KUKAMI AKINIU 20 - Sumi Naga CL (Re-edited) Bible (BSI)

Hezekiah Küsü eno Vikulu

¹ Tipa ghuloki lo Hezekiah ye süuve eno thiveni keshive. Tileno Amoz nu tungkupu Isaiah no pa lau ighi no pi, “Ampeu no ishi piani, ‘Kutokughoi luvelo, kughengu no ye thive niae; no ye vilumo nani.’”

² Tileno Hezekiah no akupuwu küdau pa gi jusü no Ampeu lau inikhu,

³ “O Ampeu, kimiyeno I no kishi O zülo pükhükulu shi amlo tsüqhiyi cheche, eno achipiu shiche keno kümsülu tsülo.” Tishi pive no Hezekiah no kukuno qauve.

⁴ Ikelo Isaiah no küghaki amtau veche ipe mphi lono, Ampeu tsa pa lau ighi:

⁵ “Ideilo lo eno Iw timiqo sakipheu Hezekiah vilo pilo, Ampeu O sü David Lhou no ishi piani: I no o kighini chiluvae; I no o nhezü kipiji ithuluvae. Julo, I no o shipivi tsüni. Atsala aküthüu lo no ye Ampeu kilo wu nani,

⁶ eno I no ampe chighipungu o küxü kiqhe tsüni. I no Assyria kükau launo no eno mishighüna hipau süsho tsüni eno I je ghenguno eno I qeu David ghenguno I no mishighüna hipau süshoni.”

⁷ Isaiah no pi, “Mububo nipa süghi lo. Tipau pesü amishe lo datsü lo, eno pa ye viluve nani.”

⁸ Hezekiah no Isaiah vilo pi, “Ampeu no I shipivi tsü nani eno atsala küthü thiu ni ye Ampeu kilo wulu nanie pikeu michipu kiu ani kea?”

⁹ Isaiah no pi, “Ampeu no piqhi keu shikupu tsü nanie pikeu michipu, Ampeu no o tsü akeu ye hike: hi yekükhü pelo azüu küpka chighi wove penishi ani keo, athiu ideighi penishi ani kea?”

¹⁰ Hezekiah no khochile, “Yekükhü pelo küpka chighi azüu wovepe keu ye mlalei. Ikehu küpka chighi athiu idewove pelo.”

¹¹ Eno tungkupu Isaiah no Ampeu vilo inikhu, ikelo Pa no yekükhü pelo Ahaz no mlakeu dokiche kala lono küpka chighi athiu ideiqive pe.

Babylon Züqhukishimi

¹² Tipa ghuloki lo Baladan nu Merodach-baladan, Babylon kükau no aghakhu züqhukishimi eno yesü gholo aküzü-agho pesü Hezekiah lau tsüpuwu, kughengu pa no Hezekiah ye süae pi chilue.

¹³ Hezekiah no panongu sasü pivi eno pa kini pekükütsü ki, ghükayi, ameshoyi axokütsüngü, akughupu thazü, pa ghünanu, eno thokha paw tinhemgha kiqhi kilo akeqo panongu piye. Pa kilo momu pa kükaqha lo Hezekiah no panongu piyemo keu kiumu kühave.

¹⁴ Tileno tungkupu Isaiah no akükau Hezekiah lau ighi no pi, “Timi hipaqo ye kiu pi kea? Panongu ye khilano ighi kea?” Hezekiah no pi, “Panongu ye aghacheu Babylon lono ighi ani.”

¹⁵ Pa no pi, “Panongu ye o kükaki lo kiu ithuluve akea?” Hezekiah no pi, “Panongu ye I kilo akeu kümtsü ithuluvae. Anhemgha hekütsü chekeu kilo, I no panongu piyemo keu kiumu kühavae.”

¹⁶ Tile Isaiah no Hezekiah vilo pi, “Ampeu tsa inilo:

¹⁷ Julo, o kükaki hipau lo kiu ani keno, eno khikhi o puasüqo no hekütsüpe ishi kutolo qhitsü keno, kümtsü Babylon lo pewuve no kiumu kühaveni keu tsala cheae ipi Ampeu no piani.

¹⁸ Eno O nuli khami ghi sasü wuve nani, eno panongu ye Babylon kükau kükaki lo shoko shiuvepe nani.”

¹⁹ Hezekiah no Isaiah vilo pi, “Ampeu tsa nono pi akeu ye aloe.” Kughengu pa no ishi kümsüe, “I ghuloki lo külakishi eno sükusho akepushi aye kumu kumoe.”

²⁰ Hezekiah kümla küghütha kütau eno pa kumto ghili kümtsü eno pa no kishi ayizükucho mla eno azüla ghesü no azü sasü mishighüna lo ighi keno, tipaqo ye Judah Kükami Yekikithi Kaku lo yepüani ke kumo keshea?

²¹ Hezekiah ye pa puasüqo gholo zühuve eno pa nu Manasseh no pa thisü luve.