KUKAMI AKINIU 25 - Sumi Naga CL (Re-edited) Bible (BSI)

Judah Ikiqive

¹ Zedekiah yepe mpe atokuu aqhi achighiu eno atsala achighiu lono Nebuchadnezzar no paw ghüshimi kümtsü sasü ighi no Jerusalem lethuve no khasü luve. Panongu no ti homxa aqoghe shipukuve.

² Eno Zedekiah yepe mpe chighiaqhaqhiu kutolo mishighüna khasüve.

³ Aqhi abidiu, atsala atokuu lo aphughi lo püqümiye akumou shive eno aghakhu lo timiqo ye kiumu chukepu kühave.

⁴ Tileno aphughi liwo hephove eno Chaldeami no homxape khe akemu akükau ghutu laghi khagho hechesü akupuwu kini dolono kiptimi ghüshimi thaqhü ye putho lono pove. Panongu ye Arabah küdau wuve.

⁵ Ikemu Chaldea ghüshimi no akükau hawu no Jericho qa yeghi lono küghaluve, eno paw ghüshimi kümtsü apanagha pa launo pove.

⁶ Panongu no akükau küghape Babylon kükau lau Riblah lo saghi, tileno panongu no pa shou amakho be.

⁷ Panongu no Zedekiah nhethe lono pa nuli pithive tsü; eno Zedekiah nhethi chixejove tsüno ayikichhe no pa tshüpe Babylon lo sawuve.

⁸ Babylon kükau Nebuchadnezzar yepe mpe chighiatokuu, aqhi apunguu, atsala akütsüniu lono akükau qeu Nebuzaradan, aghukhemi shou kepten no Jerusalem lo iloghi.

⁹ Pa no Ampeu ki, aküka ki eno Jerusalem lo aki kümtsü pitive tsü; aki kijeje thaqhü pa no pitive tsü.

¹⁰ Chaldea ghüshimi khunoqo kepten gholo chekeno, panongu no Jerusalem liwo kümtsü kuboleve tsü.

¹¹ Aphughi lo achili akeqo eno Babylon kükau lau pove kemi ngo aqokitikhi kümtsü kepten Nebuzaradan no hakiphi sawuve.

¹² Ikemu kepten no aghakhu lo ighono kumlhomi ye atsailu ngo aluchi penike qhive.

¹³ Ampeu kilo alazayi no shikeu tsükucho, tuhakulu eno alazayi zübohuqo ye Chaldeami no hephove tsü, eno alazayi ye Babylon lo pewuve.

¹⁴ Achineki lo peitha chekeu liqo, sholepu, ami ghapinhe keu yikuqho, müsüghüta khu, alazayi bohu, kümtsü panongu no pewuve.

¹⁵ Amibo eno chithakhu ghi pewuve tsü. Kepten no ameshoyi no mla püakeu eno ghükayi no mla püakeu kümtsü pewuve.

¹⁶ Akükau Solomon no Ampeu kilo atsükucho kini, azübohu lakhi, eno tuhakulu mlakeu lo alazayi akeu ye mighi khamlae.

¹⁷ Atsükucho ye akiqhelau auxakuchho tache, eno tipa kütsüqa lo alazayi no chopumloi shikeu ghopüa. Ti chopumloi keu ye akiqhelau auxakuchho lakhi tüxa toike no qhemghai ke. Ti chopumloi homxape alazayi no ghoküna keu ngo alazayi no khaghatu xathi mla keqo ae. Atsükucho lakhiu ghi lo-i titoie.

¹⁸ Kepten no achinetou Seraiah ngo Zephaniah achinemi gholo akiniu eno achineki kulaghi lo akhemi küthü ishi sawuve,

¹⁹ eno mishighüna lono ghüshimi kijemi ngo akükau mije kütsümi pano pungu aphughi lo akeqo, ghüshimi zatsüuw akiyeu khuu no timiqo hekütsü akeno, eno mishighüna lo aghi kemi pano lhotsügho, ishi kepten no sawuve.

²⁰ Pa no panoqo küghape Riblah lo Babylon kükau lau ighi.

²¹ Babylon kükau no Hamath yeghi lo Riblah lono panongu pithive. Hitoi shi Judah ye pa yeghi lono hakiphi sawuve.

Gedaliah no Judah lo Angh shilu

²² Akükau Nebuchadnezzar no Judah lo khunoqo achili qhive keno, tipaqo jukütsü peniye Shaphan nu Ahikam nu Gedaliah pesü angh shivetsü.

²³ Kughou kepten eno ghüshimi kümtsü no Babylon kükau no Gedaliah pesü angh shive keu chilu keno, panongu no pütütaw ghüshimi sasü Gedaliah kusho nike Mizpah lo ighi; tipaqo ye, Nethaniah nu Ishmael, Kareah nu Johanan, Netophahmi Tanhumeth nu Seraiah, eno Maacathmi Jaazaniah.

²⁴ Gedaliah no ashoqhi shi panongu vilo pi, “Chaldeami hiyampemi msa kevilo. Aghakhu lo xüno Babylon kükau huthu lo, nongu ghenguno akivi shinani.”

²⁵ Ikemu aqhi akütsüniu loye kükami lagha lono ighi kemi, Elishama nu Nethaniah nu Ishmael no pa gholo timi chighi sasü Mizpah lo ighi no Gedaliah ghiqhive eno pa gholo Jewmi ngo Chaldeami akeqo ghi pithive.

²⁶ Tileno timi kije kitilami kümtsü, eno ghüshimi keptenqo ishi Egypt lo wuve kughengu panongu ye Chaldeami msave.

Jehoiachin Khaqhiphe

²⁷ Jehoiachin kügha sawuve keu mpe shighi akütsüniu, aqhi chighiakiniu, atsala muku akütsüniu lo Babylon kükau Evil-merodach no ayepe thuke lono, Judah kükau Jehoiachin küpüqhiyi akughu lono khaqhi pheve.

²⁸ Pa no akivishi Jehoiachin pütsa eno Babylon lo kükami lakhü akiqheu lo pa pelo iqape.

²⁹ Ikehu Jehoiachin ye akughumi phi xaqhive. Eno tinguno tilau pa ye tsalakipe akükau gholo chusho cheuve,

³⁰ pa no xüake tivilo tsalakipe vehupu kümtsü, akükau no achipi lono pa tsüche.