KUKAMI AKINIU 9 - Sumi Naga CL (Re-edited) Bible (BSI)

Israel Kükau Jehu Kishelu

¹ Elisha no tungkupmi loji lo lakhi kuno pa vilo pi, “Aphimini akivishi pepusü thazü külabo hipau pesü Ramoth-gilead lo wulo.

² Nono ti tokelo Nimshi nu Jehoshaphat nu Jehu phulo. Pa lau wuno pa küsami gholono pa kütashi sasü achebo alou ilolo.

³ Tishino thazü külabo pesü pa kütsü lo lepuku no pilo, ‘Ampeu no ishi piani, I no o pesü Israel kükau shi nukishe ani.’ Tishino ahukikha khaqhi no mtazü ngomo no povelo.”

⁴ Ikehu tungkupu qeu alhotheu no Ramoth-gilead lo wuve.

⁵ Kughou pa no ighi keno, ghüshimi zatsümi no hoho küküptsa shi aghi. Pa no pi, “O zatsüu, ni ye o ghenguno asütsa ani.” Jehu no pi, “ningu khuu lau kea?” Pa no khochile, “O pütsa ani, O zatsüu.”

⁶ Ikehu pa no ithu no aki lo ilove. Alhotheu no thazü pesü pa kütsü lo lepuku tsüno pi, “Ampeu, Israel Lhou no ishi piani, I no o pesü AMPEUw timi, Israelmi shou akükau shi nukishe ani.

⁷ No ye Ahab o mpeu kibolomi heqhive masae, tishikeu lono Jezebel no pithive keqo I qemi tungkupmi ngo Ampeu qemi kümtsü ghenguno I no amkhü lunie.

⁸ Ahab kibolomi kümtsü püghave masae eno I no Ahab lagha lo kiptimi thaqhü, aghoshi xüche kemi na aqüaxemi namu Israel lono pühave tsüni.

⁹ I no Ahab kibolomi pesü Nebat nu Jeroboam kibolomi ngo Ahijah nu Baasha kibolomi toive tsü nani.

¹⁰ Eno Jezebel ye khunomu kumo shiqhomo no Jezreel ghakhu lono atsüqo no chuve nani.” Hipaqo pive no pa ye ahukikha khaqhi no pove.

¹¹ Kughou Jehu no pa mpeu qemi lau ipeghi keno, panongu no pa vilo pi, “Thokha achipi shi anima? Hi anikhau ye kushiye o lau ighi kea?” Pa no pi, “Nongu no timi eno pa tsapi ithi ani.”

¹² Panongu no pi, “Ti ye kuchou kumoe, itehi ningu vilo pilo.” Pa no pi, “Hitoi pa no I vilo pi, ‘Ampeu no ishi piani, I no o pesü Israel kükau shi nukishe ani.’”

¹³ Ikelo tile timi kümtsü no mtazü pano phiküzü xape pa pukhu lo qhatsü, eno no afuko igha sheshu, “Jehu no Akükau shivae.”

Joram ngo Ahaziah Heqhive

¹⁴ Ikehu Nimshi nu Jehoshaphat nu Jehu no Joram pithive nike küsüqe thuve. (Joram ye Israelmi kümtsü sasü Ramoth-gilead süsho ghi Syriami kükau Hazael sasü kumjo ae,

¹⁵ ikemu akükau Joram ye Syriami kükau Hazael sasü aghüshi ake lono Syriami no pa ghüzave kehu, viluve niye Jezreel lo idewove ke.) Ikehu Jehu no pi, “Hi no nonguw xakütha shi aghi aye, khunomu mishighüna heche ipe no Jezreel lo asütsa hipau kütüghü wu kevilo.”

¹⁶ Tishino Jehu no khurkulu lo ikuno Joram no akulho qhi ake-a Jezreel lo wuve. Judah kükau Ahaziah ghi pa pütsa niye tile iqi ngoa ae.

¹⁷ Aghukheu no Jezreel qoghe lono pishipuwo Jehu ngo paw timiqo cheghi keu ithulu kehu ighi no pi, “Timi mqo lakhi chekeu I no ithulu ani.” Joram no pi, “Khurshi lono milakhi puwu no pa pelo panoqo kusho no pi pelo, ‘Külakishi vehu kema?’”

¹⁸ Timi huno khurshi lono pa kusho luno pi, “Akükau no ishi piani, ‘Külakishi vehu kema?’” Jehu no pi, “No ye külakishi vehu lo kiu shikepu ani kea? Tsüghüve no I papelo.” Aghukheu no kütüghü, “Atsapeu ye panongu kusholu kemu idewo chemoe.”

