KUKAMI AKINIU 7 - Sumi Naga CL (Re-edited) Bible (BSI)

Elisha no Achuqupu Tsa Piqhi

¹ Ikemu Elisha no khochile, “Ampeu tsa ishi piani inilo: Thoghiu hipa ghuloki lo nongu no Samaria khagho lo ashomkhu akiviu ahu küthü lo ghükayi lakhi no qhülu nani, eno ashothi ahu tsügho lo ghükayi lakhi no qhülu nani.”

² Tile Kepten khuu bighi lo akükau no mungupe akeno, pa no Alhou timi vilo pi, “Alhou ampi no kungugha lo alasheqo mlani ke kumo aye, hi ye shilu nani keshea?” Ikemu pa no pi, “Nono o nhethi no ti ithulu nani, ikemu no ye ti chulumo nani.”

Syriami Ghüshimi no Pove

³ Tipa ghuloki lo timi bidi apüghami khagho khalau ngoa. Panongu dolo ishi küptsa kile, “Kushiye ningu ye thimoke kutolo hile ngo ani kea?

⁴ Ningu no, ‘Ningu mishighüna lo iloni,’ ipi aye püqümiye no mishighüna lo ani, eno ningu ye tilauno thive nani. Ningu no hile iqa anamu tighi thive nani. Ikehu ningu Syriami ghazü lo wuni shilo. Panongu no ni püxütsü aye ningu ye xülu niae; ni heqhive namu ningu ye thive niae.”

⁵ Ikehu züghüi ake lono panongu no ithu Syriami ghazü lo wuve, ikemu panongu no aghazü phivilo ighi kelo khumu kühave aghi.

⁶ Kughengu Ampeu no Syriami ghüshimi pelo khurshi ngo khurkulu eno ghüshimi kutomo chekeu ghügha toi chilupe kehu panongu dolono ishi pikile, “Julo, Israel kükau no Hittimi ngo Egypt kükami pelo ningu sasü aghüshi penike piqevae.”

⁷ Ikehu panongu ye züghüi ake lono pano ghazü eno khurshi ngo khurhaqo qhive no pano küxü xaluni ke pove.

⁸ Kughou apüghami no aghazü phivilo ighi keno, panongu no aphiki lakhi lo ilo no chushove, eno ghükayi ngo ameshoyi eno aphimini pewo küsüve. Tishino panongu no ideighi no aphiki kütau lono tinhemgha pewo küsüve.

⁹ Panongu dolo ishi pikile, “Ningu ye achipi shiamoe. Atsala hipau ye asütsa kivi tsalae. Ningu no inaqhoi tsüküvü kuto kheve aye, aghime no ni shou ikughi niae. Tighenguno itehi shilo, ningu wuno akükau kibolomi vilo piveni.”

¹⁰ Panongu no mishighüna khagho khemi lau ighi no pi, “Ningu no Syriami ghazü lo ighi kelaye kümsa shive aghi, eno khurshi ngo khurhaqo tshü püaghi no aphikiqo patho aghi keu kumo aye kiumu ithumla momu chimlae.”

¹¹ Tile khagho khemi no hipau sütsa pesü akükau kibo lo kütüghüve tsü.

¹² Akükau no putho lono ithu no pa qemi vilo pi, “Syriami no kiu kughu ani keno I no nongu vilo pini. Ningu no püqü akeu panongu no ithi ani. Tighenguno panongu ye itshü niye pano ghazü qhive no aluza lo wuve no kümsü ani, ‘Kughou panongu no mishighüna lono ipeghini keno, ningu no aküxü no panongu kügha luveni eno aphughi leluveni.’”

¹³ Pa qemi lakhi no pi, “Timi khami pelo khurshi achili pungu akeu sasü ipeju pelo. Panongu no avesave namu hile akemi veküsa toi atho shinani. Ningu timi puwu no juni.”

¹⁴ Ikehu panongu no khurshimi kini kuluve, eno akükau no Syriami ghüshimi lau puwu no pi, “Wuno julo.”

¹⁵ Pama no Jordan kutolo wukelo alaghi kümtsü aphimini ngo aghünanu Syriami no poche kelono qhive keu ithulu. Pama no ideighi no akükau vilo pive.

¹⁶ Tithiu timiqo no ipeghi no Syriami ghazü kümtsü lheluve. Ampeu no pike toi ashomkhu akiviu ahu küthü lo ghükayi lakhi eno ashothi ahu tsügho lo ghükayi lakhi no je.

¹⁷ Akükau no kepten khuu shou mungu chekeno, pa pelo khagho jukütsüpe. Akükau no Alhou timi lau iqighi kelono pa no akükau vilo pike toi timiqo no kepten nedaqhi pithive.

¹⁸ Kughengu kughou Alhou timi no akükau vilo, “Samaria khagho lo thoghiu hipa ghuloki lo ashothi ahu tsügho lo eno ashomkhu akiviu ahu küthü lo ghükayi lakhikhi lono je nani,” ipi keno,

¹⁹ Kepten huno Alhou timi khochile ke, “Alhou ampi no kungugha lono alashe mlani ke kumo aye, hi ye shilu nani keshea?” Eno pa no ishi pipüae, “Nono o nhethi no ti ithulu nani, ikemu no ye ti chulumo nani.”

²⁰ Kuchono pa lau titoi shive, kughengu khagho lono timiqo no nedaqhi no pa ye thive.