KUKAMI AKINIU 15 - Sumi Naga CL (Re-edited) Bible (BSI)

Azariah no Judah lo Kalu

¹ Jeroboam Akiniu Israel kükau yepe mpe muku akütsüniu lono Amaziah nu Azariah no Judah lo ayepelu.

² Pa ye ampe chighitsügho shi akelono ayepelu eno Jerusalem lono ampe lhopungu kini ayepelu. Pa za ye Jerusalem lono ighi keu Jecoliah.

³ Pa ye Ampeu zülo kiu no achipi keno shike, ti ye papu no shikeu kiqi lono thokha shike.

⁴ Ikeghi qhemghaike-aqo ye ikhimoe; ikehu timiqo ye tipaqo lono aghashi eno akümllagho tsüche.

⁵ Ampeu no akükau buve, ikelo pa shou apügha ikughive eno tino pa küxü kupuju acheuve. Pa ye pa ki kütashi ngoche. Pa nu Jotham no aghakhu vehu kümtsü jukütsü, eno timiqo shou ayepe che.

⁶ Azariah kümla küghütha kütau ngo pa no kiu shi keno kümtsü, Judah Kükami Yekikithi Kaku lo yepüani ke kumo keshea?

⁷ Tishino Azariah ye pa puasüqo gholo zühuve eno panongu no David phughi lo pa sükumo shiqhove, pa nu Jotham no pa thisü luve.

Zechariah no Israel lo Kalu

⁸ Judah kükau Azariah yepe mpe shighi akütacheu lono, Jeroboam nu Zechariah no Samaria lono Israel shou aqhi tsügho ayepelu.

⁹ Papu no shike toi pa no Ampeu zülo kiu no axine keno shike. Pa ye Nebat nu Jeroboam xine, khipaqo no Israel pelo axine shivepe keno, tipaqo launo wuvemoe.

¹⁰ Jabesh nu Shallum no pa shou küsüqeve no Ibleam lono pa pithive eno pa züqhulo kaluve.

¹¹ Zechariah kümla küghütha kütau ye Israel Kükami Yekikithi Kaku lo yepüani.

¹² (Ampeu no hitoi akükau Jehu lau tushoqhi püake “O nuli no tiqheli abidiu kutolo Israel kükalakhü lo iqa nani.” Ti huye shikupuve.)

Shallum no Israel lo Kalu

¹³ Akükau Azariah Judah kükau yepe mpe shighi atokuu lono Jabesh nu Shallum no Israel lo ayepelu, eno pa ye Samaria lono aqhi lakhi ayepelu.

¹⁴ Tishino Gadi nu Menahem no Tirzah lono Samaria lo iqhoghi no Shallum ghiqhive eno pa thisü luve.

¹⁵ Shallum kümla küghütha kütau ngo pa no küsüqe keqo ye Israel Kükami Yekikithi Kaku lo yepüani.

¹⁶ Tipa ghuloki lo Menahem no Tiphsah eno tile xüküami eno Tirzah lono huthusü tipa lughi kümtsü kütsave tsü, kughengu panongu no pa khaqhi sümoke. Tighenguno pa no ti kütsave eno tile totimi mishipu chekeqo po ghixüleve tsüe.

Menahem no Israel lo Kalu

¹⁷ Judah kükau Azariah yepe mpe shighi atokuu lono Gadi nu Shallum no Israel lo ayepelu, eno pa ye Samaria lono ampe chighi ayepelu.

¹⁸ Pa ye Ampeu zülo kiu no axine keno shike. Pa ye Nebat nu Jeroboam xine, khipaqo no Israel pelo axine shivepe keno, tipaqo launo wuvemoe.

¹⁹ Assyria kükau Pul no Israel leighi kelono Menahem no pa kükalakhü iqhikumto tsü apenike ghükayi ahu 34,000 pa tsü.

²⁰ Menahem no Israel lo kinimi lau milakhi khino ghükayi lhopungu pa tsü penike anguka lono qhaluve. Ikehu Assyria kükau ye idewove.

²¹ Menahem kümla küghütha kütau ngo pa no kiu shi keno kümtsü, Israel Kükami Yekikithi Kaku lo yepüani ke kumo keshea?

²² Tishino Menahem ye pa puasüqo gholo zühuve eno pa nu Pekahiah no pa thisü luve.

Pekahiah no Israel lo Kalu

²³ Judah kükau Azariah yepe mpe lhoapunguu lono Menahem nu Pekahiah no Israel lo ayepelu, eno pa ye ampe kini Samaria lono ayepelu.

²⁴ Pa ye Ampeu zülo kiu no axine keno shike. Pa ye Nebat nu Jeroboam xine, khipaqo no Israel pelo axine shivepe keno, tipaqo launo wuvemoe.

²⁵ Paw ghüshimi kepten lakhi Remaliah nu Pekah no Gileadmi lhopungu sasü kuchughu no Samaria lo kükaki sholokuu aliwo khile Argob ngo Arieh julho ache keno, tileno Pekahiah ghiqhive eno pa züqhulo kaluve.

²⁶ Pekahiah kümla küghütha kütau ngo pa no kiu mla keno, tipaqo ye Israel Kükami Yekikithi Kaku lo yepüani.

Pekah no Israel lo Kalu

²⁷ Judah kükau Azariah yepe mpe lhopungu akiniu lono Remaliah nu Pekah no Israel lo ayepelu, eno Samaria lono ampe muku ayepelu.

²⁸ Pa ye Ampeu zülo kiu no axine keno shike. Pa ye Nebat nu Jeroboam xine, khipaqo no Israel pelo axine shivepe keno, tipaqo launo wuvemoe.

²⁹ Israel kükau Pekah ghuloki lono Assyria kükau Tiglath-pileser no ighi no Ijon, Abel-beth-maacah, Janoah, Kedesh, Hazor, Gilead, Galilee, Naphtali yeghi kümtsü leluve tsü, eno timiqo kughu sasü Assyria lo wuve.

³⁰ Ikelo Uzziah nu Jotham yepe mpe amkuu lono Elah nu Hoshea no küsüqe no Remaliah nu Pekah ghiqhive, eno pa züqhulo kaluve.

³¹ Pekah kümla küghütha kütau ngo pa no kiu mla keno, tipaqo ye Israel Kükami Yekikithi Kaku lo yepüani.

Jotham no Judah lo Kalu

³² Remaliah nu Pekah Israel kükau yepe mpe akiniu lono, Uzziah nu Jotham no Judah lo ayepelu.

³³ Pa ye ampe muku pungu shi akelono kalu eno Jerusalem lono ampe chighitsügho ayepelu. Pa za ye Zadok nga Jerusha.

³⁴ Papu Uzziah no shikeu kiqi lono pa ye Ampeu zülo kiu no achipi keno shike.

³⁵ Ikeghi qhemghaike-a ye ikhive moe; ikehu timiqo ye tipaqo lono aghashi eno akümllagho tsüche. Ampeu kilo khagho kunguu ye pa no mlae.

³⁶ Jotham kümla küghütha kütau ngo pa no kiu shi keno kümtsü, Judah Kükami Yekikithi Kaku lo yepüani ke kumo keshea?

³⁷ Tipa ghuloki lo, Ampeu no Syriami kükau Rezin ngo Israel kükau Pekah pama puwu no Judah lethupe.

³⁸ Tishino Jotham ye pa puasüqo gholo zühuve eno David phughi lo pa puasüqo gholo shiqhove, eno pa nu Ahaz no pa thisü luve.