KUKAMI AKINIU 6 - Sumi Naga CL (Re-edited) Bible (BSI)

Amüghü Ithukulu

¹ Ghulo lakhi tungkupmi loji no Elisha vilo pi, “Julo, nono ampi shi akeu ki ye ningu ghenguno tülalovae.

² Ningu pelo Jordan lo wuno asü pewo ningu no ngokepu ki shilu pelo.” Pa no pi, “Wulo.”

³ Panongu gholo lakhi no pi, “Kimiyeno o qemi gholo wu tsülo.” Pa no khochile, “Ni ghi wuni.”

⁴ Ikehu pa no panoqo sasü wu, eno Jordan lo ighi no asüboqo yeqhi thuve.

⁵ Milakhi no asübo yeqhi akelono amüghü azü lo hejo süve kehu pa no ighamku pi, “Aha, hi ye nape ighi ani kelaye.”

⁶ Alhou timi huno pi, “Khile ikiqi ilove kea?” Kughou pa no pheqhive ke-a kichetsü keno, Elisha no asü lakhi michepe ti ilove ke-a lo vesü kelaye amüghü hu yipe ashou ipeghive.

⁷ “Ikhiphe luve lo,” ipi pa no azah tsü, eno timi huno ikhiphe luve.

Ami Khurshi ngo Khurkuluqo

⁸ Ghuthu lakhi Syriami kükau no Israelmi sasü aghüshi akehu akükau no paw kijemiqo pütsa no pi, “A-a hipaqo lo I ghazü shini.”

⁹ Ikemu Alhou timi no asütsa Israel kükau lau pi puwu, “A-a tipau katha kevilo, kughengu Syriami no tilau iqi cheni.”

¹⁰ Israel kükau no a-a khikhi Alhou timi no kichetsü keno ti kheluve pe. Titoi pa no akükau kütüghü che, ikehu akükau ye ghuthu lakhi kini pa ampi süsholue.

¹¹ Hi ghenguno Syria kükau ye ighono amlo pünave, eno pa qemi kukütsü no pi, “Nongu khuu no Israel kükau saphu ani kea?”

¹² Panongu lakhi no khochile, “Ningu khunomu kumoe, O akükau, I mpeu, ikemu Elisha tungkupu khuu Israel lo acheni keno, pa no nono tuqhouno o züabo lono pikeu tsaqo pe akükau vilo pive cheni.”

¹³ Tile pa no pi, “Wuno pa khile ani keno phujulo, tishianguno I no timi puwu no pa kügha saghi peni.” Ikelo pa vilo asütsa tsü, “Julo, pa ye Dothan lo ani.”

¹⁴ Ikehu pa no ghüshimi kutomo gholo khurshi ngo khurkuluqo puwu no tipaqo no putho lono mishighüna boluve.

¹⁵ Thanau inaqhe Alhou timi qeu no ithu khalau ipeghi kelo ghüshimi no khurshi ngo khurkuluqo sasü mishighüna bope aghikeu ithulu. Pa no pi, “Aha, I mpeu! Ningu ye kishiveni kea?”

¹⁶ Elisha no pi, “Msa kevilo, kughengu panongu gholo chekemi ye, ni laumi pachi ani.”

¹⁷ Tishino pa no inikhu, “O Ampeu, kimiyeno pa nhethi xükho tsüno pa pelo ithulu pelo.” Ampeu no aqeu nhethi xükho tsü, eno julo, atoghi lo ami khurshi ngo khurkuluqo no Elisha homxape aghikeu ithulu.

¹⁸ Kughou Syriami no pa lethu keno, Elisha no Ampeu vilo inikhu, “Kimiyeno timi hipaqo nhethi kighicheve tsülo.” Ikehu Elisha kighini kiqi lono Ampeu no pano nhethi kighicheve tsü.

¹⁹ Elisha no panongu vilo pi, “Nongu ye alaghi kumo lo cheni, eno hi ye nongu no leniye chekeu mishighüna kumoe. I papelo eno I no nongu no phuche keu timi lau sawuni.” Pa no panongu sasü Samaria lo wuve.

²⁰ Panongu no Samaria to kemtsa, Elisha no pi, “O Ampeu, timi hipaqo nhethi xükho tsüno ithulu pelo.” Ikehu Ampeu no panongu nhethi xükhotsü eno panongu no ithuluve, ikelo panongu ye Samaria lo aghive.

²¹ Kughou Israel kükau no panongu ithulu keno, pa no Elisha vilo pi, “I pu, I no panongu heqhive nio? I no panoqo heqhiveni keshea?”

²² Pa no khochile, “Moe, no ye aghüshi lono o zütakikihi ngo shexilika pesü akughumi shi küghalu keqo pithiveni keshea? Asho ngo azü pesü panoqo tsülo, eno panongu pelo chusho no pano mpeu lau idewo pelo.”

²³ Ikehu pa no panoqo ghenguno aghulhu kije kutotsü, panongu no tsaqütsalei chushove kethiu pa no puwove, eno panongu no pano mpeu lau wove. Tithiu Syriami ye Israel yeghi leighi move.

Ben-hadad no Samaria Khasü

²⁴ Ghulo kütau Syria kükau Ben-hadad no paw ghüshimi kümtsü hekütsü sasü iqho Samaria khasü luve.

²⁵ Panongu no khasü luve kehu Samaria lo püqümiye kije ighive, eno khurha kütsü lakhi lo ghükayi 80, amiqhi ba yetsüni tushoqü lakhi lo ghükayi 5 lono jeuve.

²⁶ Israel kükau no aliwo lo chekelo topumi lakhi no ighamku pi, “O Akükau, I mpeu, I kuphu tsülo!”

²⁷ Pa no khochile, “Ampeu no o kuphu tsümo aye, ni ye kishi o kuphu luni kea? Athi kütsüghü-a lono keo, atsaizü kütsüghü-a lono o kuphu lopi kea?”

²⁸ Akükau no pi, “No ye kiu no shilusa ani kea?” Li no khochile, “Topumi hipau no I vilo piani, ‘Ningu ishi no o nu heqhipe chunike tsülo, eno thoghiu no I nu heqhipe chunie.’

²⁹ Ikehu nikujo küqhano I nu lho chuvae. Eno thoghiu ye I no li vilo pi, ‘O nu chu kepushi, tsülo.’ Ikemu li no anu küsüve.”

³⁰ Kughou akükau no hi chilu keno, pa no aphi süxüve, pa ye aliwo lo che kehu timiqo no jukelo, pa ye yeqhiyephi alou pepu cheghi.

³¹ Pa no pi, “Shaphat nu Elisha kütsü no pa bighi shou akeloye Alhou pelo ishi tsala lono hitoi I lau shipeniu.”

³² Elisha ye pa kilo layemi sasü ngo ae. Tile akükau no timi lakhi hapuwu, ikemu atsapeu no Elisha lau ighi mphi lono Elisha no layemi vilo pi, “Nongu ye hi timi hekiqhiu no kishi I kütsü luve tsüniye timi puwu ani keno ithi anima? Kughou atsapeu no ighini keno, ahukikha khave lo eno tsatsai tudape ngoluve lo. Pa mpeu pukhu sütsa pa thiuno ighi nanike kumo keshea?”

³³ Pa no pi aphi lono, atsapeu no pa lau iqighi no pi, “Aküküpna hipau ye Ampeu launoe! Ni ye kushiye Pa kheani kea?”