KUKAMI AKINIU 8 - Sumi Naga CL (Re-edited) Bible (BSI)

Shunemmi Aza Yeghi Tsüchile

¹ Elisha no aza khuu nu xüputhu tsü keno, li vilo pa no pi, “Ithulo, eno kibolomi sasü khile khilemu ado hami ghenguno ngo kepushi wuve lo, kughengu Ampeu no hipa ghakhu lo ampe tsüni püqümiye puwuni cheni.”

² Ikehu li no ithu Alhou timi no pikeu kiqi lono wuve. Li no akibolomi sasü Philistia lo ampe tsüni ngove.

³ Ampe tsüni thiu kughou li no Philistiami yeghi lono ighi keno, li no li ki-alu tsüchile penike akükau lau wu.

⁴ Akükau ye Elisha qeu Gehazi sasü küptsa aghi, “Elisha no akümzapu kümla shikeqo I vilo pilo.”

⁵ Pa no akükau vilo Elisha no kishi akithi lono aküxü shivetsü keno lhe akelono aza khuu nu Elisha no xüputhu tsü keno, li no akükau lau ighi no li ki eno ayeghi tsüchileve lopi qhüiniju. Gehazi no pi, “O akükau, I mpeu, aza khuu nu Elisha no xüputhuve tsü keno hi chenie.”

⁶ Kughou akükau no aza vilo ighiju keno li no pa vilo pive. Tileno akükau no li ghenguno kijemi lakhi kuno pi, “Liw kiu ani keno tipau gholo li no wuveke tsalani no ishi kutolo, tüxatini kiu ipeghi keno, kümtsü tsüchileve lo.”

Hazael no Ben-hadad Pithive

⁷ Elisha no Damascus lo ighi kelo Syriami kükau Ben-hadad ye süae. Kughou, “Alhou timi ye hilau ighi ani,” ipi pa vilo pi keno,

⁸ akükau no Hazael vilo pi, “Agho pesü wuno Alhou timi pütsalo eno pa vecheo Ampeu vilo ighiju lo, ‘Ni ye aküsü hipau lono viluve nanima?’”

⁹ Ikehu Hazael no Damascus lono mlaphe keu thime kivi sayeshi lhobidi xapipe no Elisha lau wu. Kughou Hazael no pa lau ighi no pa zülo puthugho keno, pa no pi, “O nu Ben-hadad Syria kükau no I puwu no pi ani, ‘Ni ye aküsü hipau lono viluve nanima?’”

¹⁰ Elisha no khochile, “Wulo, pa vilo pilo, ‘No ye viluve nani,’ ikemu Ampeu no I lau piyeve ake pa ye thive niae.”

¹¹ Tishino Hazael no kujove moke kutolo pa no thüghüi pa ju. Alhou timi no mloqauve.

¹² Hazael no pi, “I mpeu ye kushiye qa ani kea?” Pa no khochile, “Kughengu nono Israelmi lau akümla lhoksa shiniye akeu I no ithivae. Nono pano liwo pitive tsü nani, azütakikihi no panow apumiqo ghiqhive nani, itimiqo aleqhi shi vedaqhive nani eno topumi mishipu akeqo kive ghixüve tsü nanie.”

¹³ “O qeu ye kiu kea, pa ye atsü ke kishino akümla kije hitoi keu shiluni kea?” ipi Hazael no pi. Elisha no khochile, “Ampeu no I piyeve ake nono Syria lo akükau shive nani.”

¹⁴ Tishino pa ye Elisha launo wuve eno pa mpeu lau ighi kelo pa mpeu no pi, “Elisha ye kiu pi kea?” Pa no khochile, “No ye viluve nanie pi pa no pie.”

¹⁵ Ikemu thoghiu ye pa no uküzüphi azü lo pütsü no akükau gi nhavetsü, eno akükau no thimoke kutolo tishi qhive. Tishino Hazael no pa-a lo Syriami kükau shiluve.

Joram no Judah lo Kalu

¹⁶ Ahab nu Joram, Israel kükau yepe mpe apunguu lo, Judah kükau Jehoshaphat nu Jehoram no Judah lo akükau shiluve.

¹⁷ Pa ye apunu mpe shighi kini shia eno Jerusalem lono ampe tache ayepelu.

¹⁸ Ahab kibolomi no shike toi pa ghi Israel kükami xine laghi pape, kughengu pa nipu ye Ahab nonga ke. Pa ye Ampeu zülo kiu no axine keno ti shike.

¹⁹ Ikeghi Pa qeu David ghenguno Ampeu no Judah kütsaveni shimoe, kughengu Pa no alholo ghenguno akulu pesü David ngo pa nuliqo tsünike tushoqhi ke.

²⁰ Jehoram ghuloki lono Edom no Judah sasü kumjo ipeghi no pano kükau süsüve.

²¹ Jehoram no paw khurkuluqo sasü katha iku Zair lo wu. Pa no putho lono paw ghüshimi shou zatsümi sasü Edommi pa bothape akeqo ghiqhive, ikemu paw ghüshimi ye aki lo posü wove.

²² Ikehu ishi kutolo Edommi ye Judah sasü kumjo acheni. Tipa ghuloki lono Libnah ghi Judah sasü kumjo ipeghive.

²³ Jehoram kümla kütauqo ye Judah Kükami Yekikithi Kaku lo yepüani ke kumo keshea?

²⁴ Tishino Jehoram ye, David phughi lo pa puasüqo gholo zühuve eno pa nu Ahaziah no pa thisü luve.

Ahaziah no Judah lo Kalu

²⁵ Ahab nu Joram, Israel kükau yepe mpe chighiakiniu lono Joram nu Ahaziah no Judah lo akükau shilu.

²⁶ Ahaziah ye apunu mpe muku kini shi akelono ayepe thu, eno Jerusalem lono ampe lakhi kalu. Pa za ye Athaliah, eno li ye Israel kükau Omri tilimi.

²⁷ Pa ghi Ahab kibolomi laghi lo chewuve, eno Ahab kibolomi no shike toi Ampeu zülo kiu no axine keno ti shike, kughengu pa ye Ahab kibolomi makishiu ke.

²⁸ Pa no Ahab nu Joram gholono Syria kükau Hazael sasü aghü shiniye Ramoth-gilead lo wu, tileno Syriami no Joram ghüzave.

²⁹ Akükau Joram no Syria kükau Hazael sasü Ramah lono aghü shike lono Syriami no pa ghüzave kehu viluve niye Jezreel lo idewove. Eno Jehoram nu Ahaziah, Judah kükau ghi chesü Jezreel lo Ahab nu Joram no izave kehu pütsa niye iqie.