KUKAMI AKINIU 4 - Sumi Naga CL (Re-edited) Bible (BSI)

Elisha eno Achimeuw Thazü

¹ Tungkupmi loji lo milakhi nipu achimeu no Elisha vilo ighamku pi, “O qeu, I kimi ye thivae, eno nono ithi anike o qeu ye Alhou sümsa chekemi, ikemu pa no timi lakhi pi puakeu huno ighi püzü I nu pama aqemi shi penike sawuve niye ani.”

² Elisha no pi, “O ghenguno ni ye kiu shitsü lopi kea? I vilo pilo. No ye aki lo kiu ani kea?” Li no pi, “O qeu ye abohu lo thazü kitila akeu kumo aye kiumu kühae.”

³ Ikehu pa no pi, “Wuno o kisüghümi vilo abohu kümsaqo khupe ighilo, eno tülalo kevilo.

⁴ Tithiu o nu pama sasü aki khatha ilove no thazü pesü ti abohuqo lo lesülo. Lakhi pichhive kemtsa, ti kütashi qhive ghi shilo.”

⁵ Li no pa launo wuve eno anu pama sasü ahukikha khasü alou ilove. Eno anu pama no abohu pesü ighi keqo lo li no lesüthu.

⁶ Kughou abohuqo shepichhive keno, li no anu pama vilo pi, “Abohu kütau süghi lo.” Anu no pi, “Abohu kütau kühavae.” Tileno thazü no iqighi move.

⁷ Li no Alhou timi lau ighi no pi kelo pa no pi, “Wuno thazü jepe o piashe kümtsü lovelo, eno achili pesü o nu pama sasü ililai xülu nani.”

Elisha ngo Shunem lo Atopuu

⁸ Ghulo lakhi Elisha ye topumi kinimi lakhi achekeu phu Shunem lo wu. Li no alibe chu penike pa kusü, eno tinguno tilau pa ye Shunem lo wuke kümtsü lo li kilo wuno alibe chuche.

⁹ Li no li kimi vilo pi, “Hi julo, timi khuu alhokuthu ni katha acheni keno, pa ye Alhou timi kepi I no ithi ani.

¹⁰ Nikujo kunguu jolha lo achebo aghulo lakhi kuto tsüno alüpa, akibepu, alakhü, eno akulu kutope qhitsüni, tishianguno pa no ni xuju ighi kelo tile ngopeni.”

¹¹ Ghulo lakhi pa no tile ighi kelo, achebo tile ilo no akulhoqhi.

¹² Pa no pa qeu Gehazi vilo pi, “Shunemmi aza kulo.” Kughou li no ighi no pa zülo puthugho keno,

¹³ pa no Gehazi vilo pi, “Itehi li vilo pilo, ‘Julo, nono ni ghenguno thokha amakho puluve tsüake o ghenguno kiu shitsü lopi kea? No ye I pelo akükau momu ghüshimi shou akijeu vilo o züqhushi atsa kivi pitsü penishi ani keshea?’” Li no khochile, “Ni ye niw timiqo gholo küghüna anike kumu kumoe.”

¹⁴ Elisha no Gehazi vilo pi, “Imaye li ghenguno kiu shitsüni kea?” Pa no khochile, “Li ye anu kühae, eno li kimi ye velami shivae.”

¹⁵ Pa no pi, “Li kuchile lo.” Kughou pa no li ku keno, li no ahukikha kulaghi lo puthughove.

¹⁶ Pa no pi, “Toku hipa ghuloki lo no ye anu lakhi khape nani.” Li no pi, “Moe, I mpeu, O Alhou timi; o qeliu pishiqhi kevilo.”

¹⁷ Ikemu Elisha no pi ketoi, tokuu tipa ghuloki lo li ye kiptimi lakhi punuve.

Elisha no Anu Xüputhu

¹⁸ Kughou anu no asatheve keno, ghulo lakhi pa ye papu lau ghile kuhumi gholo wue.

¹⁹ Pa no papu vilo pi, “O, I kütsü, I kütsü sü anie!” Apu no aqemi lakhi vilo pi, “Anu khape paza lau sawove lo.”

²⁰ Kughou aqemi no anu khape paza lau ighi keno, anu ye li lukobo lo puchomta kutolo züve, tishino pa ye thive.

²¹ Li no pa khapesü kunguu ikuno Alhou timi lüpa lo qhino ahukikha khave no ipeve.

²² Tishino li no li kimi ku püzü pi, “Aqemi lakhi pelo khurha sasü hilau ighi pelo, I no mtazü Alhou timi lau wuno ighini.”

²³ Li kimi no pi, “No ye kushiye ishi no pa lau wu masa kepu shive kea? Ishi ye Sabbath momu aqhi kithe pine kumoe.” Li no khochile, “Kumu kumoe.”

