KUKAMI AKINIU 23 - Sumi Naga CL (Re-edited) Bible (BSI)

Josiah no Akikili Süghi

¹ Tithiu akükau no Judah ngo Jerusalem lo layemi kümtsü pa lau hekütsü saghi.

² Akükau no Ampeu kilo wu, pa gholo Judah lo kiptimi eno Jerusalem lo xüküami kümtsü, achinemi ngo tungkupmi, eno timi kije kitila kümtsü wue. Eno kümtsü no chikulupu shi pa no Ampeu ki lono ithulu keu puloshoqhi kaku lo yepüa keu tsaqo phisü.

³ Akükau no atsükucho phivilo puthugho no pa mlo kuchopu eno pa ngulho kuchopu süno Ampeu pape, Pa zakütsü, pimheye, eno xaküthaza gholu nike Ampeu zülo puloshoqhi shi, eno puloshoqhi kaku lo yepüakeu tsaqo pekupu nike piqhie. Timi kümtsü no puloshoqhi tipau lo pulo küqhave.

⁴ Tishino akükau no achinetou Hilkiah ngo pa shelo akiniu mqo lo achinemi ngo achineki kulaghi khemi vilo Baal ngo Asherah eno atsütsü lo aqhi ayepu kümlla ghenguno abohu mlapüa keqo ikhiphe penike azah tsü. Pa no Jerusalem khalau Kidron luza lono pitileve eno tipa yevu pesü Bethel lo wuve.

⁵ Judah kükamiqo no Judah ngo Jerusalem hokümxa lo aphughiqo lo qhemghaike-a lono akümllagho tsü penike achinemi süsü keqo pa no ikhive; eno Baal, khetsünhe, aqhi, eno yepu-yesü jeli lau axokütsüngü piti mllani ke süsü keqo ghi ikhive.

⁶ Pa no Ampeu ki lono Asherah ikhiphepe Jerusalem khalau wuve no Kidron ghoki lono pitive, eno mukhumuno shive no tipau pesü mishi kumo kuqhoa lo kuthole süvetsü.

⁷ Pa no Ampeu chineki lo kütüqha pumiqo ki, khile no totimiqo no Asherah ghenguno chijeboike phi ghoche keno hephove tsü.

⁸ Pa no Judah lo mishighünaqo lono achinemi kümtsü sasü khalau ipe no, Geba lono Beersheba kutolo qhemghaike-a khije lo achinemi no mllache keno, kümtsü shipüthave tsü. Eno mishighüna shou angh Joshua no iloche keu khagho phivilo qhemghaike-a hephove tsü; ti ye mishighüna lo iloche keu khagho lono piyiu ke.

⁹ Qhemghaike-a lo chinemi ye Jerusalem lo Ampeu kümlla khache lo ikumoe, ikemu pano thiküzümi gholono kholaqhi sümokeu sho chuche.

¹⁰ Hinnom Nu Khila lo Topheth julho pa no shipüthave tsü, tishino khuu pelomu anu momu anga pesü Molekh lau akipti kümllagho tsüpe move.

¹¹ Pa no Judah kükamiqo no khetsünhe lau mllakeu khurshi julhoqo, Ampeu ki kulaghi lo ache keu, ti ye kijemi atou Nathan-melekh chebo phivilo akeu, ikhive tsü. Eno khetsünhe lau mllakeu khurkuluqo ghi pitive.

¹² Judah kükami no Ahaz chebo kütsüqa lo akümlla-khache ngo Ampeu ki alou achebo kini lo Manasseh no akümlla-khache mlakeu pa no kubole pinyive no ti hekuphoqo xupe Kidron ghoki lo vesüve.

¹³ Pa no shiküpsa toghi apeu, ti ye Jerusalem kipelau, akümlla-a khikhi Israel kükau Solomon no Sidonmiw aphikümqhüpu lholiu Ashtoreth, ngo Moabmiw aphikümqhüpu lhou Chemosh eno Ammonmiw aphikümqhüpu lhou Milcom ghenguno shiqhe keno, tipaqo shipüthave tsü.

¹⁴ Pa no atsükuchoqo hepholeve tsü, eno Asherim loqhipe tipaqo lo timi saghi no chhitoi qhivetsü.

¹⁵ Tinguno alau, Nebat nu Jeroboam khuu no Israel pelo axine shivepe keno, pa no Bethel lo akümlla-khache shiqhe keu Josiah no kütsalepe pitive tsü. Pa no Asherah ghi pitive tsüe.

¹⁶ Tishino Josiah no tsüghüwo atoghi lo akumona hami ithulu. Pa no tipaqo lo asaghiqo ikhiphe no akümlla-khache lono pitive no shipüthave tsü, ti ye Alhou timi khuu no hipaqo pichho püa keno tipau kiqi lono ke.

¹⁷ Tishino pa no pi, “Hu athigho I no ithulu akeu ye kiu kea?” Mishighüna lo timiqo no pa vilo pi, “Hu ye Alhou timi khuu Judah lono ighi no nono Bethel lo akümlla-khache kütsave keu vehu pichho püa keno, pa kumona ke.”

