KUKAMI ATUGHIU 2 - Sumi Naga CL (Re-edited) Bible (BSI)

David no Solomon Kütsüshika

¹ Kughou David kithi tsala kupunuve keno, pa no pa nu Solomon kuno pi,

² “Ni ye ayeghi lo kümtsü no sholu chekeu do kupunuvae. Akumto shilo eno timi süchomi shilo,

³ Moses Yezah lo yepüa ketoi Ampeu o Lhou khuaye, Pa zakütsü, pimheye, Pa no ghutu keu kümtsü pelu lo, tishianguno no ye khila khila wuna kiukiu shinamu ikoishelu nani,

⁴ eno Ampeu no I ghenguno pikeu tsa shikupulu nani, ‘O nuli no pano kümla lo kutokupui shino I zülo amlo kümtsü, angulho kümtsü süno cheche aye, no ye Israel kükalakhü lo iqani keu timi püqümo nani.’

⁵ “Tinguno alau, Zeruiah nu Joab no I lau kiu mla keno nono ithi ani, pa no püzüu aghüshi ghuloki lono aji peleve keu mkhülu anipi iqüghaive kethiu no Israel ghüshimi zatsüu kini, Ner nu Abner ngo Jether nu Amasa pama pithive, eno aghü ji pesü pa pokha ngo apukhuqho lo lepuku ke.

⁶ Tighenguno kiu shikepu keno o lokütsü kiqi lono shilo, ikemu pa pelo asa mpave no Kithigha lo aloino wupe kevilo.

⁷ Ikemu Gileadmi Barzillai nuli lau kikimiye piyelo eno o gholo chusholu kemi shipelo, kughengu I no o thiküzüu Absalom launo poche kelo panongu no I kimiye püani.

⁸ Itaghi I no Mahanaim lo wuke tsala lo Bahurim lo Benjaminmi Gera nu Shimei no aloqhi I ghusho püani. Ikemu pa no Jordan lono I sasü kusho niye ighi kelo, I no Ampeu je lono pa vilo tushoqhi, ‘Ni ye o pithimoe.’

⁹ Ikemu itehi pa ye akipimi küha kepi kihi kevilo, kughengu no ye alokütsümi ke. Nono pa lau kiu shikepu keno ithi ani, aji no pa sa kümpa küxape Kithigha lo piqilo.”

David Kithi

¹⁰ Tishino David ye pa puasüqo gholo zühuve eno David phughi lo shiqhove.

¹¹ Pa ye ampe lhobidi Israelmi shou ayepe, Hebron lono ampe tsüni eno Jerusalem lono ampe shighi küthü.

¹² Tithiu Solomon no papu kükalakhü lo ngove, eno pa kükaqha ye iqhikumto luve.

Solomon Yepe Iqhikumto

¹³ Haggith nu Adonijah no Solomon paza Bathsheba lau ighi. Li no pi, “No ye külakishi lono ighi anima?” Pa no pi, “Külakishi lonoe.”

¹⁴ Pa no pi, “Ni ye o vilo kiuala pikepu ani.” Li no pi, “Pilo”

¹⁵ Pa no pi, “Nono ithi anike kükaqha ye Iw shiae, eno Israelmi kümtsü no I no ayepe nani kepi huqhe akemu tutsüghüpe I thiküzüu saje shive, kughengu Ampeu no pa saje shive tsüe.

¹⁶ Itehi ni ye o vilo thime lakhi qhüiniju ani; I milive kevilo.” Li no pi, “Pilo.”

¹⁷ Pa no pi, “Kimiyeno Akükau Solomon vilo Shunammi Abishag pesü I nipu shi penike iniju tsülo—pa ye o milimo nani.”

¹⁸ Bathsheba no pi, “Tishini; I no o ghenguno akükau vilo pi tsüni.”

¹⁹ Ikehu Bathsheba no Adonijah züqhushi pinike akükau lau wu. Akükau no li pütsani ke puthughove eno li zülo itsaqi. Pa no kükalakhü lo iqave no paza sala alakhü lakhi süghipe, eno pa u ajeu küghüqae.

²⁰ Li no pi, “Ni ye avehu kitila o vilo qhüiniju kepu anike kimiyeno lachiletsü kevilo.” Akükau no li vilo pi, “Kiu keno pilo I za, ni ye o lachile moe.”

²¹ Li no pi, “O mu Adonijah pelo Shunammi Abishag pesü pa nipu shive pelo.”

²² Akükau Solomon no paza khochile, “No ye kushiye Adonijah ghenguno Abishag iniju ani kea? Pa ghenguno kükaqha vehumu qhüiniju lo, kughengu pa ye I mu, eno pa gholo achineu Abiathar ngo Zeruiah nu Joab ani.”

²³ Eno Solomon no Ampeu je lono tushoqhi, “Atsa hipau ghenguno Adonijah küxü luve tsümo aye, Alhou no niu pithive peniu!

