KUKAMI ATUGHIU 18 - Sumi Naga CL (Re-edited) Bible (BSI)

Elijah no Ahab Sasü Kumjo

¹ Atsala kutomo thiu ampe aküthüu lono Ampeu no Elijah vilo pi, “Ahab zülo wulo eno I no tsütsüghu puwu tsüni.”

² Elijah no Ahab zülo wu. Tipa ghuloki lo Samaria lo ighono püqümiye ae.

³ Ahab no kükaki jukükütsüu Obadiah ku. (Obadiah ye shishe Ampeu sümsa che,

⁴ eno kughou Jezebel no Ampeuw tungkupmi heqhi akeno Obadiah no pano 100 sasü amqo kini shino atuki lo küsüve eno asho ngo azü pesü panongu loji.)

⁵ Ahab no Obadiah vilo pi, “Khurshi ngo khurgha lojilu kepu sütsüni phulu no lhoxüqo püxülu kepushi aghakhu lo azüpuki ngo akhila kümtsü lo wulo.”

⁶ Ikehu Ahab ngo Obadiah pama no acheaxü kijeve no Ahab no lakhi küdau wuve eno Obadiah no lakhiu küdau wuve.

⁷ Obadiah no wuche kelono Elijah no pa sasü kusholu. Obadiah no Elijah michiluve no pa gi pishiqho luve no pi, “Hi ye no kema, I mpeu Elijah?”

⁸ Pa no khochile, “Iyei, nike. Wuno o mpeu vilo pilo, ‘Julo, Elijah hilau ani.’”

⁹ Obadiah no pi, “Ni ye kishi küqüve keno no ye o qeu pesü Ahab u lo süvetsü no I heqhive peniye ani kea?

¹⁰ Ampeu o Lhou xü anike shiye eno kükaqha lakhi lomu I mpeu no I pelo o phuwu pemo keu kühae. Panongu no, ‘Pa ye hilau kühae,’ ipi aye, pa no kükaqha momu shiye tipaqo pelo no ithumla kepi ashoqhi shipe.

¹¹ Ikelo itehi nono piani, ‘Wuno o mpeu vilo pilo, “Elijah hilau ani.”’

¹² I no o launo wuve kemtsa Ampeu Ghungu no o khapesü I no mthake-a lo wuve nani. Ikehu ni o qeu ye I lhothe lono Ampeu sümsa ighive akemu, I no Ahab vilo ti pive no pa no o phumlave aye, pa ye I pithive niae.

¹³ Jezebel no Ampeuw tungkupmi heqhi akelo I no pano 100 pesü amqo kini shino atuki lo küsüve no asho ngo azü panongu tsükeu ghili I mpeu vilo pimphi keshea?

¹⁴ Eno itehi no ye I vilo piani, ‘Wuno o mpeu vilo pilo, “Elijah hilau ani”’; pa ye I pithive nani.”

¹⁵ Elijah no pi, “Ampeu xü ani eno I no Pa qe acheni ke ni ye kuchou no ishi ye ni ampi pesü pa piyeni.”

¹⁶ Ikehu Obadiah no Ahab lau wuno pa vilo pi, eno Ahab no Elijah sasü kusholu.

¹⁷ Kughou Ahab no Elijah ithulu keno, pa no pi, “Hi ye no, Israel küküpnau keshea?”

¹⁸ Pa no khochile, “Ni ye Israel küpüna püamoe, ikemu nou no eno o lagha no küpüna cheni, kughengu nono Ampeu zakütsüqo pheve no Baal mllauve ke.

¹⁹ Tighenguno itehi Israelmi kümtsü Carmel Toghi lono I sasü kusholu penike azah shilo, eno Baal tungkupmi 450 ngo Asherah tungkupmi 400 khunoqo kükaliu Jezebel gholo aghulhu shi acheni keno tipaqo ghi saghilo.”

Baal Chinemi Theqhive

²⁰ Ikehu Ahab no Israelmi eno Baal tungkupmi kümtsü Carmel Toghi lo hekütsü.

²¹ Elijah no timiqo phivilo ighi no pi, “Nongu mlo lo hiküma dolo xatha nike ado khitohi luni kea? Ampeu no Alhou shiaghi aye, Pa papelo; ikemu Baal no shiaghi aye, pa papelo.” Timiqo ye atsa lakhimu piqhi move.

²² Tileno Elijah no pi, “Ampeuw tungkupmi I likhivae, eno Baal tungkupmi ye 450 ani.

²³ Amshitsü kini ningu tsülo, panongu no lakhi kishepe heqhi no ghekuchope asü shou beni, ikemu ami sümoni. Ni ghi amshitsü lakhi pesü titoi asü shou beni ikemu ami sümoe.

²⁴ Tishino nongu no nongu lhou vilo inikhuni, eno ni ghi I Mpeu vilo inikhuni, Alhou khuu no ami pesü khochile tsüni keno, Pa no Alhou ke.” Timi kümtsü no khochile, “Ti ye achipi shi ani.”