¹⁸ Pa no pi, “Pa tholo qhivelo, khunomu pa saghi tukiqhe kevilo.” Ikehu panongu no pa saghi bukiqe move, tipa gholo Samariami tungkupu saghi ghi qhive.

¹⁹ Samaria phughiqo lo qhemghaike-a lo akümlla ki, Israelmi kükami no shiqhe keu vecheo Ampeu pelo amlo ideve peke ghenguno Josiah no ti kümtsü ikhive. Pa no Bethel lo shike toi tile ghi shike.

²⁰ Pa no qhemghaike-a lo achinemi kümtsü akümlla-khache lono aghakishi kipti shi mllave eno tipaqo lono timi saghi pitive. Tishino pa ye Jerusalem lo idewove.

Hechekulu Ghulhu Pini Kithe

²¹ Akükau no timi kümtsü vilo azah tsü, “Hi Puloshoqhi Kaku lo yepüa keu kiqi lono Ampeu nongu Lhou lau Hechekulu Ghulhu ikhilu lo.”

²² Kughengu xaküthami no Israel shou xatha cheke ghuloki lo kumo aye, Israelmi kükami momu Judah kükami ghuloki loye khilemu Hechekulu pini move.

²³ Ikemu Josiah yepe mpe chighiakütacheu lono Ampeu lau Hechekulu Ghulhu hipau Jerusalem lono ikhilue.

²⁴ Tinguno alau, achinetou Hilkiah no Ampeu ki lono ithulu keu kaku lo yepüa keqo pepimhe wonike akükau Josiah no Judah yeghi lo eno Jerusalem lono tumumi eno kithixashemi, akibo lhouqo, ajulhoqo, eno aphikümqhüpu kümtsü ikhive.

²⁵ Pa züu kükami khumu Moses Yezah lo thokha akeu kiqi lono, amlo, angulho, eno akumto kümtsü pesü, Ampeu lau tsüghü ighimoe, eno pa thiumu khumu pa toike ipeghi moe.

²⁶ Tishimu Ampeu no pa loghu khikhi Judah shou puku keno, tipau lono ideighi moe, kughengu Manasseh no ala thokha lono Pa xukutho ke.

²⁷ Ampeu no pi, “I no Israel ikhive ketoi, Judah ghi I zülono ikhive nani, eno I no kishelu keu mishighüna Jerusalem ngo achineki khipau pesü I no, I je tile anani, ipi keno, I no peve nani.”

Josiah Kithi

²⁸ Josiah kümla küghütha kütau ngo pa no kiu shi keno kümtsü, Judah Kükami Yekikithi Kaku lo yepüani ke kumo keshea?

²⁹ Pa ghuloki lono Egypt kükau Pharaoh Neco no Assyria kükau lau Euphrates ghoki lo iqhoe. Akükau Josiah no pa sasü aghü shinike wukelo Pharaoh Neco no Megiddo lono pa ithulu kemtsa pithive.

³⁰ Pa qemiqo no Megiddo lono pa sükumo khurkulu lono xapusü Jerusalem lo ighi no tilau qhove eno timiqo no Josiah nu Jehoahaz sawo nukisheve no papu thisü luvepe.

Jehoahaz Yepe eno Akughu

³¹ Jehoahaz ye ampe muku küthü shi akelono ayepelu eno pa ye Jerusalem lono aqhi küthü ayepelu. Pa za je ye Hamutal eno li ye Libnah lo achekeu Jeremiah nonga.

³² Pa puasüqo no shike toi pa ye Ampeu zülo kiu no axine keno kümtsü shike.

³³ Pharaoh Neco no pa küghape Hamath yeghi lo Riblah lo qhive, tishikeu lono pa ye Jerusalem lo ayepu mlave, eno ampe lo ghükayi ahu 3,400 eno ameshoyi ahu 34 ishi sükusho zame tsüuve.

³⁴ Tishino Pharaoh Neco no Josiah nu Eliakim pesü papu Josiah thisü luvepe, eno pa je pesü Jehoiakim ipi kukideve tsü. Ikemu pa no Jehoahaz sasü Egypt lo wuve eno pa ye tilau no thive.

³⁵ Jehoiakim no ghükayi ngo ameshoyi pesü Pharaoh tsü, ikemu Pharaoh zakütsü kiqi lono ti tsünike ghenguno pa no aghakhumi shou ayeghi momu küakini akeu kiqi lono zame qhae.

Jehoiakim no Judah lo Kalu

³⁶ Jehoiakim ye mpe muku pungu shi akelono ayepelu eno pa ye Jerusalem lono ampe chighiqhaqhi ayepelu. Pa za ye Zebidah, Rumahmi Pedaiah nonga.

³⁷ Pa puasüqo no shike toi pa ye Ampeu zülo kiu no axine keno kümtsü shike.