²⁴ Tighenguno xüküau Ampeu, khuu no I pesü I pu David kükalakhü lo I qhipüani, eno Pa no tushoqhi püake toi I kükaqha hipau shikumto tsü keno, Pa je lono piqhi anike ishi tsala lono Adonijah pithiveni.”

²⁵ Ikehu Akükau Solomon no Jehoiada nu Benaiah puwu no Adonijah heqhivepe.

²⁶ Akükau no achineu Abiathar vilo pi, “No ghakhu Anathoth lo chevelo. No ye thive küzüpu shi ani kemu itehi ni ye o pithi moveni, kughengu I pu David xülo nono Ampeuw Puloshoqhi bohu kipeu shiche eno shiluküsa kümtsü pa sasü küsaje ighike.”

²⁷ Ikehu Solomon no Ampeu chine kümla lono Abiathar hapheve, tishikeu lono Shiloh lo Ampeu no Eli limi vehu pi püakeu shikupuve.

²⁸ Kughou atsa hipau Joab tokeno, pa ye Absalom kuphumo kemu Adonijah sasü küsüqe kehu, Ampeu phiki lo poilo akiptia kibo tsüqüpe ngoluve.

²⁹ Eno Solomon vilo, “Joab ye aphiki lo poilo akiptia kibo tsüqüpe ani,” ipi kelo, Solomon no Jehoiada nu Benaiah puwu no pi, “Wuno pa ghiqhive lo.”

³⁰ Benaiah no Ampeu phiki lo ighi no pa vilo pi, “Akükau no azah tsü ani, ‘Khalau ipeghi lo.’” Ikemu pa no pi, “Moe, ni ye hileno thiveni.” Benaiah no Joab tsa pesü akükau vilo pi.

³¹ Solomon no khochile, “Pa no pike toi shivelo, pa heqhive no qhove lo, tishikeu lono ni eno I pu David limi launo Joab no akipimi küha kemi heqhi pithive keu ngusü puve peni.

³² Pa no aji peleve keu Ampeu no pa kütsü lo pukutsü nani, kughengu I pu vilo pimono pa no timi kini, Ner nu Abner Israel ghüshimi zatsüu ngo Jether nu Amasa Judah ghüshimi zatsüu, pa nguno amikuchou eno akiviu pithive tsüe.

³³ Pama heqhive keu ngusü ye Joab ngo pa lagha shou alholo anani. Ikemu David ngo pa lagha eno pa kibolomi ngo pa kükalakhü ye Ampeu launo alholo aloino ache nani.”

³⁴ Jehoiada nu Benaiah no ikuno pa heqhive, eno pa sükumo ye yenguyi ke-a lo pa kilo shiqhove.

³⁵ Tishino akükau no Benaiah pesü Joab theli lo ghüshimi zatsüu shive eno Zadok pesü Abiathar theli lo achineu shive.

³⁶ Akükau no Shimei kuno pi, “Jerusalem lo o sala aki shino tile ngove lo, eno khilemu ti hechesü khilamu iqhoiqi kevilo.

³⁷ Kughengu nono Kidron hechesü ipeke tsalani no, no ye thive nanie pi ithilo. O kipimi ye o kütsü shou ikughi nani.”

³⁸ Shimei no khochile, “Nono pi akeu ye akivi; I mpeu akükau no pike toi o qeu no shini.” Ikehu pa ye ado kushuo Jerusalem lo xüache.

³⁹ Ikemu ampe küthü thiu Shimei qemi kini no Gath kükau Maacah nu Achish lau pove. Kughou Shimei vilo, “Julo, O qemi pama ye Gath lo ani,” ipi asütsa tsü keno,

⁴⁰ Shimei no Gath lo Achish lau pa qemi pama saluni ye wu. Pa no wuno pa qemi sasü ighive.

⁴¹ Kughou Solomon vilo Shimei ye Jerusalem lono Gath lo wu püzü ighivae pikeu sütsa tsü keno,

⁴² pa no Shimei kusaghipe no pi, “‘Nono ashou khila khilamu wuke tsalani no, no ye thive nanie pi mtsüqheino ithilo,’ ipi ni ye o pelo Ampeu je lono tushoqhipe eno o ghutuke kumo? Eno nono I vilo, ‘Nono pi akeu ye akivi; I no agholuni,’ ipike.

⁴³ Imaye no ye kushiye Ampeu lau o shoqhi qhimove eno I no azah tsükeu pemove kea?”

⁴⁴ Akükau no Shimei vilo hi ghi pi, “Nono I pu David lau alhoksa shikeu kümtsü no ghi o mlo lo ani. Ikehu Ampeu no o kümla pesü o kütsü shou pukutsü nani.

⁴⁵ Ikemu Akükau Solomon ye akümghau, eno David kükalakhü ye alholo Ampeu zülo iqhikumto tsü nani.”

⁴⁶ Tileno akükau no Benaiah azah tsüno pa no Shimei heqhive. Tishino kükaqha ye Solomon u lono mtotoi luve.