KUKAMI ATUGHIU 12 - Sumi Naga CL (Re-edited) Bible (BSI)

Rehoboam Mbomzü

¹ Rehoboam ye Shechem lo wuve, kughengu Israelmi kümtsü no Shechem lono pa pesü akükau shinike hekütsü ae.

² Kughou Nebat nu Jeroboam no ti chilu keno (pa ye Solomon msano Egypt lo pove keu tikutolo tilau ngoae), pa no Egypt lono ideighive.

³ Panongu no pa kupuwu kehu Jeroboam ngo Israelmi kümtsü no Rehoboam lau ighi no pi,

⁴ “O pu Solomon no ighono ni ghime püani. Tighenguno itehi o pu ghime kümla ngo paw kuokhasü kimshi ni launo kümthü tsülo, tishi aye nino o qeni.”

⁵ Pa no panongu vilo pi, “Atsala küthü thiuno I lau ideighilo, I no nongu vilo pini.” Ikehu panongu no wuve.

⁶ Akükau Rehoboam no pa pu Solomon gholo mla chekemi layemi lau akükümsü lu, “Timi hipaqo khochileni ke nongu ye I mije tsüni kea?”

⁷ Panongu no pi, “Nono ishi no aqeu toi timi hipaqo huthu no atsa kivi pesü khochile aye, panongu ye alhokuthu o qemi shiniae.”

⁸ Ikemu pa no layemi kükümsü lumove no lhothemi pa sasü kümtsa xüighi no pa gholo akemi kükümsüu luve.

⁹ Pa no panongu vilo pi, “Timi hipaqo no I vilo, ‘O pu no ni xapipe keu kho kümthü tsülo,’ ipi akeu lo nongu ye kiu kükümsü pesü I tsüni kea?”

¹⁰ Lhothemi pa sasü kümtsa xüighi keqo no pi, “Timi khunoqo no o vilo, ‘O pu no ni xapipe keu kho kümthü tsülo,’ ipi keno, tipaqo vilo pilo, ‘I uloti anipau huno I pu luko nguno shishoi ani.

¹¹ I pu no ape kimshi nongu xapipe keu gholo I no küpha tsüni. I pu no akighikipili pesü nongu sakiyi püaghi aye, I no khurshi kihe küsü no nongu heqhini.’”

¹² Ikehu atsala aküthüni Jeroboam ngo timiqo kümtsü no akükau Rehoboam no, “Atsala aküthüni no ide ighilo,” ipikeu kiqi lono ideighi.

¹³ Akükau no layemi kükümsü lumove no ighono mkamihi timiqo khochile,

¹⁴ lhothemiqo no pa vilo pikeu kiqi lono pa no pi, “I pu no ape kimshi nongu xapipe keu gholo I no küpha tsüni. I pu no akighi kipili pesü nongu sakiyi püaghi aye, I no khurshi kihe küsü no nongu heqhini.”

¹⁵ Ikehu akükau no timiqo tsa initsü move, kughengu ti ye Ampeu no Nebat nu Jeroboam vilo tungkupu Ahijah Shilohmi vecheo pikeu tsa shikupu niye ke.

Kükaqha Kijeve

¹⁶ Kughou akükau no Israelmi kümtsü tsa initsü move keu ithive keno, panongu no pa khochile, “David launo ni saje kiu ani kea? Ningu ye Jesse nu launo amheghi kiumu kühae. O Israel, pütüta pusho lo wovelo! David, o lagha julo.” Ikehu Israelmi no pütüta pusho lo wove.

¹⁷ Rehoboam no Israelmi Judah mishighünaqo lo akemi shou ayepe.

¹⁸ Akükau Rehoboam no anguka kümlami shou ampeu Adoram hape Israelmi lau puwu, ikelo Israelmi no atu pesü pa veqhi pithive. Ikehu Akükau Rehoboam no mtazü paw khurkulu lo ikuno Jerusalem lo pove.

¹⁹ Tileno ishi kutolo Israelmi ye David kibolomi sasü kumgho acheni.

²⁰ Kughou Israelmi kümtsü no Jeroboam ye Egypt lono ideighivae pi keu chilu keno, panongu no pa kupuwu no aqo hoho lono pa pesü Israelmi kükau shive. Judah shiaye likhi no David laghami pape wuve.

²¹ Kughou Rehoboam no Jerusalem lo ighi keno, pa no Israel lagha sasü aghü shino kükaqha luchileve niye Judah ngo Benjamin shiaye lo ghüshimi kishekiphe lakh lakhi no qhethonhe lhotache kukütsü.

²² Ikemu Alhou tsa no Alhou timi Shemaiah lau ishi ighi:

²³ “Judah kükau Solomon nu Rehoboam eno Judah ngo Benjamin shiaye kümtsü vilo pilo,

²⁴ ‘Ampeu no ishi piani, nongu ye no thiküzümi Israelmi sasü aghü shiwu moni. Kümtsü no pütüta kilo wovelo, kughengu hipa vehu ye I launo ke.’” Ikehu panongu no Ampeu tsa gholu no aki lo idewo khave.

Jeroboam no Ameshoyi Mishiti Mlla

²⁵ Jeroboam no Ephraim ato yeghi lo Shechem phughi shiqhe no tile xüche. Pa no tileno Penuel phughi ghi shiqhe.

²⁶ Jeroboam no pa mlo lono kümsü, “Itehi kükaqha ye David kibo lo idewove niae.

²⁷ Timi hipaqo no Jerusalem lo Ampeu chineki lono aghakishi tsüniye wu aye, panongu mlo ye Judah kükau Rehoboam lau idewove nani, eno panongu no I pithive no Rehoboam lau idewove nani.”

²⁸ Ikehu akükau no akükümsü luno ameshoyi mishiti julho kini mla, eno timiqo vilo pi, “Nongu ghenguno ado shulo Jerusalem lo wu ighivae. O Israel, nongu lhou Egypt lono nongu saipeghi keu julo.”

²⁹ Pa no lakhi no Bethel lo, eno lakhiu no Dan lo qhitsü.

³⁰ Ikelo hi no axine shive kughengu timiqo no Dan kutolo wuno tipau zülo mllauve.

³¹ Pa no atoghiqo lo akümlla-a mlano Levi kumomi pesü achinemi shi süsüve.

³² Judah lo shiche ketoi Jeroboam no aqhi akütacheu, atsala chighiapunguu lo aghulhu pini kepu tsala kughu no akümlla-khache lono aghakishi mlla. Titoi pa no Bethel lo amshiti julho lau aghashi, eno tilau atoghiqo lo akümlla-a lo achinemi süsüe.

³³ Aqhi akütacheu atsala chighiapunguu, pa mlo lono kughuphe keu qhi, lono pa no Bethel lo akümlla-khache lo iqho, eno Israelmi ghenguno aghulhu huthu phetsüe.