KUKAMI ATUGHIU 17 - Sumi Naga CL (Re-edited) Bible (BSI)

Elijah eno Züha

¹ Gilead lo Tishbemi Elijah no Ahab vilo pi, “Ampeu Israel Lhou xüküau, I no huthu chekeu je lono pi ani, I tsa lono kumo aye, hithiu ampe hami dolo atsüzü na tsütsüghu namu ighimoae.”

² Tileno Ampeu tsa pa lau ighi:

³ “Hileno cheve no kipela küdau Jordan kipelau Kherith ghoki phivilo itshüve lo.

⁴ No ye aghoki tipau zü yelo eno agha pelo o loji penike I no azah tsüvae.”

⁵ Ikehu pa no wuno Ampeu tsa kiqi lono Jordan kipelau Kherith ghoki phivilo ngove.

⁶ Agha no ina-kijili asho ngo ashi pa lau süghitsü eno aghoki lono azü sho ae.

⁷ Ado hami thiu aghakhu lo tsüghu move kehu aghoki no qhaive.

Zarephath lo Achimeu

⁸ Tileno Ampeu tsa Elijah lau ighi,

⁹ “Ithu no Sidon lo Zarephath lo wulo eno tilau ngo aghilo. I no achimeu lakhi vilo o loji lopi azah tsüvae.”

¹⁰ Ikehu pa no Zarephath lo wuve, eno kughou pa no khagho lo ighi keno, achimeu huye asü kiche cheghi. Pa no li vilo pi, “Azübohu lono azü kitila I no yenike süghi tsülo.”

¹¹ Li no süghini ye wuche kelono pa no itaghi pi, “Asho ghi hami süghi tsülo.”

¹² Li no khochile, “Ampeu o Lhou je lono pi anike ni ye asho kunuve keu kühae, ikemu ashomkhu au kichhi lakhi ani eno thazü kitila abohu lo ani. Itehi ni ye asü kichepe ilo no I nu nikujo ghenguno kutope chuve no tithiu ye thiniae.”

¹³ Ikemu Elijah no pi, “Amlosa kevilo, wuno nono pike toi shilo, ikemu atüghüshi tipau pesü asho aghulo lakhi mlape I lau süghilo eno tithiu no achili aghikeu pesü o nu nokujo sala kutolo.

¹⁴ Kughengu Ampeu Israel Lhou no ishi piani, ‘Ampeu no tsütsüghu akiniu puwu moke kutolo, abohu lo ashomkhu pepühave monani eno ajukhu lo thazü kümsa shivemo nani.’”

¹⁵ Li no Elijah no pike toi shi. Eno li kibo ngo Elijah ye atsala kutomo kutolo chulue.

¹⁶ Ampeu no Elijah vecheo pike toi abohu lo ashomkhu pepühave moe eno ajukhu lo thazü kümsa shivemoe.

Achimeu Nu Xüputhu

¹⁷ Hipa thiu atopuu, aki mpeu, nu ye ighono sükütüve no atuthu kühave.

¹⁸ Li no Elijah vilo pi, “O Alhou timi, no ye I shou kiu shi ani kea? No ye I pelo I xine kümsüchile luno I nu pithive niye I lau ighi anino lae!”

¹⁹ Pa no li vilo pi, “O nu I tsülo,” Eno pa no li u lono anu khape kunguu chebo khile pa no ngo akeno, tilau pa züa lo püzüve.

²⁰ Pa no Ampeu lau ighamku, “O Ampeu I Lhou, No ye achimeu hipau nu ghi pithive tsüno amhekiqi li lau süghitsü ani keshea?”

²¹ Tishino pa no ghuthu küthü anu shou ikuno ighamku, “O Ampeu I Lhou, anu hipau küxü tsüchile tsülo.”

²² Tileno Ampeu no Elijah kighini ini tsü, eno aküxü tuthu ye anu lau ideighive.

²³ Elijah no anu sasü iqighi no pa za vilo pi, “Julo, o nu ye xüluvae.”

²⁴ Atopuu no Elijah vilo pi, “No ye Alhou timi kepi itehi ye I no ithivae, eno Ampeu tsa o kichi lo akeu ye kuchoue.”