KUKAMI AKINIU 22 - Sumi Naga CL (Re-edited) Bible (BSI)

Josiah no Judah lo Kalu

¹ Josiah ye mpe tache shi akelono ayepelu, eno pa ye Jerusalem lono ampe shighi lakhi ayepelu. Pa za Jedidah ye Bozkathmi Adaiah nonga.

² Pa ye Ampeu zülo kiu no achipi keno shino pasü David no shikeu thokha shi, eno pa ye piyiumu ajeumu tsüghüve moe.

Josiah no Achineki Shikithe

³ Akükau Josiah yepe mpe chighiakütacheu lo akükau no Meshullam nu Azaliah nu Shaphan Ampeu kilo akiyeu vilo pi,

⁴ “Achinetou Hilkiah lau wuno timiqo no Ampeu kilo ighi kelono tsükeu akulaghi khemi no ghükayi khije qhalu keno kihiju lo.

⁵ Eno ti pesü khunoqo Ampeu ki shikithe keu jukütsü ani keno tipaqo tsüno panoqo pelo akümlami tsü pelo

⁶ (ti ye asü kümlami, aki kishimi eno atu kümlami) eno panoqo pelo ti pesü Ampeu ki shikithe keu lo asüpa ngo hekütha tuqo qhülu pelo.

⁷ Ikemu panongu no pisa kishi peithave keno kihikülai kevilo, kughengu panongu ye amikucho lono peitha anike.”

Hilkiah no Ayezah Kaku Ithulu

⁸ Achinetou Hilkiah no akiyeu Shaphan vilo pi, “I no Ampeu ki lono Ayezah kaku ithulue.” Tishino Hilkiah no kaku hu pesü Shaphan tsüno pa no phiju.

⁹ Akiyeu Shaphan no akükau lau ighi no tipau ghili pi, “O qemi no Ampeu kilo ghükayi aghi keu kümtsü pesü Ampeu ki shikithe keu lo ampi shi akeqo tsüvae.”

¹⁰ Tishino Shaphan no akükau vilo pi, “Achinetou Hilkiah no kaku hipau I tsüe.” Eno Shaphan no akükau zülono phisü.

¹¹ Kughou Akükau no Ayezah kaku lo atsaqo hu chilu keno, pa no pa phi süxüve.

¹² Akükau no Achinetou Hilkiah, Shaphan nu Ahikam, Micaiah nu Akhbor, akiyeu Shaphan, eno akükau qeu Asaiah lau ishi azah tsü,

¹³ “Wulo, eno kaku hipau lo yepüa keu kiqi lono ni eno timiqo ghenguno, eno Judah timi kümtsü ghenguno Ampeu lau ighiju lo. Ampeu ye ningu lau shishe aloghu ide ani, kughengu ni puasüqo no kaku hipau lo shilo pikeu pape movae, eno ningu ghenguno yepüa tsükeu kiqi lono xümovae.”

¹⁴ Ikehu achineu Hilkiah, Ahikam, Akhbor, Shaphan, eno Asaiah no achineki lo tiphimini jukükütsüu Harhas nu Tikvah nu Shallum nipu Huldah tungkupliu, lau wuno li sasü küptsa (li ye Jerusalem lo asa akiniu lo ache).

¹⁵ Li no panongu vilo pi, “Ampeu, Israel Lhou no ishi piani: ‘Nongu hape I lau puwu keu timi vilo pilo,

¹⁶ Ampeu no piani, Julo, Judah kükau no kaku lo philu keu tsaqo hutoi, I no a-a hipau shou eno xüküami shou kütsakungo keu süghini cheni.

¹⁷ Kughengu panongu no I milive eno pano kümla vecheo I mlo shikighide tsüniye kütau lhouqo lau akümllagho tsüke, tighenguno I loghu ye a-a hipau shou ikughi nani eno ti ye iqüvemo nani.

¹⁸ Ikemu Judah kükau khuu Ampeu lau ighijuni ke nongu hape I lau puwu keno, pa vilo ishi pilo, Nono chiluve keqo tsa vehulo Ampeu, Israel Lhou no ishi piani,

¹⁹ kughou I no a-a hipau eno hile xüküami püghave no ghushoveni keu nono philu keno, nono o mlo pebide eno kuchuni püzü o phimini süxü no I zülo mloqa kehu, Ni ghi ti chiluve tsüae, ipi Ampeu no sheshu ani.

²⁰ Tighenguno julo, I no o puasüqo gholo o hekütsü nani, no ye aloinoqhiyi o kumo lo ilo nani, eno o nhethi ye I no a-a hipau shou kütsakungo süghini ye akeu ithulumo nani.’” Panongu no akükau lau atsa hipau pesü ighi.