KUKAMI AKINIU 19 - Sumi Naga CL (Re-edited) Bible (BSI)

Isaiah no Hezekiah Shikumto

¹ Akükau Hezekiah no ti chilu kemtsa pa mlo ghime lono pa phi süxüve eno yeqhiyephi pepusü Ampeu chineki lo ilove.

² Pa no kükaki jukükütsüu Eliakim, akiyeu Shebnah, eno achinemi kichimi yeqhiyephi pepipe no Amoz nu tungkupu Isaiah lau puwu.

³ Panongu no pa vilo pi, “Hezekiah no ishi piani, Atsala hi ye kütakihi, alomipi, eno thaigha keu tsalae; atianuli punu kepu do ighive akemu punulu kepu küka kühavae.

⁴ Ampeu o Lhou ye Rabshakeh, khuu Assyria kükau no xüakeu Lhou thaigha peniye puwu keno, pa no pikeu tsaqo kümtsü chiluve aghi nani, eno Ampeu o Lhou ye tipa tsaqo chilu no alomipi nani keniae; tighenguno ghükulumi ghenguno inikhu tsülo.”

⁵ Kughou Akükau Hezekiah kijemi no Isaiah lau ighi keno,

⁶ Isaiah no panongu vilo pi, “Nongu mpeu vilo pilo, ‘Ampeu no ishi piani: Assyria kükau qemi no I thokügha tsa pikeu nongu no chiluke ghenguno msa kevilo.

⁷ Jualo, I no pa lolo aghungu sütsü no pa pelo uyeu tsa chilupe pa yeghi lo idewovepe nani, eno I no pa yeghi lono azütakikihi no pithive nani.’”

Sennacherib no Ampeu Hebide

⁸ Rabshakeh no ideighi kelo akükau ye Libnah sasü aghüshi aghi, kughengu akükau ye Lachish qhivae pi pa no chilue.

⁹ Akükau no Cush kükau Tirhakah kukughu ishi chilu, “Pa ye o sasü aghü shiniye cheni.” Ikehu pa no Hezekiah vilo pi puwu,

¹⁰ “Judah kükau Hezekiah vilo ishi pilo: ‘O Lhou khuu nono pülü cheni keno Pa no Jerusalem pesü Assyria kükau u lo sütsümo nanie pikeu no o pishiqhipe kevilo.

¹¹ Julo, Assyria kükau no shiye kümtsü kishi kütsa keno nono chiluvae. Imaye nou ye xapheve nani keshea?

¹² I puasüqo no shiye kütsave keqo Gozan, Haran, Rezeph, eno Telassar lo Edenmi akemi lhouqo ye pano xaphelu keshea?

¹³ Hamath kükau, Arpad kükau, Sepharvaim mishighüna kükau, Hena kükau, eno Ivvah kükau khile ani kea?’”

Hezekiah Kighini

¹⁴ Hezekiah no atsapemi u lono yesü ikhipe phive; eno pa ye Ampeu kilo ikuno yesü tipau pesü Ampeu zülo lhaphepe qhive.

¹⁵ Pa no Ampeu zülono inikhu no pi: “O Ampeu, Israel Lhou, Cherubim shou iqa akeu, ayeghi lo kükaqha kümtsü shou O likhi no Alhou ke; Nono kungugha ngo ayeghi lhoke.

¹⁶ O Ampeu, O kini kughope inilo, O Ampeu, O nhethi tsükho no julo, eno Sennacherib tsa khikhi pa no aküxüküa Lhou thaigha niye pi puwu keno initsü lo.

¹⁷ O Ampeu, kuchou no Assyria kükau no shiyeqo eno pano yeghi kütsakungove,

¹⁸ eno pano lhouqo ami lo vesüve tsü, kughengu tipaqo ye alhou kumono timi u no asü ngo atu pesü mla keqoke. Tighenguno tipaqo ye kütsave ke.

¹⁹ Ikehu O Ampeu, ni Lhou, kimiyeno pa u lono ni xaphe tsülo, tishianguno ayeghi lo kükaqha kümtsü no O likhi no Ampeu Alhou kepi ithi nani.”

