KUKAMI ATUGHIU 14 - Sumi Naga CL (Re-edited) Bible (BSI)

Jeroboam shou Tungkuptsa

¹ Tipa ghuloki lo Jeroboam nu Abijah ye süuve.

² Jeroboam no pa nipu vilo pi, “No ye Jeroboam nipu kepi ithi pemo kepushi o küsüuno no Shiloh lo tungkupu Ahijah khuu no I vilo ni ye timi hipaqo shou akükau shi nanie pi keno, pa lau wulo.

³ Ashopa chighi eno akungo sho gholo akhingozü abohu lakhi ishi pesü wulo. Pa no o vilo anu ye kiu shive nani keno pitsü nani.”

⁴ Li no titoi shino Shiloh lo Ahijah kilo ighi. Ahijah ye kitemi shive kehu pa nhethi ye züuve.

⁵ Ampeu no Ahijah vilo pi, “Julo, Jeroboam nipu no li nu sü akeu ghenguno o vilo ighiju niye cheni. No ye hitoi shi li vilo pini.” Kughou li no ighi keno, li ye topumi kütami toi ighi.

⁶ Ikemu li no ahukikha lo ighi kelo Ahijah no pi, “Iloghi lo, Jeroboam nipu. No ye kushiye kütami toi shi ani kea? Ni ye o ghenguno asütsa lhoksa ani.

⁷ Wuno Jeroboam vilo pilo, ‘Ampeu Israel Lhou no ishi piani: “I no timiqo gholono o süqhe no Iw timi Israelmi sakipheu shipe

⁸ eno David lagha lono kükaqha kothape o tsü. Ikeghi no ye I qeu David toi shimoe, pa ye I zakütsüqo pelu eno pa mlo kuchopu no I pape no I zülo kiu no achipi keno tilikhi shie.

⁹ Ikemu no ye o züumi kümtsü nguno alau axine kije shivae eno I milive no o sala kütau lhou ngo ayi julho mlakeu lono I mlo shikighide tsüke.

¹⁰ Tighenguno julo, I no shiküpsa Jeroboam kibo lo süghi no pa lagha lo kiptimi, aqüaxemi na ililai akemi namu, I no pithive tsüni. Timi no amishiba piti pühave ketoi I no Jeroboam lagha piti pühave tsüni.

¹¹ Jeroboam laghami khukhumu aphughi lono thivekeu ye atsüqo no chuve nani eno khuu no no aluza lono thiveni keno aghauqo no chuve nani, kughengu Ampeu no pivae.”’

¹² Tighenguno o kilo wovelo. Kughou o pukhu no aphughi lo nesüni keno, anu ye thive nani.

¹³ Israelmi kümtsü no pa ghenguno mloqa no pa shiqho nani, kughengu Jeroboam lagha lo pa likhi no Israel Lhou Ampeu mlo piqilu kehu pa sükumo likhi no shiqholu nani.

¹⁴ Tinguno alau, Ampeu no Pa sala Israelmi shou akükau lakhi kishephe pa no ishi tsala lono Jeroboam lagha kishekhave tsü nani. Hinguno hilau ye,

¹⁵ aghoki lo amtübo sükini aketoi Ampeu no Israel ghime no ayeghi kivi khikhi pano puasüqo tsü keno, tileno panongu nhüpe Euphrates nguno hulau apanagha puwuve nani, kughengu panongu no Asherim mlakeu lono Ampeu mlo shikighide tsüke.

¹⁶ Jeroboam xine huno Israelmi pelo axine shivepe kehu Pa no Israel qhive nani.”

¹⁷ Tileno Jeroboam nipu no wuve no Tirzah lo ideighi. Li no aki lo iloghi kemtsa anu thive.

¹⁸ Ampeu no Pa qeu tungkupu Ahijah vecheo pikeu kiqi lono, Israelmi kümtsü no mloqa eno pa shiqhove.

Jeroboam Kithi

¹⁹ Jeroboam no mlakeu, pa no kishi aghüshi eno ayepe chekeno, Israel Kükami Yekikithi Kaku lo yepüani.

²⁰ Jeroboam yepe mpe ye muku kini. Pa ye pa puasüqo gholo zühuve eno pa nu Nadab no pa thisü luve.

Rehoboam no Judah lo Kalu

²¹ Solomon nu Rehoboam ye apunu mpe lhobidi lakhi lono Judah lo ayepe thu eno Jerusalem lono ampe chighitsüni ayepe. Jerusalem ye Ampeu no Pa je ghenguno Israel shiaye kümtsü dolono kishelu keu phughi. Rehoboam pa za ye Ammonmi Naamah.

²² Judah timiqo no Ampeu zülo axine shikeu lono Ampeu mlo shikighide tsü, eno pano puasüqo nguno alau axine shive.

²³ Panongu no pano ghenguno atoghi eno asübo kümtsü lo qhemghai ke-a, atsükucho, eno Asherim mlape qhi,

²⁴ eno aghakhu lo achineki lo kiptimi kütüqhami ghi ache. Ampeu no Israel zülono shiye hapheve keqo no aphikümqhüpu kümla shiche keqo kümtsü panongu no pape.

²⁵ Rehoboam yepe mpe apunguu lo Egypt kükau Shishak no Jerusalem leighi.

²⁶ Pa no Ampeu kilo eno kükaki lo küakini eno thokha kümtsü pewuve tsü. Pa no Solomon no mlakeu ameshoyi züto ghi kümtsü pewuve tsü.

²⁷ Tipaqo theli lo Akükau Rehoboam no alazayi zütoqo mla, eno akükau ki khemi kijemi pelo ti jukütsü penike picheve tsü.

²⁸ Akükau no Ampeu kilo iloke kümtsü aghukheu no azüto pesü wuche eno tithiu itaghi pewo aghukhe chebo lo qhiveche.

²⁹ Rehoboam kümla kütau pa no mlakeu kümtsü Judah Kükami Yekikithi Kaku lo yepüani ke kumo keshea?

³⁰ Rehoboam ngo Jeroboam dolo ishokibe aghüshi che.

³¹ Rehoboam ye pa puasüqo gholo zühuve eno David phughi lo pa puasüqo gholo qhove. Pa za ye Ammonmi Naamah. Eno pa nu Abijam no pa thisü luve.