KUKAMI AKINIU 18 - Sumi Naga CL (Re-edited) Bible (BSI)

Judah Kükau Hezekiah

¹ Elah nu Hoshea Israel kükau yepe mpe aküthüu lono, Ahaz nu Hezekiah no Judah lo ayepelu.

² Pa ye ampe muku pungu shi akelono ayepelu eno Jerusalem lono ampe muku toku ayepelu. Pa za ye Zechariah nonga Abijah.

³ Pasü David no shike toi pa ye thokha kiu no Ampeu zülo achipi keno shike.

⁴ Pa no qhemghaike-aqo hephove tsü, atsükuchoqo tulave tsü, eno Asherah hepholeve tsü. Pa no alazayi pighi julho (tipau pesü Nehushtan ipiche) khipa lau Israelmi no tipa ghuloki kutolo akümllagho pesü tsüche keno, tighi atachu shi kuboleve tsü.

⁵ Hezekiah no Ampeu Israel Lhou shou shishe pülübe, pa züumu pa thiumu Judah kükami khumu pa toike ipeghi moe.

⁶ Kughengu pa no mtotoi Ampeu tsüqüpe, eno Pa launo tsüghüve moe, ikemu Ampeu no Moses tsükeu Yezah pape ke.

⁷ Tighenguno Ampeu no pa gholo ae eno pa no kiu shikeno ti kümtsü lo tokulu shilue. Pa no Assyriami kükau sasü kumgho eno pa huthumoe.

⁸ Pa no Gaza eno ti sükümxa, ti ye qogheki lono aliwo kumto mishighüna kutolo, Philistiami kütsave.

⁹ Hezekiah yepe mpe abidiu, ti ye Israel kükau Hoshea yepe mpe akütsüniu, lono Assyria kükau Shalmaneser no Samaria khasü luve,

¹⁰ eno ampe aküthüu shekhau no leluve. Hezekiah yepe mpe abidiu, eno Israel kükau Hoshea yepe mpe atokuu lono Samaria leluve.

¹¹ Assyria kükau no Israelmi küghape Assyria lo wove eno Halah lo qhive, khami no sawo Gozan ghoki Habor lo qhive, eno Medes lo mishighünaqo lo ngovepe.

¹² Hi ye Israelmi no Ampeu pano Lhou tsa inimo kehu, eno Paw puloshoqhi hebideve no Ampeu qeu Moses no tsükeu Yezah ghi hebideve kehue. Panongu no ini tsümo eno agholu moe.

Sennacherib no Judah Le

¹³ Akükau Hezekiah yepe mpe chighiabidiu lo Assyria kükau Sennacherib no ighi no Judah lo aliwo kumto mishighüna kümtsü leluve.

¹⁴ Judah kükau Hezekiah no Lachish lo Sennacherib vilo pi puwu, “I no küqüvae; kimiyeno I launo tsüghüve tsülo. Nono I vilo kiu kiumu khukeu I no tsüni.” Assyria kükau no Judah kükau Hezekiah vilo ghükayi ahu 10,000 eno ameshoyi ahu 1,000 khu.

¹⁵ Hezekiah no Ampeu ki ngo kükaki lo akini pekükütsü chebo lo ghükayi aghi keu kümtsü pesü tsüve.

¹⁶ Tipa ghuloki lo Hezekiah no Ampeu chineki hukikha ngo ahukikha tsükuchoqo lo ameshoyi no küzü püakeu kümtsü lhape Sennacherib tsü puwuve.

¹⁷ Assyria kükau no Tartan, Rab-saris, ngo Rabshakeh, gholo ghüshimi kütsasa Lachish lono Jerusalem lo akükau Hezekiah lau puwu. Kughou panongu no Jerusalem lo ighi keno, panongu no Aphikighishimi Luza kuwula lo azüla khikhi azükhe lashou lono ighi ani keno tile wu.

¹⁸ Panongu no akükau Hezekiah kupuwu kelo panongu pütsani ke kükaki jukükütsüu Hilkiah nu Eliakim, akiyeu Shebnah, eno yekükütsüu Asaph ipeghi.

¹⁹ Rabshakeh no panongu vilo pi, “Hezekiah vilo pilo, ‘Akükau akiqheu, Assyria kükau no ishi piani: O küpkhü hipau ye kiu shou bepe ani kea?

