”

¹⁵ Ikehu Ahab no atokujo lo angh qholo kijemi pano 232 hekütsülu. Eno panongu gholo Israelmi 7,000 hekütsü.

¹⁶ Puchou Ben-hadad no pa kuphu akemi kükami shighi kini sasü apusho lono aji shomzü ake lono panongu no aphughi lono ipeghi no lethuve.

¹⁷ Atokujo lo angh qholo kijemi paghi no ipe. Ben-hadad no puwu kemi aghukhemi pa vilo pi, “Samaria lono timi ipe cheni.”

¹⁸ Pa no pi, “Panongu no külakishi lono momu aghü shinike cheghi namu aküxü no kügha luvelo.”

¹⁹ Ikehu atokujo lo angh qholo kijemi eno ghüshimi no aphughi lono ipeghive.

²⁰ Eno panongu pütüta müzülo timi ghiqhi thuve. Syriami no pove eno Israelmi no panongu hawu, ikemu Ben-hadad ye khurshi lono khurshimi sasü pojo luve.

²¹ Israel kükau no ipeghi no Syriami khurshi ngo khurkulu kutomo kütsave tsü, eno shishe Syriami kütsave.

²² Tithiu tungkupu huno Israel kükau lau ighi no pi, “Ighilo, o shikumto lulo, eno nono kiu shimasa keno tsaqüi kughu lo, kughengu woche keu tsülü tusho lo Syria kükau ye o lenike ighi nani.”

²³ Syria kükau qholo kijemi no pa vilo pi, “Pano lhouqo ye atoghi lhou kehu ningu nguno akumtou kena. Ikemu nino panongu sasü aqa lono aghüshi aye, mtsüqheino pano nguno akumtou shinani.

²⁴ Ikehu hi shilo: kükamiqo pano-a lono ikhive no tile zatsümi süvelo.

²⁵ Eno ghüshimi pühave keu jehi itaghi ghüshimi hekütsülo, khurshi ngo khurkulu püzüu tho kutolo. Tishino ningu no panongu sasü aqa lono aghü shini, tishiaye mtsüqheino nino panongu nguno akumtou shinani.” Pa no panongu tsa luve no tishie.

Itaghi Ben-hadad Theqhive

²⁶ Tsülü tusho lo Ben-hadad no Syriami hekütsü no Aphek lono Israelmi sasü aghüshi.

²⁷ Israelmi ghi hekütsü luve eno achuqupu kutove tsü kethiu panongu no wuve. Israelmi ye ane loji aghulo kini toi Syriami zülo aghazü shi, ikemu Syriami ye aluza kümtsü qhasüpe ae.

²⁸ Alhou timi huno ighi no Israel kükau vilo pi, “Ampeu no ishi piani, ‘Syriami no, “Ampeu ye atoghiqo lhou kethono akhila lhou kumoe,” ipi kehu I no hi aqokitikhi kümtsü pesü o u lo süve tsüni, eno nono Ni ye Ampeu kepi ithi nani.’”

²⁹ Atsala tsüni kutolo panongu küghüngü pe pütüta ghazü lo ngoae. Eno atsala akütsüniu lono aghüshi thuve, eno tipani no Israelmi no Syriami lakh lakhi ghiqhive tsü.

³⁰ Tile xülu kemi no posü Aphek lo iloghi kelono atupi no ilaqi pano 27,000 pithive. Ben-hadad ghi posü aphughi lo acheku lo itshülu.

³¹ Pa qemi no pa vilo pi, “Julo, Israel kükami ye kimiyekini kepi nino chilue. Ni pelo kumshophi no apo khave eno akighi no akütsü khapu no Israel kükau lau wu pelo. Pa ye o küxü pükhatsü luvike.”

³² Ikehu panongu no kumshophi no apo khapu eno akighi no akütsü khapusü Israel kükau lau wuno pi, “O qeu Ben-hadad no piani, ‘Kimiyeno I pelo xülu pelo.’” Akükau no pi, “Pa ye xüaphi kea? Pa ye I thiküzüue.”

³³ Panongu no ado kivi miqeju apüzü paikhavi no pa tsa pesü pi, “Iyei, o thiküzüu Ben-hadad.” Pa no pi, “Wuno pa saghilo.” Ben-hadad no pa lau ipeghi kelo Ahab no khurkulu lo ikuvepe.

³⁴ Ben-hadad no pa vilo pi, “I pu no o pu u lono mishighüna luve keqo I no tsüchile veni, eno I pu no Samaria lo shike toi no ghi Damascus lo lhidi shilulo.” Ahab no pi, “Nono pikeu bekütha lono I no o khaqhi pheveni.” Ikehu Ahab no pa sasü puloshoqhi shive no puwuve.

Ben-hadad Pheve keu Pipütha

³⁵ Ampeu zakütsü lono tungkupmi loji lo milakhi no pa küsau vilo pi, “I heqhilo.” Ikemu pa no tishimoe,

³⁶ Tile pa no pi, “Nono Ampeu sütsa hebideve ake ghenguno julo nono I launo wuve kemtsa, abongshuu no o tsüve nani.” Pa no wuve kemtsa abongshuu no pa tsüve.

³⁷ Tithiu pa no timi lakhiu sholu keu vilo pi, “I heqhilo.” Timi huno pa heqhi no ghüzave.

³⁸ Tungkupu huno wuve, eno agi khapuve no ala lono akükau ngokhea.

³⁹ Akükau no vechewu cheke lono tungkupu huno akükau kuno pi, “O qeu no aghüshiqa lo aghüshi akelono ghüshimi no timi lakhi I lau saghi no pi, ‘Timi hipau khelo; tsala pa kühave aye, o küxü no pa küxü kilini, momu no ye ghükayi ahu 34 tsüni.’

⁴⁰ Ikemu o qeu no hula-hila mighi akelono timi huye pove aghi.” Akükau no pa vilo pi, “No ampi no xathave ake ow küghakütha ye titoi shiniae.”

⁴¹ Tileno pa no agi khapu akeu phi ikhive kelo akükau no pa ye tungkupmi lakhi kepi kimchi luve.

⁴² Pa no akükau vilo pi, “Ampeu no ishi piani, ‘I no pithive penike o u lo sütsü keu nono phe puwuve kehu o küxü no pa küxü züqhu shini eno ow timi no paw timi züqhu shiniae.’”

⁴³ Ikehu Israel kükau ye Samaria lo pa kilo amlo küsashi eno agi zümoi idewove.