KUKAMI AKINIU 21 - Sumi Naga CL (Re-edited) Bible (BSI)

Manasseh no Judah lo Kalu

¹ Manasseh ye ampe chighikini shi akelono ayepelu, eno pa ye Jerusalem lono ampe lhopungu pungu ayepelu. Pa za ye Hephzibah.

² Israelmi zülono Ampeu no shiye hapheve keqo no aphikümqhüpu khuaye pepimhe chekeu pape kelono pa ye Ampeu zülo kiu no axine keno ti shive.

³ Kughengu papu Hezekiah no qhemghaike-a kütsave tsükeqo pa no shiqhe kitheve, pa no Baal kümlla-aqo mla, Israel kükau Ahab no mlake toi Asherah julho mlae, eno atsütsü lo aqhi ayepu kümtsü mlla ke.

⁴ Ampeu ki, khile Ampeu no “Jerusalem lo I no I je qhini,” ipi keno, tile pa no akümlla-khacheqo mlave.

⁵ Ampeu ki khala kinikujo lo pa no atsütsü lo aqhi ayepu kümtsü mlla kepu shi akümlla-khacheqo mlave.

⁶ Pa no pa nu küghape piti mllave eno asheazü kipimi, asakiqhi, tumumi ngo kithixashemi peitha ke. Pa no Ampeu zülo shishe axine shikeu lono Ampeu mlo shikighideve tsüe.

⁷ Pa no Asherah julho mlape Ampeu chineki lo qhi, tipa chineki vehulo Ampeu no David ngo pa nu Solomon vilo pi: “Israel shiaye kümtsü gholono I no kishelu keu ki hipau lo eno Jerusalem lo, I no alholo ghenguno I je qhinani.

⁸ Israelmi no I zakütsüqo eno I no I qeu Moses tsükeu Yezah kümtsü pelu aye, I no pano puasü tsükeu yeghi lono khalau itsü wuve pemo nani.”

⁹ Ikemu panongu no agholu move, eno Israelmi no ighi mphi züu Ampeu no shiye kütsave keqo no shiche keu nguno aküsau Manasseh no panongu sawo axine shipe.

Manasseh no Ajulho Mlla

¹⁰ Ampeu no pa qemi tungkupmi vecheo pi,

¹¹ “Judah kükau Manasseh no aphikümqhüpu hipaqo shi, pa züu Amorimi nguno kuthoküzü xine shi, eno pa julhoqo vecheo Judah pelo axine shipe,

¹² tighenguno Ampeu Israel Lhou no ishi piani: Julo, I no Jerusalem ngo Judah shou chikulumi pelo akini ghi mthomzai pekepu küsakusho puwuni.

¹³ I no Samaria ghime keu kimghi eno Ahab kibo shou akimghi tu peitha keu pesü Jerusalem mighi nani. Timi no akhu ajukhu isü keshi, I no Jerusalem isü nani eno pishiqhope qhive nani.

¹⁴ I no I mheghi, Iw ghükulumi kileve nani eno pano ghümi u lo süvetsü nani, panongu ye akughumi shive no pano ghümi no pükaqhi nani,

¹⁵ kughengu pano puasüqo no Egypt lono ipeghi ke tsala lono ishi kutolo I zülo kiu no axine keno ti shino tino I mlo shikighide tsüe.”

¹⁶ Manasseh no Judah sasü axine lo ilokeu lono panongu pelo Ampeu zülo axine shive peke likhi kumono, pa no amikuchomi kutomo pithive tsükeu ji no Jerusalem halau no halau kutolo qowue.

¹⁷ Manasseh kümla küghütha kütau ngo pa no kiu shi keno kümtsü eno pa no axine shive keqo ye Judah Kükami Yekikithi Kaku lo yepüani ke kumo keshea?

¹⁸ Manasseh ye pa puasüqo gholo zühuve no pa kilo Uzza ghutu lo shiqhove, eno pa nu Amon no pa thisü luve.

Amon no Judah lo Kalu

¹⁹ Amon ye ampe muku kini shi akelono ayepelu eno pa ye Jerusalem lono ampe kini ayepelu. Pa za ye Jotbahmi Haruz nonga Meshullemeth.

²⁰ Pa ye papu Manasseh toi Ampeu zülo kiu no axine keno shike.

²¹ Papu no cheche keu la kümtsü lo pa no chewu eno papu no ajulho huthu chekeqo pa no huthu eno mllae.

²² Pa ye Ampeu pa puasüqo Lhou milive eno Ampeu yezah lo chemove.

²³ Amon qemi no pa shou küsüqe no kükaki lono pa pithive.

²⁴ Ikemu aghakhu lo timiqo no akükau shou küsüqe kemi kümtsü pithive, eno timiqo no pa nu Josiah pesü pa thisü luvepe.

²⁵ Amon kümla küghütha kütau ye Judah Kükami Yekikithi Kaku lo yepüani ke kumo keshea?

²⁶ Tishino pa ye Uzza ghutu lo pa kumoki lo shiqhove eno pa nu Josiah no pa thisü luve.