¹⁹ Itaghi pa no khurshimi akiniu puwu no pipe, “Akükau no ishi piani, ‘Külakishi vehu kema?’” Jehu no khochile, “No ye külakishi vehu lo kiu shikepu ani kea? Tsüghüve no I papelo.”

²⁰ Itaghi aghukheu no kütüghü, “Atsapeu ye panoqo kusholu kemu idewo chemoe, eno khurkulu sache keu jukelo Nimshi nu Jehu no toi ani, kughengu pa ye alhoaye lono khurkulu mqhumzai sachenie.”

²¹ Joram no pi, “Kutope ngolo.” Panongu no paw khurkulu kutove tsü. Tishino Israel kükau Joram ngo Judah kükau Ahaziah pama no pütüta khurkulu lo ikuno Jehu sasü kusho niye wu, pama no Jezreelmi Naboth yeghi lono pa sasü kusholu.

²² Kughou Joram no Jehu kusholu keno pa no pi, “Külakishi vehu kema, Jehu?” Jehu no khochile, “O za Jezebel no kütüqha eno tumumi no hijeje ake thaqhülo kiu külakishi anani kea?”

²³ Tileno Joram no Ahaziah vilo ishi pive no pove, “Hi ye pishikiqhie, O Ahaziah!”

²⁴ Jehu no pa kumto kümtsü süno paw shexilika kapuwu no Joram bighi dolo vesüve tsükelo apiji no pa mlo vepilive tsü eno pa ye paw khurkulu lo ikiqive.

²⁵ Jehu no pa gholo kicheu Bidkar vilo pi, “Pa kumo ikhipe Jezreelmi Naboth lu lo vesüve lo. Kughengu nikujo kümtsa papu Ahab gholo chekelo Ampeu no kishi Ahab shou atsa pipuku keno kümsülu lo:

²⁶ ‘Ighina I no Naboth ngo pa nuli ji pele keu ithulue—Ampeu no sheshu—I no alu hipau lono o lochile nani.’ Tighenguno itehi, Ampeu tsa kiqi lono Joram kumo ikhipe Naboth lu lo vesüve tsülo.”

²⁷ Kughou akükau Ahaziah no hi ithulu keno, pa ye Beth-hagan küdau pove. Jehu no pa hasü wuno pi, “Pa ghi veqhive lo.” Panongu no Ibleam phivilo Gur lo iqho chekeu la lono paw khurkulu lono ghüzave. Ikemu pa ye Megiddo lo posü wuve no tilau no thive.

²⁸ Pa qemi no pa kumo khurkulu lono Jerusalem lo xapughi eno David phughi lo pa puasüqo gholo pa kumoki lo qhove.

²⁹ Ahab nu Joram yepe mpe chighiaqhaqhiu lono Ahaziah no Judah lo akükau shiluve.

Jehu no Jezebel Pithive

³⁰ Kughou Jehu no Jezreel lo ighi keno, Jezebel no chiluve. Li no anhethi nupuve eno akütsü msapuve no alashe lono juae.

³¹ Jehu no khagho hechesü iloghi kelo li no pi, “No Zimri, O mpeu hekiqhiu, külakishi kema?”

³² Pa no pishipuku juno pi, “Khuu no I küdau ania? Khuu no kea?” Shoko kinia küthüa no pishipipe pa ju.

³³ Pa no pi, “Hilau li vepiqive lo.” Ikehu panongu no li vepiqive. Li ji no atozü ngo khurshiqo shou küza pukuve, eno panongu no li nedasü wuve.

³⁴ Pa no ilo no chushove, eno pi, “Ghukushou atopuu sükumo shiqhove tsülo, kughengu li ghi akükau nonga ke.”

³⁵ Ikemu kughou panongu no li sükumo shiqho niye wu keno, li boghe eno apukhu ngo au thono kütau kiumu ithumlave.

³⁶ Panongu no ideighi no pa vilo pi kelo pa no pi, “Hi ye Ampeu no pa qeu Elijah, Tishbemi vecheo pi püakeu tsa shivae, ‘Atsü no Jezreel ghakhu lono Jezebel sükumo chuve nani,

³⁷ eno Jezebel sükumo no Jezreel luza lo tübatüzü toi apanaghave no khunomu, Hi ye Jezebel, ipi mlave nani.’”