KUKAMI AKINIU 3 - Sumi Naga CL (Re-edited) Bible (BSI)

Moab no Israelmi Mjochile

¹ Judah kükau Jehoshaphat küka mpe chighiakütacheu lo Samaria lono Ahab nu Joram no Israel lo akükau shiluve eno pa ye ampe chighikini ayepelu.

² Pa ye Ampeu zülo axine shi, ikemu papu ngo paza pama toi keu ye kumo, kughengu papu no Baal tsükucho shiqhe keu pa no kubove tsü.

³ Tishimu Nebat nu Jeroboam xine khikhino Israel pelo axine shivepe keno, pa no ti pape eno tipaqo launo wuvemoe.

⁴ Moab kükau Mesha ye ambe pighimi eno mpe atsütsü ambeti lakh lakhi eno ambetsü lakh lakhi mhi ghope Israel kükau sükusho süqha tsüche.

⁵ Ikemu kughou Ahab thive keno, Moab kükau no Israelmi kükau hebide thuve.

⁶ Ikehu akükau Joram no Samaria lono chesü Israelmi kümtsü hekütsü luve.

⁷ Pa no Judah kükau Jehoshaphat lau asütsa tsüpuwu, “Moab kükau no I sasü kumjo ani. No ye I gholo süno pa sasü aghü shini ma?” Jehoshaphat no pi, “Ni ye wuni. Nikujo ye atho, Iw timi no ow timi tho, eno Iw khurshiqo ye ow khurshiqo thoke.”

⁸ Tishino pa no pi, “Ningu ye khipa laghi lono wuni kea?” Joram no khochile, “Edom sayeqha lono wuni.”

⁹ Ikehu Israel kükau no Judah kükau ngo Edom kükau sasü chewu. Kughou panongu no atsala tsüni ala cheve keno, ghüshimi ngo pano papemi eno lhoxüqo ghenguno azü kühave.

¹⁰ Israel kükau no pi, “Aha! Ampeu ye kükami ni küthü kusawo Moab u lo süve tsüniye ani keshea?”

¹¹ Jehoshaphat no pi, “Hile tungkupmi lakhimu Ampeu lau küsütsa tsüni keu anima?” Tile akükau Joram qemi lakhi no khochile, “Shaphat nu Elisha khuu Elijah u lo azü shosü tsüche keno hile anie.”

¹² Jehoshaphat no pi, “Ampeu tsa pa lolo ani.” Ikehu Israel kükau ngo Jehoshaphat eno Edom kükau pano küthü no pa lau wue.

¹³ Elisha no Israel kükau vilo pi, “Ni ye kiu lono o vehupu shikepu ipeghi kea? O pu ngo o zaw tungkupmiqo lau wulo.” Ikemu Israel kükau no pa vilo pi, “Moe; Ampeu no kükami hi pano küthü ku phepe Moab kükau u lo süve tsüniye shi ani.”

¹⁴ Elisha no khochile, “Aqokitikhi MPEU xüani ke eno I no huthu achekeu je lono piqhi ani, Judah kükau Jehoshaphat aghi moke aye, ni ye nongu küdau mu jutsüni chemo momu pütsani chemoe.

¹⁵ Ikemu tishiaye alebo küighau lakhi hilau saghilo.” Kughou alebo küighau no alebo küigha keno, Ampeu küka pa shou ikughive.

¹⁶ Eno pa no pi, “Ampeu no ishi piani, ‘I no qhaike ghoki hipau azü no pichhive tsüni.’

¹⁷ Kughengu Ampeu no ishi piani, ‘Nongu ye tsütsüghu na amülhü namu ithulumo nani ikemu aghoki hipau lo azü no chhitoive no nongu, now pichepighi, eno lhoxüqo no yelu nani.’

¹⁸ Hi ye Ampeu zülo ye mlalei aphie. Pa no Moabmi ghi nongu u lo süvetsü nani,

¹⁹ eno nongu no aliwo kumto mishighüna ngo mishighüna kivi kümtsü leluve nani, asübo kivi kümtsü yeqhilu khave nani, azüpuki kümtsü mike luve nani, eno ayeghi kivi kümtsü atu pesü chhitoi ghesüpe qhivetsü nani.”

²⁰ Thanau inaqhe aghakishi kümllagho ghuloki lo Edom küdau no azü qoighi no aghakhu kümtsü pichhive tsü.

²¹ Kughou Moabmi kümtsü no kükamiqo no pano sasü aghü shiniye chenie pi chilu keno kichimi lono itimi kutolo aghünanu pukulumi thaqhü kuphepe alughi lo ngoluve.

²² Thanau inaqhe panongu no ithughi kelo khetsünhe no azü lo yesü aghi, eno Moabmi no pano ghüngü lo azü akeu aji toi huchuyi ithulu.

²³ Panongu no pi, “Hi ye aji; kükamiqo ye pano dolono heqhi pithi kileve akeniae. Itehi ye Moabmi no wuno xuleluni.”

²⁴ Ikemu kughou panongu no Israelmi ghazü tolu keno, Israelmi no ithu Moabmi ghiqhi thuve eno Moabmi pelo pano zülono povepe. Israelmi no Moabmi ghiqhisü azüu hawu.

²⁵ Panongu no mishighünaqo kütsave tsü, eno timi kümtsü pütüta müzülo atu pesü ayeghi kivi kümtsü lo vesüpe chhitoive tsü; panongu no azüpuki kümtsü mikeve tsü, asübo kivi kümtsü yeqhive tsü, eno ashekha loye Kir-hareseth lo atu likhive, tighi hevüla kighi kipemi no homxape leluve.

²⁶ Kughou Moab kükau no pa ye aghü tolu moveni chenipi ithive keno, pa no azütakikihi kipemi pano 700 sawu no Edom kükau ghüngü lono shoxüsü ipeni ye shi, ikemu shimlave.

²⁷ Tileno pa no pa nu anoghiu, pa thisü kepushi akeu pesü atupikiye lono akipti kümllagho shi agha shive. Ikelo Israelmi shou aloghu kije ikughive, eno panongu no pa launo idechilesü pano yeghi lo wove.