²⁵ Tileno Elijah no Baal tungkupmi vilo pi, “Nongu ye kutomo ani kehu atüghüshi nongu no amshitsü lakhi kishepe kishekulu shino no lhou lau inikhu lo, ikemu ami ye sükevilo.”

²⁶ Panongu no amshitsü ikhipe kishekulu shino inaqhe no puchomghü kutolo Baal vilo inikhu, “O Baal, ni khochile tsülo!” Ikemu kiu sütsa mu ighimo, eno khunomu khochile moe. Panongu no akiptia homxa ilhe ae.

²⁷ Pucho mta lo Elijah no panongu junuqhi no pi, “Ighamku lo, kughengu pa ye alhoue. Pa ye mighimghai ani keo, akulhoqhi ani keo, aghüzüla lo cheni keo, ikeo zü anino küda masa nani keno mthae.”

²⁸ Tileno panongu no ighamku eno pano khuaye kiqi lono azütakikihi ngo angu pesü pano phimpi lo aji qoipeghi moke kutolo ghapuku.

²⁹ Puchomta hecheve eno avela kümllagho do kutolo, panongu no alezüphoi ighamku akemu khunomu khochilemo; khunomu jutsü moe.

³⁰ Tileno Elijah no timi kümtsü vilo pi, “I kupunu ighilo.” Kümtsü no pa kupunu ighi. Pa no Ampeu kümlla khache hephove aghi keqo shikitheve.

³¹ Jacob, khuu Ampeu no pa je Israel kutsü keno, pa nuliqo kiqi shi Elijah no atu chighikini ikhilu.

³² Eno tipaqo pesü Ampeu kümlla khache mla, eno tipau homxa ghi azülaki mlave, azü liter shighi qhemi khepucho kulupu heve.

³³ Pa no akiptia lo asü beve, eno amshitsü ghekuchope asü shou beno no pi, “Azütughuko bidi lono azü pesü akipti kümllagho ngo asü shou lepuku lo.”

³⁴ Panongu no tishive kethiu pa no pi, “Akiniu ghi tishilo.” Panongu no tishi tsü. Pa no itaghi pi, “Aküthüu ghi tishilo.” Panongu no tishive tsü.

³⁵ Ikelo azü no akiptia homxa qowuve eno tino azülaki lo ghi chhive.

³⁶ Avela kümllagho do lono tungkupu Elijah no akümlla-khache phivilo ighi no pi, “O Ampeu, Abraham, Isaac eno Jacob Lhou, No ye Israel Lhou, ni ye O qeu eno O zakütsü lono hipaqo shi ani kepi ishi tsala lono panongu pelo ithilu pelo.

³⁷ I khochile lo, O Ampeu, I khochile lo, tishikeu lono timi hipaqo pelo No ye Alhou kepi ithi pelo O Ampeu, eno Nono panongu sachile ighi ani kepi ithi pelo.”

³⁸ Tileno Ampeu no ami piqi tsüno akipti kümllagho ngo asü, atu, ayeghimkhu, eno azülaki lo azü akeu kümtsü piti pühave.

³⁹ Kughou timiqo no ti ithulu keno, panongu no agi pishiqhope ayeghi lo ikiqi no pi, “Ampeu ye Alhou; Ampeu ye Alhoue,”

⁴⁰ Elijah no panongu vilo pi, “Baal tungkupmi küghalu khavelo; panongu lakhimu phepupo kevilo.” Timiqo no panongu küghaluve, eno Elijah no panongu sasü Kishon ghoki lo ilo no kümtsü ghiqhi khave.

Ampeu no Tsütsüghu Puwu

⁴¹ Elijah no Ahab vilo pi, “Wuno chushove lo, kughengu tsüqhu-tsüghu woche keu sütsa chilu ani.”

⁴² Ikehu Ahab no chusho niye wuve. Elijah no Carmel Tolo iqho no pa kütsü pesü akhonhe dolo süno pishiqhope ayeghi lo itsaqi.

⁴³ Pa no pa qeu vilo pi, “Wuno azüghi küdau jupuwo julo.” Aqeu no juve no ideighi püzü pi, “Ni ye kiumu ithulu amoe.” Pa no ghuthu tsüni kutolo, “Itaghi wujulo,” ipi.

⁴⁴ Eno akütsüniu loye pa no ideighi no pi, “Julo azüghi küdau no timi u pahi khüngküsü phoipe cheni.” Pa no pi, “Wuno Ahab vilo pilo, ‘Tsütsüghu no o vekhave nosake ow khurkulu kuto no iqive lo.’”

⁴⁵ Ti piwo kushuo kumo lo khüngküsü ngo amülhü no atsütsü nhapho luve eno tsüqhu-tsüghu ighive. Ahab no paw khurkulu sasü Jezreel lo wuve.

⁴⁶ Ampeu küka Elijah shou ighive no pa no pa phi pesü achita khapu luve no Ahab züuno posü Jezreel lo wuve.