KUKAMI AKINIU 16 - Sumi Naga CL (Re-edited) Bible (BSI)

Ahaz no Judah lo Kalu

¹ Remaliah nu Pekah yepe mpe chighiakütsüniu lono Jotham nu Ahaz no Judah lo ayepelu.

² Pa ye ampe muku shi akelono Jerusalem lono ampe chighitsügho ayepelu. Pasü David no Ampeu zülo achipiu shicheke toi pa ye shimoe,

³ eno Israel kükami laghi pape. Pa no pa nu ghi heqhipe akipti kümllagho shive, ti ye Ampeu no Israelmi zülono hapheve keqo shiaye no aphikümqhüpu khuaye peche keu kiqi lono shike.

⁴ Pa no qhemghaike-a, atoghi, eno asübo kicheqho kümtsü lono aghakishi ngo akümllagho pesü mllae.

⁵ Syria kükau Rezin ngo Israel kükau Pekah pama küqha no Jerusalem le eno Ahaz khasü luve, ikemu lemlave.

⁶ Tileno Syria kükau Rezin no Elath luchile luve no tilehi no Judah timiqo hapheve, eno Edommi no ighive no ishi kutolo tile küghüna acheni.

⁷ Ikehu Ahaz no Assyriami kükau Tiglath-pileser lau atsapemi puwu no pi, “Ni ye o qeu eno o nu. Ighi no Syria kükau ngo Israel kükau pama u lono I xaphelu tsülo kughengu pama no ni leighi ani.”

⁸ Ahaz no achineki eno kükaki lono ghükayi ngo ameshoyi ithulu keqo pesü Assyria kükau lau aküzü-agho shi tsüpuwu.

⁹ Assyria kükau no pa tsa ikhilu tsüno ighi püzü Damascus leluve eno timiqo kughu sasü Kir lo wuve, eno pa no Rezin pithive.

¹⁰ Kughou akükau Ahaz no Damascus lo wuno Assyria kükau Tiglath-pileser sasü kusholu keno, pa no Damascus lo akümlla-khache lakhi ithulu. Akükau Ahaz no koghe küghü lo-i tipa kimihi, achineu Uriah lau tsü puwuve.

¹¹ Akükau Ahaz no Damascus lono tsüpuwo keu kiqi lono Uriah no thokha tipau kimihi lono akümlla-khache mlave, ti ye Ahaz no ideighi mphi lono mlave.

¹² Kughou akükau no Damascus lono ideighi keno, pa no akümlla-khache ithulu eno tile ikuno,

¹³ paw akipti kümllagho ngo athi kümllagho pesü mlla, eno atsaiji kümllagho pesü lepuku no paw külakishi kümllagho ji pesü akümlla-khache lo lepuku.

¹⁴ Alazayi kümlla-khache Ampeu zülo achekeu khikhi achineki zülo paw akümlla-khache ngo Ampeu ki küma dolo ache keno, pa no ti ikhipe akümlla-khache ahuu qhive.

¹⁵ Akükau Ahaz no achineu Uriah azah tsü, “Akümlla-khache akijeu lono inaqhe kipti kümllagho ngo avelau athi kümllagho eno akükauw akipti kümllagho, athi kümllagho, timiqow akipti kümllagho, athi kümllagho, atsaiji kümllagho pitilo. Tipau shou akipti kümllagho ji, aghakishi kümllagho ji kümtsü lepuku lo. Ikemu alazayi kümlla khache ye I no ighiju kepushi I ghenguno qhilo.”

¹⁶ Achineu Uriah no akükau Ahaz no azah tsüke toi thokha shive.

¹⁷ Akükau Ahaz no tinhemgha kiqhi-a axuqo ghithave no chithakhu ikhipheve, eno alazayi mishitsüqo no puqhepe akeu bohu ikhiphepe atu no shikeu boqha shou qhive.

¹⁸ Sabbath ghenguno akükau sala achineki lo kuwula mlano akükau no iloghi chekeu ye Assyria kükau ghenguno Ahaz no ikhive, eno Ampeu ki homxa wukepu shi mlave.

¹⁹ Ahaz kümla küghütha kütau ye Judah Kükami Yekikithi Kaku lo yepüani ke kumo keshea?

²⁰ Tishino Ahaz ye pa puasüqo gholo zühuve eno David phughi lo pa puasüqo gholo qhove, eno pa nu Hezekiah no pa thisü luve.