KUKAMI AKINIU 14 - Sumi Naga CL (Re-edited) Bible (BSI)

Amaziah no Judah lo Kalu

¹ Joahaz nu Joash Israel kükau yepe mpe akiniu lono Joash nu Amaziah no Judah lo ayepelu.

² Pa ye apunu mpe muku pungu shi akelono kalu eno Jerusalem lono ampe muku toku ayepelu. Pa za ye Jehoadin, Jerusalem lono ighi kemi.

³ Pa ye kiu no Ampeu zülo achipi keno shike, ikemu pasü David toi kumoe. Papu Joash no kiu mla keno, thokha pa ghi shike.

⁴ Ikemu qhemghaike-aqo ikhimoe; ikehu timiqo ye tipaqo lono aghakishi ngo akümllagho tsüche.

⁵ Pa no mtotoi aküka pelu kemtsa, paw kijemi khunoqo no papu akükau pithive keno, tipaqo heqhive.

⁶ Ikemu pa no ghikiqhimi tianuli pithi move, ti ye Moses Yezah kaku lo Ampeu no azah ishi tsükeu kiqi lono ke, “Anuli kipimi ghenguno apuaza pithimla, eno apuaza kipimi ghenguno anuliqo pithimlae; ikemu timi kümtsü pütüta xine ghenguno thimasae.”

⁷ Amaziah no Amti Khila lono Edommi 10,000 heqhive tsü, eno aghüshi lono Selah hakholuve no Joktheel ipi kuvetsü, ti ye ishi kutolo kuchephi.

⁸ Tishino Amaziah no Israel kükau, Jehu nu Jehoahaz nu Joash lau atsapemi puwu no pi, “Nikujo lakhi no lakhi kujukile nike ighilo.”

⁹ Akükau Joash no khochile puwo, “Lebanon lo asahubo lakhi no cedar sübo lau pi puwu, ‘O nga pelo I nu nipu shipenike tsülo.’ Ikelo Lebanon lo tüghashi lakhi no ti katha cheke lono asahubo hu neda süve.

¹⁰ No ye kuchou no Edom theqhivae eno tino o mlo mtolu ani. Ikemu o jekipi tino lukümkha shive no aki lo auve lo. Kushiye aküküpna xukutho no tino no eno Judah ghi o gholono ikiqi apeni kea?”

¹¹ Ikemu Amaziah no ini tsümo. Ikehu akükau Joash no paw timiqo sasü Judah lo Beth-shemesh lono Judah kükau Amaziah sasü aghüshi.

¹² Eno Israel no Judah theqhive, timi kümtsü pütüta kilo pokhave.

¹³ Beth-shemesh lono Israel kükau Joash no Ahaziah nu Jehoash nu Amaziah, Judah kükau küghape Jerusalem lo ighi no aphughi liwo, auxakuchho 181 toike kuboleve tsü, ti ye Ephraim Khagho lono Acheku Khagho kutolo.

¹⁴ Eno pa no Ampeu kilo ngo akükau kilo akini pekükütsü-a lo ameshoyi ngo ghükayi eno abohu kümtsü luvetsü, eno akughumi sasü Samaria lo wove.

¹⁵ Joash kümla küghütha kütau eno pa kumto ghili ngo pa no kishi Judah kükau Amaziah sasü aghüshi keno, tipaqo ye Israel Kükami Yekikithi Kaku lo yepüani ke kumo keshea?

¹⁶ Tishino Joash ye pa puasüqo gholo zühuve eno Israel kükami gholo Samaria lo shiqhove, eno pa nu Jeroboam no pa thisü luve.

¹⁷ Joash nu Amaziah Judah kükau ye Jehoahaz nu Jehoash Israel kükau no thive kethiu ampe chighipungu xüe.

¹⁸ Joash kümla küghütha kütau ye Judah Kükami Yekikithi Kaku lo yepüani ke kumo keshea?

¹⁹ Jerusalem lono Amaziah pithive niye kuchughu thuve kehu pa ye Lachish lo pove, ikemu panongu no timi puwu no, tilau no pa heqhive.

²⁰ Eno panongu no khurkulu lono pa sükumo xapu ighi no David phughi Jerusalem lo pa puasüqo gholo shiqhove.

²¹ Judah lo timi kümtsü no Azariah, khuu ampe chighitsügho shi akeno, pa pesü papu Amaziah züqhulo akükau shivepe.

²² Akükau no thive no pa puasüqo gholo zühuve kethiu, pa no Elath shiqhe kithe eno Judah tsüchileve.

Israel Kükau Jeroboam Akiniu

²³ Joash nu Amaziah Judah kükau yepe mpe chighiapunguu lono Joash nu Jeroboam Israel kükau no Samaria lono ayepelu, eno pa ye ampe lhobidi lakhi ayepelu.

²⁴ Pa ye Ampeu zülo kiu no axine keno shike. Pa ye Nebat nu Jeroboam xine, khipaqo no Israel pelo axine shivepe keno tipaqo launo tsüghüve moe.

²⁵ Ampeu Israel Lhou tsa, khikhi Pa no Pa qeu Jonah, Gath-hepermi tungkupu Amittai nu, vecheo pi keno, tipau kiqi lono, pa no Israel lughi, Lebo-hamath lono hu Arabah kutolo luchile luve.

²⁶ Kughengu Israelmi aqüaxemi na, ililai xükemi kümtsü no shishe ime akeu Ampeu no ithuluve; eno Israel kuphuni keu khumu kühave.

²⁷ Ikemu Ampeu ye Israel je atsütsü lono pühave tsünie pimoe, tighenguno pa no Joash nu Jeroboam u lono xaphe luve.

²⁸ Jeroboam kümla küghütha kütau ngo pa no kiu shi keno kümtsü, pa kumto ghili, pa no kishi aghüshi, eno Damascus ngo Hamath Israel lo akeu Judah tsüchile keno, tipaqo ye Israel Kükami Yekikithi Kaku lo yepüani ke kumo keshea?

²⁹ Tishino Jeroboam ye Israelmi kükami, pa puasüqo gholo zühuve eno pa nu Zechariah no pa thisü luve.