KUKAMI ATUGHIU 15 - Sumi Naga CL (Re-edited) Bible (BSI)

Abijam no Judah lo Kalu

¹ Akükau Jeroboam yepe mpe chighiakütacheu lono Abijam no Judah lo ayepelu.

² Pa ye Jerusalem lono ampe küthü ayepe. Pa za ye Abishalom nga Maacah.

³ Pa sü David toimo no pa pu toi axine kümla kümtsü pa no shi, eno pa mlo kuchopu pesü Ampeu pa Lhou tsümoe.

⁴ Ikeghi David ghenguno Ampeu pa Lhou no pa shelo ayepe no Jerusalem iqhikumto penike anu lakhi pa tsükeu lono akulu lakhi Jerusalem lo qhitsü,

⁵ kughengu David ye pa küxü tivilo Ampeu zülo achipiu likhi shi, eno Hittimi Uriah vehu lo kumo aye Pa no azah tsükeu hebidemoe.

⁶ Abijam küxü tivilo Rehoboam ngo Jeroboam dolo aghü shiche.

⁷ Abijam kümla kütau eno pa no mlakeu kümtsü Judah Kükami Yekikithi Kaku lo yepüani ke kumo keshea? Abijam ngo Jeroboam pama dolo aghü shiche.

⁸ Abijam ye pa puasüqo gholo zühuve eno David phughi lo pa puasüqo gholo qhove. Eno pa nu Asa no pa thisü luve.

Asa no Judah lo Kalu

⁹ Israel kükau Jeroboam yepe mpe amkuu lono Asa no Judah lo kalu.

¹⁰ Pa ye Jerusalem lono ampe lhobidi ayepe. Pa za ye Abishalom nga Maacah.

¹¹ Pa pu David toi Asa ye Ampeu zülo achipiu shi.

¹² Pa no aghakhu lono achineki lo kiptimi kütüqhami eno pa puasüqo no ajulho mlakeu kümtsü ikhive tsü.

¹³ Pa no pa za kükaliu Maacah ghi ikhive, kughengu li no Asherah lhou lau aphikümqhüpu julho mlake. Asa no ajulho tipau loqhive no Kidron Khila lono pitive.

¹⁴ Ikemu qhemghai ke-aqo ye ikhimoe. Ikeghi Asa ye pa küxü tivilo Ampeu lau aghokulu shie.

¹⁵ Pa no pa puw eno paw akimthe gho ikhiphepe Alhou tsükeu kümtsü, eno ghükayi, ameshoyi, eno abohuqo Ampeu kilo qhive.

¹⁶ Asa ye pa küxü tivilo Israel kükau Baasha sasü aghü shiche.

¹⁷ Baasha no Judah lethuve eno Ramah phughi shiqhe, tishikeu lono Judah kükau Asa lau ipe-iloni keu kümtsü lakhave tsü.

¹⁸ Tileno Asa no Ampeu kilo eno kükaki lo akini küakini ghükayi eno ameshoyi kümtsü pa qemi u lo sütsü no Damascus lo Hezion nu Tabrimmon nu Syria kükau Ben-hadad lau puwu no pipe,

¹⁹ “Nikujo papu dolo visho aketoi nikujo dolo ghi apelo. I no ghükayi ngo ameshoyi pesü agho o tsüpuwu ani. Ikehu Israel kükau Baasha lau visho shipüa keu xachileve lo, tishiaye, pa ye I launo idewove nani.”

²⁰ Ben-hadad no ti chilu no paw ghüshimi zatsümi pesü Israel phughi hipaqo levepe, Ijon, Dan, Abel-beth-maacah, eno Chinneroth gholo Naphtali yeghi kümtsü.

²¹ Kughou Baasha no ti chilu keno, pa ye Ramah phughi shimove no Tirzah lo xüuve.

²² Tileno Akükau Asa no Judah yeghi kümtsü lo khumu qhimo no azah tsü kelo kümtsü no Ramah lo ighi no Baasha no Ramah shiqhe akeu lono atu ngo asüpa pewuve tsü. Tipaqo pewo Benjamin ghakhu lo Geba ngo Mizpah shiqheve.

²³ Akükau Asa kümla kütau, pa kumto kümla eno pa no kiu shi keno kümtsü Judah Kükami Yekikithi Kaku lo yepüani ke kumo keshea? Ikemu pa teasü loye pa pukhu lo aküsü ikughive.

²⁴ Asa ye pa puasüqo gholo zühuve eno pa pu David phughi lo pa puasüqo gholo qhove. Eno pa nu Jehoshaphat no pa thisü luve.

Nadab no Israel lo Kalu

²⁵ Judah kükau Asa yepe mpe akiniu lono Jeroboam nu Nadab no Israel lo ayepelu, eno pa ye Israel lo ampe kini ayepe.

²⁶ Pa ye Ampeu zülo axine shi, eno pa pu laghi lo chewu no pa xine no Israel sasü axine lo ilove.

²⁷ Issachar laghami Ahijah nu Baasha no Nadab shou küsüqe. Eno Nadab no Israelmi kümtsü sasü Philistiami phughi Gibbethon le kelono Baasha no Nadab pithive.

²⁸ Judah kükau Asa yepe mpe aküthüu lono Baasha no pa pithive no pa züqhulo kaluve.

²⁹ Pa no akükau shive kemtsa Jeroboam kibolomi kümtsü pithive tsü. Ampeu no Shilohmi Pa qeu Ahijah vecheo pikeu kiqi lono Jeroboam kibolomi lakhimu ghümono kütsa khave.

³⁰ Hi ye Jeroboam no Ampeu, Israel Lhou mlo shikighide tsükeu lono ke, pa no axine shive no Israel ghi axine shipeke.

³¹ Nadab kümla kütau eno pa no kiu shi keno kümtsü Israel Kükami Yekikithi Kaku lo yepüani ke kumo keshea?

³² Asa ngo Baasha küxü tivilo aghü shikile ache.

Baasha no Israel lo Kalu

³³ Judah kükau Asa yepe mpe aküthüu lo Tirzah lono Ahijah nu Baasha no Israelmi kümtsü shou ayepelu, eno pa ye ampe muku bidi ayepelu.

³⁴ Pa ye Ampeu zülo axine shi, eno Jeroboam küxü gholau no xüno pa xine lono Israel ghi axine shipeke.