KUKAMI ATUGHIU 19 - Sumi Naga CL (Re-edited) Bible (BSI)

Elijah no Horeb Tolo Pove

¹ Ahab no Elijah no kiu mla eno kishi Baal tungkupmi kümtsü pithive keno tipau pesü pa nipu Jezebel vilo pi.

² Jezebel no Elijah lau pi puwu, “Thoghiu hipa ghuloki lo I no o küxü pesü nono tungkupmi lau shike toi shimo aye, alhouqo pelo niu heqhi pithive peniu.”

³ Elijah ye msave no pa küxü pükha nike posü Judah lo Beersheba lo ighi, eno pa qeu tile qhive.

⁴ Ikemu pau ye atsala lakhi ghüzü toike lo aghasa qhalo wuve no asübo lakhi kicheqho lo ngove. Pa ye tile nomu thiveni kepi ishi kümsü, “Hi ye ihulovae; O Ampeu, itehi I küxü luve tsülo, kughengu ni ye I puasüqo nguno kiumu akivi ye kumoe.”

⁵ Eno pa ye asübo qholo züuve. Tileno kungumi lakhi no pa buno pi, “Ithughi no chulo.”

⁶ Pa no jukelo atu külü shou asho bepüaghi eno azübohu pa kütsü phivilo aghi. Pa no ti chushove no itaghi züuve.

⁷ Ampeuw kungumi no akiniu ighi no pa buno pi, “Ithughi no chulo, kughengu o ghenguno aghüzüla ye shishe kushuo aphi.”

⁸ Elijah no ithughi no chusho luve, eno tipau kumto no pa sasü atsala lhobidi chesü Alhouw naghuto Horeb tolu.

Ampeu no Elijah Pütsa

⁹ Pa no atuki lakhi lo wuno tipaji tile züve. Eno Ampeu no pa pütsa, “Elijah, no ye hile kiu shi ani kea?”

¹⁰ Pa no khochile, “Ni ye Ampeu, aqokitikhi Lhou ghenguno aküxü tsücheni. Kughengu Israelmi no Ow puloshoqhi phevae, eno O kümlla khache kubove no Ow tungkupmi kümtsü pithive tsüae. Küxümi ye I likhivae, eno niu ghi pithive nike panongu no phucheni.”

¹¹ Ampeu no pi, “Khalau ipe no atoghi lo Ampeu zülo puthugho lo.” Tile Ampeu no hechesü wuve, ikelo Ampeu zülo ighono akumto mülhü no atoghi tipau fuphove tsüno atuqu ghi kubo pinyive tsü, ikemu Ampeu ye amülhü lo kühae. Amülhü thiu ayeghi küghütha ighi, ikemu Ampeu ye ayeghi küghütha lomu kühae.

¹² Ayeghi küghütha thiu ami ipeghi, ikemu Ampeu ye ami lomu kühae. Eno ami thiu mükhano asütsa lakhi ighi.

¹³ Kughou Elijah no ti chilu keno, pa no paw hebephi xape pa gi nhave no khalau ipeghi eno ti atuki kulaghi lo puthugho. Ikelo asütsa no pa vilo pi, “Elijah, no ye hile kiu shi ani kea?”

¹⁴ Pa no khochile, “Ni ye Ampeu aqokitikhi Lhou ghenguno aküxü tsücheni, kughengu Israelmi no Ow puloshoqhi phevae, eno O kümlla khache kubove no Ow tungkupmi kümtsü pithive tsüae. Küxümi ye I likhivae, eno niu ghi pithive nike panongu no phucheni.”

¹⁵ Ampeu no pa vilo pi, “Damascus sayeqha la lono idewove lo. Aphughi lo ilo no Hazael pelo Syriami kükau shipenike nukishe lo.

¹⁶ Eno Nimshi nu Jehu pelo Israelmi kükau shipenike nukishe lo, Abel-meholahmi Shaphat nu Elisha pelo o züqhulo tungkupu shipenike nukishe lo.

¹⁷ Hazael zütakikihi lono pokalu keqo no Jehu no pithive nani, eno Jehu zütakikihi lono pokalu keqo no Elisha no pithive nani.

¹⁸ Ikeghi Ni ye Israel lo khuno khonhe no Baal zülo qhoqhünhe mphi eno Baal müma mphi keno, timi 7,000 püxü püanie.”

Elisha Kulu

¹⁹ Ikehu Elijah ye tileno wuve no Shaphat nu Elisha sasü kusholu. Elisha ye amshitsü tüna chighikini sasü alu hokide aghi, eno pa no chighiakiniu sasü cheghi. Tile Elijah no pa lau ighi no paw hebephi xape Elisha shou bevetsü.

²⁰ Ikelo pa no amishiqo qhive no Elijah hasü ighi no pi; “I pelo I pu I za kinive pelo, tishino I no o papeni.” Elijah no khochile, “Idewolo, ni ye o lau kiu shive kea?”

²¹ Elisha no ideighi no pa mishi küma pesü aghashi no kuokhasü pesü ami shipüzü ashi lhope timiqo pelo chuvepe. Tishino, pa ye Elijah pape wuve eno paw kukuphuu shive.