Sennacherib lau Tungkuptsa

²⁰ Tileno Amoz nu Isaiah no Hezekiah lau pi puwu, “Ampeu, Israel Lhou no ishi piani: Nono Assyria kükau Sennacherib ghenguno I lau inikhu keu I no chiluvae.

²¹ Pa ghenguno Ampeu tsa ishi ani: “Li no o junu ani, li no o thaigha—Zion limi; li no o thiuno li kütsü küngü ani— Jerusalem limi.

²² “No ye khuu pipütha eno junuve akea? No ye khuu shou atsa pipukuve akea eno o nhethi pesü khilau jupukuve akea? Israel Lhou Akimtheu shoue!

²³ O tsapemi vecheo nono Ampeu thoghavae, nono pi, ‘Iw khurkulu kutomo akeu sasü I no naghuto kütsüqa lo ikuvae, Lebanon ghasü kutolo wuvae, I no cedarbo akushuu buqhi, asahubo akighicheu buqhi ke; tile akungo-a akuthou lo iloe, aghasü akiviu-a lo wujuvae.

²⁴ I no azükikheqo chhuphe eno shoinami zü yejue, eno I no I pukhu pesü Egypt ghokiqo qhaive tsüke.’

²⁵ “I no khaghi no kughuve pi no ye chimla aphi keshea? I no khaghi no kughuchhove keu ishi no shikupu ani, o pelo aliwo kumto phughiqo hepho pinyive peniye shike.

²⁶ Tile akeqo no aküka kühano khokhoshi eno phiküghüzü, alu lo asütsüni jeli toi, atsüni kümtsha toi, aki kütsüqa lo atsüni toi, thuwulu mphi lono thizümüive.

²⁷ “Ikemu nono iqa eno ipeilo akeu, eno I shou mqhumza akeu kümtsü I no ithi ani.

²⁸ Nono mqhumzave akehu eno o qheküza tsa I kini lo iloghive akehu, I no ayikuho pesü o nigi lo fusü tsüni o kichi lo ayikha süve tsüni, eno nono ighi keu laghi züsü I no o kighide puwove nani.

²⁹ “Hino o ghenguno amchipu shi nani: khashi ye pa kutoshino kiu ipeghi keno ti chuni, eno tokuu ghi, kiu ipeghi keno chuni. Tishino ampe aküthüu loye, xusü no ghile hulo, atsailu shilo eno tipa xathi chulo.

³⁰ Judah lagha lo ghükulumi khunoqo ani keno, tipaqo no itaghi akuhu alou qüilope nani eno thuiku kunguu no axathi pithipe nani.

³¹ Kughengu Jerusalem lono ghükulumi ipe nani eno Zion Toghi lono aküxü achili shi aghi keqo amqoshi ipe nani. Ampeu no hi shinani.

³² “Tighenguno Ampeu no Assyria kükau ghenguno piani: Pa ye mishighüna hipau lo iloghimo nani, apiji tile vesümo nani, azüto pesü ighimo nani, momu hipau lenike aqoghe shiqhemo nani.

³³ Pa no ighi keu la züsü pa ye idewove nani, eno pa ye mishighüna hipau lo iloghimo nani ipi Ampeu no sheshu.

³⁴ Kughengu I je ghenguno eno I qeu David ghenguno, I no mishighüna hipau süshope xalu nani.”

³⁵ Tipaji Ampeuw kungumi no wuno Assyriami ghazü lo ghüshimi lakh lakhi qhethonhe lhotache pungu heqhive tsü. Kughou thanau inaqhe panongu no ithughi keno, akumo no aqha kümtsü aghi.

³⁶ Tileno Assyria kükau Sennacherib ye idewove no Nineveh lo xüuve.

³⁷ Pa no pa lhou Nisrokh kilo mlla akelono pa nu Adrammelech ngo Sharezer pama no azütakikihi pesü pa ghiqhive eno Ararat yeghi lo pove. Eno pa nu Esarhaddon no pa thisü luve.