KUKAMI ATUGHIU 10 - Sumi Naga CL (Re-edited) Bible (BSI)

Sheba Kükaliu

¹ Kughou Sheba kükaliu no Solomon jekipi eno Ampeu sasü kütshükime chekeu chilu keno, li no kushokütsü ighikuju tsa pesü pa pejuni ke ighi.

² Li gholo apapemi kütsasa ighi, sayeshi lono tsüngqüikeu mukhu, ameshoyi kutomo, eno akughupu tu xapu Jerusalem lo ighi no li no amlo lo puchekeu kümtsü Solomon vilo pi.

³ Solomon no liw ighikuju tsa kümtsü khochile tsü, eno akükau no li khochile mlave keu kiumu kühae.

⁴ Kughou Sheba kükaliu no Solomon lokütsü kümtsü chilu eno pa no kükaki shikeu ithulu keno,

⁵ pa ghulhu lüpa lo achuqupu, paw hiyampemi lakhü, pa qemiw hukuthu ghola, panongu phimini, pa jukhu kipemi, eno pa no Ampeu kilo akipti kümllagho tsükeu kümtsü ithulu kelo, li ye atuthu kühave.

⁶ Li no akükau vilo pi, “I no ni ghakhu lono o tsa eno o lokütsü ghili chilu keqo ye kuchou kena,

⁷ ikemu I no ighi no I nhethi no ithulu moke kutolo ni ye pülümoe. Ikelo julo, tüxamu I vilo pimo kena. Kughengu o lokütsü ngo küakini ye I lau asütsa ighi keu nguno alau ani.

⁸ Ow timiqo lokivipue! O qemi lokivipue! Kughengu panongu ye alhokuthu o zülo puthugho no o lokütsü tsa ini acheni!

⁹ Ampeu o Lhou shelo, Pa no o shou amlokiqi shi no o pesü Israel kükalakhü lo qhike! Kughengu Ampeu no alholo Israel kimiye ke ghenguno Pa no o pesü akükau shike, tishikeu lono o pelo achipiu eno amikucho shi peniye ke.”

¹⁰ Tishino li no ameshoyi ahu 4,000 shou, tsüngqüikeu mukhu kütsasa eno akughupu tuqo pesü akükau tsü. Sheba kükaliu no Akükau Solomon tsükeu jehi khilemu ithulu püamoe.

¹¹ Tinguno alau, Hiram zükilu, khikhi Ophir lono ameshoyi süghi keno, tino almug sü ngo akughupu tuqo kutomo süghi.

¹² Akükau no almug sü pesü achineki eno kükaki lo aküptasü shi, eno alephemi sala akighilebo mlatsü. Almug sü titoi ke ishi kutolo khilemu ighi momu ithulu movae.

¹³ Akükau Solomon no Sheba kükaliu no khukeu kümtsü tsü, akhuaye kiqi lono akükau no tsükeu nguno alau ghi li no khukeu kümtsü pesü tsüe. Tishino li ngo li qemi ye pano yeghi lo idewove.

Solomon Küakini

¹⁴ Ampe lakhi lo Solomon ye ameshoyi ahu 25,000 shou ithuluche,

¹⁵ tipau gholo ameshoyi kuphumi, alhikishimi, kulolau kükami, eno Israel yeghi lo anghqo launo ighiche.

¹⁶ Solomon no ameshoyi pesü azüto kijeje 200 mla; azüto lakhi khilo ameshoyi ahu tsüni no mla.

¹⁷ Pa no azüto 300 mla; azüto lakhi lo ameshoyi ahu kini no mla. Azüto hi kümtsü Lebanon Ghasü kilo qhive.

¹⁸ Akükau no akühahu kükalakhü ghi kije mla eno thakimtheve keu ameshoyi no küzüve.

¹⁹ Kükalakhü ye anepa tsügho ae, eno tipa zübo lo amshiti kütsü julho shisüpe qhi. Alakhü putoputo lo au kibepu mlano ti küma phivilo abongshuu no puthugho akeu julho ghope qhi.

²⁰ Abongshuu chighikini no anepa tsügho hula hila qhie. Hitoi keu khuno kükaqha lomu mla püamoe.

²¹ Solomon jukhu kümtsü ameshoyi no mla, eno Lebanon Ghasü Kilo qhikeu khu ajukhu kümtsü ameshoyi no mlae. Ghükayi no shikeu nhemgha lakhimu qhimoe, kughengu Solomon ghuloki lo ghükayi ye ameküküha shi kihive.

²² Kughengu akükau ye Hiram zükilu gholo pa zükilu kutomo ache eno ampe aküthükü lo paw Tarshish zükiluqo no ameshoyi, ghükayi, akühahu, ashuki, eno awughidu, ishi xapu ighiche.

²³ Ikehu Akükau Solomon ye ayeghi lo kükami kümtsü nguno akiniu eno alokütsüu shive.

²⁴ Ayeghi kümtsü lono Alhou no pa mlo lo sütsü keu lokütsü inini ke ighiche.

²⁵ Ighi kemi kümtsü no agho jeli ghükayi, ameshoyi, aphimini, myrrh thazü, tsüngqüikeu mukhu, khurshi, khurgha, ishi ampe atsütsü pa tsüche.

²⁶ Solomon no khurkulu ngo khurshimi hekütsü jukelo khurkulu 1,400 eno khurshimi 12,000 aghi. Pa no khurkulu phughi lo kutokughoi pe qhi eno khami ye Jerusalem lo pa gholo qhive.

²⁷ Pa no Jerusalem lo ghükayi pesü atu toi balha shivetsü eno cedar sübo no Shephelah lo tüküthibo toi kupukuno shitsüe.

²⁸ Solomonw khurshiqo ye Egypt ngo Kue lono süghiche eno ti ye pa lhikishimi u lono ame lono süghi che.

²⁹ Khurkulu ye Egypt lono ghükayi ahu 6 eno khurshi no ghükayi ahu 2 lono qhüche. Ikehu akükau lhikishimi vecheo tipaqo ye Hittimi ngo Syria kükami lau ghi tsüpuwu che.