KUKAMI AKINIU 24 - Sumi Naga CL (Re-edited) Bible (BSI)

¹ Jehoiakim ghuloki lono Babylon kükau Nebuchadnezzar ighive eno Jehoiakim ye ampe küthü pa qholo ngove. Tithiu pa no hebidethu.

² Ampeu no Pa qemi tungkupmi vecheo pipüa ketoi Jehoiakim sasü aghüshi no Judah kütsakungove penike Ampeu no Chaldea, Syria, Moab eno Ammon ghüshimi puwu.

³ Judah shou hi ikughi keu ye mtsüqheino Ampeu zakütsü lono ke, tishianguno pa zülono Judah ikhive niye, ti ye Manasseh no axine kümla shike ghenguno ke,

⁴ eno pa no pimihami ji pele keu ghengu ghi ke. Kughengu pa no pimihami ji no Jerusalem lo pichhive eno Ampeu no tighenguno akipimi qhitsü mlave ke.

⁵ Jehoiakim kümla küghütha kütau ngo pa no kiu shi keno kümtsü, Judah Kükami Yekikithi Kaku lo yepüani ke kumo keshea?

⁶ Jehoiakim ye pa puasüqo gholo zühuve eno pa nu Jehoiachin no pa thisü luve.

⁷ Eno Egypt kükau ye khilemu pa yeghi hechesü aghü lo wumove, kughengu Egypt kükau no qhasüpe ache keu kümtsü, Euphrates ghoki lono Egypt yeghi ahuu alughi kutolo Babylon kükau no luvetsü.

Jehoiachin no Judah lo Kalu

⁸ Jehoiachin ye ampe chighitache shi akelono ayepelu eno pa ye Jerusalem lono aqhi küthü ayepelu. Pa za ye Nehushta, Jerusalem lo achekeu Elnathan nonga.

⁹ Pa puasüqo no shike toi pa ye Ampeu zülo kiu no axine keno kümtsü shi ke.

Jerusalem Leluve

¹⁰ Tipa ghuloki lo Babylon kükau Nebuchadnezzar qemi no Jerusalem leighi no khasü luve.

¹¹ Tishi khasüpe akelono Babylon kükau Nebuchadnezzar no Jerusalem lo ighi,

¹² eno Judah kükau Jehoiachin no pa ampi, paza, paw kijemi, hiyampemi, eno pa kükaki lo kijemiqo pesü Babylon kükau tsüve. Babylon kükau yepe mpe akütacheu lono pa no Jehoiachin akughumi shi sasü wuve,

¹³ eno Ampeu no pichho püake toi Ampeu kilo ngo kükaki lo akini kümtsü pewuve, eno Ampeu kilo Israel kükau Solomon no ameshoyi bohu mla keqo kümtsü kubove tsü.

¹⁴ Pa no Jerusalem lo küxümi, hiyampemi, eno aghütomi küqha kelo 10,000 küghaluve, eno atshamgha kümlami ngo ayi kiyiqimi ghi sawuve. Tipa yeghi lo ighono kumlhomi kumo aye lakhimu kühave.

¹⁵ Pa no Babylon lo Jehoiachin sawuve. Akükau paza, pa nipuqo, pa qholo kijemi, eno aghakhu lo sakiphemi kümtsü Jerusalem lono küghape Babylon lo wuve.

¹⁶ Babylon kükau no aghütomi 7,000 kümtsü, eno atshamgha kümlami ngo ayi kiyiqimi 1,000, küghape Babylon lo ighive.

¹⁷ Pa no Jehoiachin pangu Mattaniah pelo pa thisü luvepe, eno pa je Zedekiah ipi kukideve tsü.

Zedekiah no Judah lo Kalu

¹⁸ Zedekiah ye ampe muku lakhi shi akelono Judah lo ayepelu eno pa ye Jerusalem lono ampe chighiqhaqhi ayepelu. Pa za ye Hamutal, Libnahmi Jeremiah nonga.

¹⁹ Jehoiakim no shike toi pa ye Ampeu zülo kiu no axine keno kümtsü shike.

²⁰ Kughengu Ampeu ye Jerusalem ngo Judah lo küami shou ighono amlo ideve kehu Pa no Pa zülono hapheve. Zedekiah no Babylon kükau hebide thuve.