KUKAMI AKINIU 13 - Sumi Naga CL (Re-edited) Bible (BSI)

Jehoahaz no Israel lo Kalu

¹ Ahaziah nu Judah kükau Joash yepe mpe muku aküthüu lono, Jehu nu Jehoahaz no Israel lo akükau shilu, eno pa no Samaria lono Israel shou ampe chighitsüni ayepelu.

² Pa ye Ampeu zülo kiu no axine keno shiuve eno Nebat nu Jeroboam xineqo, khikhi no Israel pelo axine shivepe keno, ti pape; pa ye tipaqo launo wuvemoe.

³ Ampeu no Israelmi shou amlo ideve no Syria kükau Hazael eno pa nu Ben-hadad pama u lo ishokibe Israelmi phesüve tsü.

⁴ Tile Jehoahaz no Ampeu vilo inikhu, eno Ampeu no Syria kükau no kishi Israelmi shikimighi ani keno ithulu no pa kighini chilutsü.

⁵ (Tighenguno Ampeu no Israelmi lau xakuluu puwu, eno panongu no Syriami u lono pokalu no Israelmi ye püzüu toi alokughuno shi xülu.

⁶ Ikeghi panongu ye Jeroboam kibolomi xine, khipaqo no Israel pelo axine shivepe keno, tipaqo lono putosü mono tipatho lono chewuve, eno Asherah julho ghi Samaria lo ache.)

⁷ Jehoahaz ye pa gholo ghüshimi kihi kelo khurshimi lhopungu, khurkulu chighi eno apukhu lono chewuni kemi 10,000 likhive, kughengu Syria kükau no panongu kütsave eno ayeghimkhu toi kughulhove tsüke.

⁸ Jehoahaz kümla küghütha kütau eno pa no kiu shi keno kümtsü eno pa kumto ghili ye Israelmi Kükami Yekikithi Kaku lo yepüani ke kumo keshea?

⁹ Jehoahaz ye pa puasüqo gholo zühuve, panongu no Samaria lo pa kumo shiqhove eno pa nu Joash no pa thisü luve.

Jehoash no Israel lo Kalu

¹⁰ Judah kükau Joash yepe mpe shighi akütsüniu lono, Jehoahaz nu Jehoash no Samaria lono Israel shou ayepe, eno ampe chighitsügho ayepelu.

¹¹ Pa ghi Ampeu zülo kiu no axine keno ti shike. Pa ye Nebat nu Jeroboam xine, khipaqo no Israel pelo axine shivepe keno, tipaqo launo wuvemoe ikemu tipaqo la lo chewuve.

¹² Jehoash kümla küghütha kütau eno pa no kiu shi keno kümtsü eno pa kumto ghili ye Israel Kükami Yekikithi Kaku lo yepüani ke kumo keshea?

¹³ Jehoash ye pa puasüqo gholo zühuve, eno Jeroboam no pa kükalakhü lo iqave. Jehoash sükumo ye Samaria lo qhove.

Elisha Kithi

¹⁴ Tipa ghuloki lo kughou Elisha no akithi küsü süuve keno, Israel kükau Joash no iqi no igha qa, “I puo, I puo! Israelmiw khurkulu eno khurshimi!”

¹⁵ Elisha no pa vilo pi, “Asüzü lakhi eno apiji hami ikhilu lo.” Ikehu pa no asüzü ngo apiji ikhilu.

¹⁶ Pa no Israel kükau vilo pi, “Asüzü süchho lo,” pa no süchho pe ngove. Elisha no pa u pesü akükau u shou be.

¹⁷ Eno pa no pi, “Kipelau lashe khaqhi lo,” pa no khaqhive. Elisha no pi, “Kapuwu lo,” pa no kapuwuve. Elisha no pi, “Ampeuw tokulu piji, Syriami shou Ampeuw tokulu piji! Nono Aphek lono Syriami sasü aghü shino qhoi kütsave nani.”

¹⁸ Itaghi pa no pi, “Apiji hami ikhilu lo,” eno pa no ikhiluve. Pa no Israel kükau vilo pi, “Ayeghi lo kasülo.” Pa no ghuthu küthü ayeghi lo kasü no ngove.

¹⁹ Ampeu timi huno amlo ideve no akükau vilo pi, “No ye ghuthu pungua tsüghoa kutolo kasü kepu thono, tishi aye nono Syriami qhoi pühave tsüni cheke, ikemu itehi ye no ye ghuthu küthü likhi panongu theqhilu niae.”

²⁰ Tithiu Elisha ye thive eno qhove. Ampe atsütsü tsülü tusho lono Moabmi loji no Israelmi leighi che.

²¹ Ghuthu lakhi lo milakhi kumo shiqho akelono paikhavi aghümi cheghi keu panongu no ithulu kehu asükumo pesü Elisha kumo lo vesüve, ikelo asükumo huno Elisha saghi dilu kemtsa timi huye aküxü shive no puthughove.

²² Jehoahaz ghuloki lo Syria kükau Hazael no Israelmi ghime che.

²³ Ikemu Ampeu no panongu lau küpükini eno kimiye keu ache, eno Paw puloshoqhi Abraham, Isaac, eno Jacob lau akehu ishi kutolo panoqo süsho eno pühavemo momu Pa zülono hapheve moke.

²⁴ Kughou Syria kükau Hazael no thive keno pa nu Ben-hadad no pa thisü luve.

²⁵ Tile Jehoahaz nu Jehoash, Israel kükau no Hazael nu Ben-hadad launo mishighüna khipaqo Hazael no Jehoahaz launo leluve tsü keno itaghi luchile luve. Ghuthu küthü Jehoash no Ben-hadad theqhive no Israelmi phughiqo luchileve.