²⁰ No ye atsa no aghüshi kukughu momu akumto küghashi kümsü ani keshea? No ye itehi khuu shou pükhü anipi I sasü kumgho ani kea?

²¹ Nono itehi Egypt, aküsü icheve keu, shou pükhü ani, ikemu khuu no pa mungu keno, tino pa u lo qhusüve tsü nani. Egypt kükau Pharaoh ye timi khuu no pa shou pükhü keno, tipau lau hitoi shi nani.

²² Ikemu nono I vilo, “Ningu ye Ampeu ni Lhou shou pükhübe ani,” ipi aye, le maye Hezekiah no Paw qhemghaike-aqo ngo akiptiaqo hepho khave tsüno Judah ngo Jerusalem vilo, “Nongu ye Jerusalem lo akiptia hipau lono mlla lo,” ipike kumo keshea?

²³ Itehi ighilo, I mpeu Assyria kükau sasü alhi küghaju lo: nono khurshimi kutolu kepu shi aye I no khurshi 2,000 o tsüni.

²⁴ Nono khurshi ngo khurshimi ghenguno Egyptmi shou pükhü ani püzü kishino no ye I mpeu qemi aghulou kepten lakhi mjochile luni kea?

²⁵ Tinguno alau ni ye Ampeu sümono a-a hipau leighi eno kütsani ke ighi ani küghashi ani keshea? Ampeu no I vilo pike, “Aghakhu hipau lewu no kütsave lo.”’”

²⁶ Tile Hilkiah nu Eliakim, Shebnah, eno Joah no Rabshakeh vilo pi, “Kimiyeno o qemiqo lau Aramaic tsauno pütsa lo kughengu ningu ye ti vethalu nani. Timi hi aliwo lo akeqo no chiluve nanike Judah tsau ye ni pütsa tsü kevilo.”

²⁷ Ikemu Rabshakeh no panongu vilo pi, “I mpeu ye nongu mpeu ngo nongu likhi pütsa no hi aliwo lo akeqo pütsa pemoni ye I puwu keshea? Hipaqo ghi nongu gholono panow tübatüzü chu eno pano pujo sho penike ghushovae.”

²⁸ Tishino Rabshakeh no puthugho no Judah tsauno ighamku pi, “Akughushu kükau Assyria kükau tsa inilo!

²⁹ Akükau no ishi piani: Hezekiah pelo nongu pishiqhipe kevilo, kughengu pa ye I u lono nongu xaphemla nani.

³⁰ Hezekiah no nongu vilo, ‘Ampeu no ningu xaphelu nani pütsa eno mishighüna hipau ye Assyria kükau u lo ilomo nani,’ ipikeu vecheo nongu ye Ampeu shou pükhübe kevilo.

³¹ Hezekiah tsa ini kevilo, kughengu Assyria kükau no ishi piani: ‘Nongu ye I sasü külashi luve lo eno I lau ighi lo. Tishi aye nongu no pütüta tsaibo eno mububo lono chulu nani, eno pütüta zükhe lono azü yelu nani.

³² I no ighi no nongu sasü no yeghi toike-a lo qhimoke kuto tishi ape nani, ayeghi ti ye athi ngo atsaizü, asho ngo atsailu, olive sübo ngo akhingozü yeghi ke. Akithi kumono aküxü kishelu lo. Hezekiah no nongu vilo, “Ampeu no ni xaphelu nani,” ipikeu tsa ini kevilo.

³³ Assyria kükau no ayeghi leighi kelo, khuno shiye lhou no pa yeghi xaphelu kea?

³⁴ Hamath eno Arpad lhouqo khile ani kea? Sepharvaim, Hena eno Ivvah lhouqo khile ani kea? Panongu ye I u lono Samaria xapheve akeshea?

³⁵ Ayeghi lo alhouqo dolo khuu no I u lono pa yeghi xaphe püani kea? Tishiaye Ampeu ye kishino I u lono Jerusalem xaphe luni kea?’”

³⁶ Ikemu timiqo no inaqhoive eno atsathi lakhimu pa khochilemo, kughengu akükau no azah tsüve, “Pa khochile kevilo.”

³⁷ Tileno kükaki jukükütsüu Hilkiah nu Eliakim, akiyeu Shebnah, ngo yekükütsüu Asaph no panongu phimini süxüve no Hezekiah lau ighi eno pa vilo Rabshakeh tsaqo pi.