KUKAMI ATUGHIU 16 - Sumi Naga CL (Re-edited) Bible (BSI)

¹ Ampeu tsa Hanani nu Jehu vecheo Baasha shou ishi ighi,

² “I no ayeghimkhu lono o süqhepe Iw timi Israelmi shou sakipheu shipe kelaye no ye Jeroboam toi xüuve no Iw timi Israelmi pelo axine shipe, eno panongu xine no I mlo shikighide tsüke.

³ Julo, I no Baasha eno pa kibolomi xupe pühave tsüni, eno Nebat nu Jeroboam lau shike toi o lau ghi shitsüni.

⁴ Baasha kibolomi khukhumu aphughi lono thive keu ye atsüqo no chuve peni eno aluza lono thive keu ye aghauqo no chuve peni.”

⁵ Baasha kümla kütau eno pa no kiu shi keno, pa kumto ghili kümtsü Israel Kükami Yekikithi Kaku lo yepüani ke kumo keshea?

⁶ Baasha ye pa puasüqo gholo zühuve eno Tirzah lo qhove. Pa nu Elah no pa thisü luve.

⁷ Tinguno alau, Ampeu tsa Hanani nu Jehu tungkupu vecheo Baasha ngo pa kibolomi lau ighikeu ye pa no Jeroboam kibolomi toi Ampeu zülo axine shikeu lono Pa mlo shikighide tsü, eno pa no Jeroboam kibolomi kütsave kehue.

Elah no Israel lo Kalu

⁸ Judah kükau Asa yepe mpe muku akütsüghou lono Baasha nu Elah no Israel shou ayepelu, eno pa ye Tirzah lono Israelmi shou ampe kini ayepe.

⁹ Ikemu pa qeu, khurkulu ghüshimi tüxa shou zatsüu Zimri no pa shou küsüqe. Eno pa no Tirzah lo kükaki kheu Arza kilo shomzü ake lono

¹⁰ Zimri no iloghi no pa pithive, ti ye Asa yepe mpe muku akütsüniu lono ke.

¹¹ Kughou pa no kükalakhü lo iqaluve no ayepe thu keno, pa no Baasha kibolomi kümtsü pithive tsü. Pa no kiptimi thaqhü eno pa küsami kümtsü pithi khave.

¹² Ampeu tsa tungkupu Jehu vecheo Baasha shou pipuku keu kiqi lono, Zimri no Baasha kibolomi kümtsü kütsave.

¹³ Ti ye Baasha ngo pa nu Elah pama xine ghenguno eno pama xine no Israelmi ghi axine lo sailove no Ampeu Israel Lhou mlo shikighide tsüke ghenguno.

¹⁴ Elah kümla kütau eno pa no kiu shi keno kümtsü Israel Kükami Yekikithi Kaku lo yepüani ke kumo keshea?

Zimri no Israel lo Kalu

¹⁵ Judah kükau Asa yepe mpe muku akütsüniu lono Zimri no Tirzah lono atsala tsüni ayepelu. Israelmi ghüshimi ye Philistiami phughi Gibbethon khasüpe ae.

¹⁶ Ghüshimi no ishi chilu, “Zimri no küsüqe no akükau pithivae.” Ikehu Israelmi kümtsü no aghazü lono ghüshimi zatsüu Omri pesü Israel kükau shiluve.

¹⁷ Ikehu Omri ngo Israelmi kümtsü no Gibbethon lono wo Tirzah khasü luve.

¹⁸ Kughou Zimri no aphughi lewo chekeu ithulu keno, pa no posü kükaki alou sükusho-a lo ilo ami süve no pa ghi ami lono pitiqhive.

¹⁹ Hi ye pa no Ampeu zülo axine shikeu, Jeroboam toi xükeu, eno pa no axine shikeu lono Israelmi ghi axine shipe keu ghenguno ke.

²⁰ Zimri kümla kütau eno pa no küsüqe keu ye Israel Kükami Yekikithi Kaku lo yepüani ke kumo keshea?

Omri no Israel lo Kalu

²¹ Israelmi ye amqo kini kijeve. Tüxa no Ginath nu Tibni pelo akükau shipeni shive eno aqo tüxa no Omri gholo cheke.

²² Ikemu Omri papeche keqo no Tibni papemi theqhive. Tibni ye thive eno Omri no akükau shive.

²³ Judah kükau Asa yepe mpe shighi aqhaqhiu lono Omri no Israel lo ayepelu. Pa no ampe chighikini ayepe kelo ampe tsügho ye Tirzah lono ayepelu.

²⁴ Pa no ghükayi ahu 70 pesü Shemer ipikeu launo Samaria toghi qhüluve no atoghi homxa aliwo shive, eno tipau phughi pesü ti ampeu Shemer je lono Samaria ipi kuvetsü.

²⁵ Omri no Ampeu zülo achipi kumo shi, eno pa züumi nguno alau axine shike.

²⁶ Kughengu pa no Nebat nu Jeroboam toi xüuve no pa xine lono Israel ghi axine shivepe eno ti ajulho mlla keu xine no Ampeu Israel Lhou mlo shikighide tsüke.

²⁷ Omri kümla kütau eno aküka kumto pa no piye keqo ye Israel Kükami Yekikithi Kaku lo yepüani ke kumo keshea?

²⁸ Omri ye pa puasüqo gholo zühuve eno Samaria lo qhove. Pa nu Ahab no pa thisü luve.

Ahab no Israel lo Kalu

²⁹ Judah kükau Asa yepe mpe shighi akütacheu lono Omri nu Ahab no Israel shou ayepelu, eno pa ye Samaria lono ampe muku kini ayepe.

³⁰ Omri nu Ahab ye pa züumi kümtsü nguno alau Ampeu zülo alhoksa shi xüe.

³¹ Nebat nu Jeroboam toi xükeu ye züla ketoi pa no Sidon kükau Ethbaal nonga Jezebel luve no Baal mlla eno huthuuve.

³² Pa no Baal kümllaki Samaria lo shiqhe keu lo akiptia mlatsüe.

³³ Eno Ahab no Asherah julho ghi mlae. Pa ye pa züumi Israel kükami kümtsü nguno alau Ampeu Israel Lhou mlo shikighide tsüe.

³⁴ Pa küka ghuloki lono Bethelmi Hiel no Jericho shiqhe kithe. Ampeu no Nun nu Joshua vecheo pipüa ketoi Hiel no aboqha mla akelono pa nu anoghiu Abiram küxü kühave, eno pa no khagho mla akelono pa nu anipau Segub thive.