²⁴ Tishino li no khurha shou iku iqave no li qeu vilo pi, “Lhoxü kite lo eno I no o vilo pimo keloye asheshi kevilo.”

²⁵ Li no chesü Alhou timi no akeu Carmel Toghi lo ighi. Kughou Alhou timi no li chekeu ithulu keno, pa no pa qeu Gehazi vilo pi, “Julo, Shunemmi hu cheni.

²⁶ Li lau posü huno pilo, ‘No ye thokha akivishi anima? O kimi eno o nu ye thokha akivishi anima?’” Li no khochile, “Thokha akivishi anie.”

²⁷ Kughou li no Alhou timi lau atoghi lo ighi keno, li no pa pukhu küghape ngove. Gehazi no li tuchile niye shi kemu Alhou timi no pi, “Palokuto lo, kughengu li ye ighono amlo küsashi ani eno Ampeu no hipau ghili I launo küsüve no kiumu pi püamoe.”

²⁸ Tile li no pi, “Ni ye I mpeu vilo anu khu keshea? Ni ye, ‘I pishiqhi kevilo’ ipike kumo?”

²⁹ Pa no Gehazi vilo pi, “O phimini pepuve lo eno I küsü ikhipe wulo. Khuana sholu namu pütsa kevilo, khuana no o pütsa namu khochile kevilo. Eno I küsü pesü anu gi lo bepe qhilo.”

³⁰ Anu paza no pi, “Ampeu xüani ke eno no xüani ke ni ye khilemu o phemoe.” Ikehu pa no ithu no li pape wuve.

³¹ Gehazi no azüushi wuno anu gi lo aküsü bepe qhitsü, ikemu asütsa küha momu aküxü michipu kühae. Tighenguno pa no idechile pa pütsa niye ighi no pi, “Anu ye ithughi mphie.”

³² Kughou Elisha no aki lo iloghi keno, anu no pa lüpa lo thi aghi keu pa no ithulu.

³³ Ikehu pa no alou ilo no ahukikha khave no Ampeu vilo inikhu.

³⁴ Tishino pa no alüpa lo ikuno anu shou zü, pa kichi, anhethi, eno au pesü anu kichi, anhethi eno au lo kithe ghi küvape ihozü. Pa no tishi kelaye anu phimpi no lüvüi ipeghive.

³⁵ Tileno pa no ithu no iqhoiqi eno itaghi anu vapezü. Ikelo anu no ghuthu tsüni hachhi shino anhethi tsükhove.

³⁶ Tithiu pa no Gehazi kuno pi, “Aza kulo.” Ikehu pa no li ku. Kughou li no iloghi keno, pa no li vilo pi, “O nu khapelu lo.”

³⁷ Li no ighi no pishiqhope pa pukhu philo ikiqi itsaqi, eno anu khapesü ipeve.

Akithipu Tüghü Shikimthe

³⁸ Kughou aghakhu lo püqümiye akeno, Elisha no Gilgal lo ighi. Tungkupmi loji no pa zülo iqa akelo, pa no pa qeu vilo pi, “Ali kije lono akulhozü shipe panongu piyelo.”

³⁹ Panongu gholo lakhi no aluza lo ayetsüni süghi niye wukelo aghasa lo akighibo lakhi ithulu no tipau lono apoxi kutomo xopughi, eno ti ye kiu keno mtha püzü yethape akulhozü lo süve.

⁴⁰ Tishino panongu no akulhozü lesüpe timiqo pelo ye peniye sütsü. Ikemu panongu no akulhozü ye akelono ighamku, “O Alhou timi, akulhozü lo akithipu ani!” Eno panongu ye chumlave.

⁴¹ Pa no pi, “Imaye ashomkhu süghilo.” Pa no ti pesü ali lo süno pi, “Timiqo pelo chu penike hami lephelo.” Ikelo kiumu shiküpsa kühave.

⁴² Ghuthu lakhi, Baal-Shalishah lono timi lakhi no athi amsüu sho, ashothi shopa muku, eno athi amsüu ashoghi lono pesü Elisha tsü. Elisha no pi, “Timiqo pelo chu penike tsülo.”

⁴³ Ikemu pa qeu no pi, “Kishino ni ye hi pesü timi 100 piqi zülo qhitsüni kea?” Pa no itaghi pikithe, “Timiqo pelo chu penike tsülo, kughengu Ampeu no ishi piani, ‘Panongu no chu nani eno itaghi achili hami ipeghi nani.’”

⁴⁴ Ikehu pa no panongu zülo qhivetsü. Ampeu tsa kiqi lono panongu no chuve no achili qhive.