KUKAMI AKINIU 5 - Sumi Naga CL (Re-edited) Bible (BSI)

Apüghau Naaman Shipivi

¹ Syria kükau ghüshimi shou zatsüu, Naaman ye pa kükau zülo akighichemi eno amlo kuchuu lakhi, kughengu Ampeu no pa vecheo tokulu pesü Syriami tsüe. Pa ye aghütomi ikemu apügha puche.

² Syriami no Israelmi leighi kelono anga lakhi Israel lono sawuve eno Naaman nipu qeliu shive.

³ Li no li mpeliu vilo pi, “I mpeu pelo Samaria lo ache keu tungkupu lau wu penishi nolae! Pa ye pa pügha shipivive tsü nanie.”

⁴ Ikehu Naaman no wuno pa mpeu vilo pi, “Israel lono ighi keu anga no hitoi pike.”

⁵ Syria kükau no pi, “Itehi wulo, eno I no Israel kükau lau yesü tsü puwuni.” Ikehu Naaman no ghükayi ahu qhethonhe chighibidi, ameshoyi ahu 66 eno aphimini küzüli kepu chighi pesü wuve.

⁶ Pa no yesü ishi yepüa keu pesü Israel kükau tsü, “Kughou yesü hipau no o toni keno, o pelo I qeu Naaman apügha lono shipivi tsü penike I no o lau puwu anie pi ithi tsülo.”

⁷ Israel kükau no yesü philu kelo pa phi süxüve no pi, “Ni ye Alhou keo, pithive eno püxülu nani kesheno kushiye timi hipau ye apüghau shipivi tsülopi I lau atsa pi puwu ani kea? Hi kümsüju lo, pa ye I sasü kumgho niye amqü shi ani.”

⁸ Ikemu kughou Israel kükau no pa phiküzü süxüve keu Alhou timi Elisha no chilu keno, pa no akükau lau pi puwu, “No ye kushiye o phiküzü süxüve ani kea? Timi hu I lau puwulo, tishianguno pa no Israel lo tungkupu akeu ithi nani.”

⁹ Ikehu Naaman no paw khurshi ngo khurkuluqo sasü Elisha hukikha lo ngove.

¹⁰ Elisha no atsapemi puwu no pi, “Jordan lo wuno ghuthu tsüni qhuvelo eno no ye athoputho luve no mithe luve nani.”

¹¹ Ikemu Naaman ye amlo idesü wuve no pi, “Julo, I no kümsü keu ye, pa ye vejoi I lau ipeghi no puthughope pa MPEU Alhou je ku püzü, pa u pesü apügha shou kihi tsüno shipivi tsü nani küghashi athono.

¹² Damascus ghoki Abana ngo Pharpar ye Israelmi zü kümtsü nguno akiviu ke kumo keshea? Ni ye ti küma lonomu qhuve no mithe luve nani ke kumo?” Ikehu pa no tsüghüwo amloidesü wuve.

¹³ Ikemu pa qemi no pa vilo pi, “I pu, tungkupu no o vilo kushokütsü tsa pinamu no ye shiveni cheke kumo? Pa ye o vilo, ‘Qhuve no mithe luve lo,’ ipike kumo keshea?”

¹⁴ Ikehu pa no Jordan lo iqi no Alhou timi no pikeu kiqi lono, ghuthu tsüni azü alou ilo pütsü, ikelo pa ye athoputho luve, pa phimpi no anga yiko toive, eno pa ye mithe luve.

Gehazi Lakimne eno Aghime

¹⁵ Tileno pa no paw timi kümtsü sasü Alhou timi lau ideighi no pa zülo puthugho no pi, “Julo, I no ithivae, Israel lo kumo aye, ayeghi kümtsü lo Alhou kühae; tighenguno itehi kimiyeno agho hipau o qeu launo ikhilu tsülo.”

¹⁶ Elisha no khochile, “Ampeu xüküau zülo I no puthugho anike ni ye kiumu lumoe.” Naaman no tsüikhomo pa tsü kemu pa no milive.

¹⁷ Ikehu Naaman no pi, “Tishimo aye kimiyeno o qeu pelo ayeghi khurgha pe kini pewolu pelo, kughengu itehi ye o qeu ghi alhou kütau lau aghakishi momu akipti kümllagho tsümono Ampeu lau likhi tsüniae.

¹⁸ Avehu hipau ghenguno Ampeu no o qeu kipimi qhitsü peni: kughou I mpeu no Rimmon chineki lo mllani ye iloni keno, pa no I bighi lo mungu no ni ghi ayeghi lo itsaqi masave kelo, hipau vehu lo Ampeu pelo o qeu kipimi qhitsü pelo.”

¹⁹ Elisha no pa vilo pi, “Aloino wolo.” Ikemu Naaman no pa launo kushuo lo wumphi lono,

²⁰ Alhou timi Elisha qeu Gehazi no pi, “Hi julo, I mpeu no Syriami Naaman hipau no peighi keu kiumu lumono pa püxüvae. Ampeu xüani ke I no pa hasü wuno pa launo kiuala mu luveni.”

²¹ Ikehu Gehazi no Naaman hawu. Kughou Naaman no pishipuwo timi lakhi pa hasü cheghi keu ithulu keno, paw khurkulu lono iqighi no pa vilo pi, “Thokha achipi shi anima?”

²² Pa no pi, “Thokha achipi shi ani. Ikemu I mpeu no I puwu no hi pilo pike, ‘Itehi no tungkupmi nu kini Ephraim toghi ghakhu lono I lau ighi ani. Kimiyeno ghükayi ahu 34 eno aphiküzü atüna kini ishi pama tsülo.’”

²³ Naaman no pi, “Ahu 60 lulo.” Tishino pa no tsüikhomo ghükayi ahu 60 aphikumsho kini lo süvetsü, aphiküzü atüna kini kutope pa qemi kini pelo Gehazi züu shino wupe.

²⁴ Kughou pa no atoghi lo ighi keno, pa no pama u lono aphikumsho luve no aki alou peilo qhive eno timi pama puwuve.

²⁵ Tishino pa no aki lo ilo pa mpeu zülo puthugho, tile Elisha no pa vilo pi, “No ye khila wuve kea, Gehazi?” Pa no khochile, “O qeu ye khilamu wumoe.”

²⁶ Ikemu pa no pi, “Timi huno paw khurkulu lono iqighi no o sasü kusholu kelo, I mlo ye o gholo wuke kumo keshea? Ti ye pisa ngo aphimini, olive ghutu ngo atsailu, ambe ngo amshitsü, aqemi ngo aqelimi luke ghuloki keshea?

²⁷ Tighenguno Naaman pügha ye alholo ghenguno no eno o lagha shou ikughi niae.” Ikehu pa ye apügha no mürasü kimiye toi xapusü Elisha launo wuve.