KUKAMI AKINIU 2 - Sumi Naga CL (Re-edited) Bible (BSI)

Kungugha lo Elijah Saikuve

¹ Ampeu no amülhü lono Elijah sasü kungugha lo ikuve niye akelo, Elijah ngo Elisha pama ye Gilgal lono wuche.

² Elijah no Elisha vilo pi, “Hile ngo aghilo, kughengu Ampeu no Bethel kutolo I puwu anie.” Ikemu Elisha no khochile, “Ampeu xüani, eno no ampi xüani, ni ye khilemu o phemoe.” Ikehu pama kümtsa Bethel lo iqive.

³ Bethel lo tungkupmi loji no Elisha lau ipeghi no pi, “Ampeu no ishi tsala lono o launo o mpeu sawuve niye akeu no ye ithi anima?” Elisha no khochile, “Iyei, ni ye ithi ani, qümüi shilo.”

⁴ Tileno Elijah no Elisha vilo pi, “Elisha, hile ngo aghilo, kughengu Ampeu no Jericho lo I puwu ani.” Ikemu pa no khochile, “Ampeu xüani eno no ampi xüani, ni ye khilemu o phemoe.” Tighenguno pama kümtsa Jericho lo wuve.

⁵ Jericho lo tungkupmi loji no Elisha lau ipeghi no pi, “Ampeu no ishi tsala lono o launo o mpeu sawuve niye akeu no ye ithi anima?” Elisha no khochile, “Iyei, ni ye ithi ani, qümüive lo.”

⁶ Tithiu Elijah no Elisha vilo pi, “Hile ngo aghilo, kughengu Ampeu no Jordan lo I puwu ani.” Ikemu pa no khochile, “Ampeu xüani eno no ampi xüani, ni ye khilemu o phemoe.” Tighenguno pama kümtsa wuve.

⁷ Tungkupmi loji pano lhopungu ghi pama papesü kümtsa wuve eno pama no Jordan mkülo puthugho akelo, panongu ghi putou puthugho ae.

⁸ Tile Elijah no paw hebephi xaqhive eno liküzüpe azü lo hesü; ikelaye azü no kikije kini shi kophave eno pama no katha kulupu qhemi ayeghi qhaive.

⁹ Kughou pama no kathave keno, Elijah no Elisha vilo pi, “O launo I sawuve mphi lono no ye I pelo kiu shitsü penishi ani keno khulo.” Elisha no pi, “Kimiyeno o nguagha kini küghüsü no I tsülo.”

¹⁰ Ikehu pa no pi, “No ye kushokütsüpu khu ani; tishimu, o launo I sawu chekeu nono ithulu aye, nono khu akeu ithulu nani, ikemu nono ni ithulumo aye nono khu akeu ithulumo nani.”

¹¹ Pama no küptsa cheke lono paikhavi ami khurkulu ngo ami khurshi no pama kije kütüta shivetsü. Eno Elijah ye miyitsü lono kungugha lo ikuve.

¹² Elisha no ti ithulu no ighamku, “I pu, I pu! Israel khurkulu eno paw khurshimi.” Pa ye Elijah ithulu move. Tishino pa no pa phiküzü süxüla kini shive.

¹³ Eno Elijah philono ikiqighi keu hebephi ikhiluve no idewo Jordan khila lo puthugho.

¹⁴ Pa no Elijahw hebephi pesü liküzü no azü lo hesü eno pi, “Elijah Lhou, Ampeu khile ani kea?” Kughou pa no azü lo hesü keno, azü no hula hila kikije kini shive eno Elisha no katha ikuve.

Elisha no Elijah Thisülu

¹⁵ Kughou Jericho lono ighi kemi tungkupmi loji no pa ithulu keno, panongu no pi, “Elijah nguagha Elisha shou ikughivae.” Tishino panongu no pa sasü kushoni ke ighi no pa zülo pishiqho.

¹⁶ Panongu no pa vilo pi, “Julo, hile o qemiqo akumtomi lhopungu ani. Kimiyeno panongu pelo wuno o mpeu phuwu pelo. Ampeu ghungu no pa xapuwo khileala naghuto momu akhila lo qhipüaghi luvike.” Elisha no khochile, “Puwu kevilo.”

¹⁷ Ikemu pa no angave moke kutolo panongu no pi auve kehu, pa no pi, “Puwuve lo.” Panongu no pano lhopungu puwu no tipaqo no atsala küthü kutolo phu kemu phumlave.

¹⁸ Tithiu Elisha no Jericho lo akelono panongu no pa lau ideighi, pa no panongu vilo pi, “Ni ye nongu vilo ‘Wu kevilo’ pike kumo?”

¹⁹ Mishighüna lo timiqo no Elisha lau wuno pi, “Julo, ni mpeu no ithulu anike mishighüna hipau ye alokepu shi ani ikemu azü no alomoe eno ayeghi no athi pithimoe.”

²⁰ Pa no pi, “Abohu kithe lo amti süno I lau süghilo.” Panongu no ti süghitsü.

²¹ Tishino pa no azüpuki lo wuno amti pesü azü lo vesü no pi, “Ampeu no ishi piani, I no azü hipau shipivive tsüae; itehi ye kithiküha eno anuqive keu shimoae.”

²² Ikehu Elisha no pike toi azü tipau ye ishi kutolo akimthe shi aphie.

²³ Pa no tilau no Bethel lo iqhoche kelo, itimi khami no mishighüna lono ipeghi no pa junu ghi pi, “Iqhovelo, boghesho! Iqhovelo, boghesho!”

²⁴ Pa no tsüghü ighi no panongu jupüzü Ampeu je lono ghushove. Ikelo avaqu kini no aghasa lono ipeghi no itimi pano lhobidi kini tsüve.

²⁵ Tilau no pa ye Carmel Tolo wuve no Samaria lo ideighi.