KUKAMI AKINIU 12 - Sumi Naga CL (Re-edited) Bible (BSI)

¹ Jehu yepe mpe akütsüniu lono Joash no ayepelu, eno pa ye Jerusalem lo ampe lhobidi ayepelu. Paza ye Beershebami Zibiah.

² Achineu Jehoiada no mijetsü kehu Joash ye aküxü kupuju, kiu no Ampeu zülo achipi keno ti mlae.

³ Tishimu qhemghaike-aqo ye ikhive moe; ikehu timiqo ye tipaqo lono ishokibe aghashi eno akümllagho tsüche.

Joash no Achineki Shikithe

⁴ Joash no achinemi vilo pi, “Akimthe pisa Ampeu kilo süghi chekeqo, ti ye timi kikihi ghenguno qhakeu, lüthü no ashoqhi shino tsükeu, eno pütüta mlo lo hakite keu lono Ampeu kilo süghi keu kümtsü hekütsüni,

⁵ achinemi no pütüta müzülo akukuphumi launo pisa pesü achineki lo mla masa aghi keqo phuju no mlani.”

⁶ Ikemu Joash yepe mpe muku aküthüu shivemu achinemi no achineki lo kumu shikithe moe.

⁷ Tighenguno akükau Joash no Jehoiada ngo achinemi kütami kuno pi. “Nongu ye kushiye achineki shikithe mono aphi kea? Itehi nongu ye akukuphumi launo pisa lumoni, ikemu achineki pukho kitheni ke ghenguno tsüveni.”

⁸ Ikehu achinemi no timiqo launo pisa pekütsü monike pulove eno panongu ye achineki shikithe monike pulove.

⁹ Achineu Jehoiada no abohu lakhi ikhipe tipau künha lo aki shephe no pewo Ampeu ki ikulo lo ajeu akümlla-khache phivilo qhive. Achineu khuu no akulaghi lo khe keno, pa no Ampeu kilo pisa peighi keu kümtsü abohu tipau lo süvetsü che.

¹⁰ Kugho kughomu abohu no chhitoive aye, akükauw akiyeu ngo achinetou pama no ighi no Ampeu kilo abohu akeu khaqhi no pisa kihikülaipe mushove che.

¹¹ Tishino panongu no ghükayi hupe achineki kümla lo jukütsü akemi tsüve, eno ajume pesü Ampeu kilo asü kümlami ngo aki kishimi tsüche,

¹² eno ayeghi kümlami ngo atu heküthami tsüche. Tishino Ampeu kilo shikithe masa kepu ghenguno asüpa ngo atu kukubo qhüche.

¹³ Ikemu Ampeu kilo iloghi keu ghükayi ye pesü Ampeu ki ghenguno ghükayi chithakhu, momu akhu, akünha kükühali, afuko, ameshoyi ngo ghükayi bohu mlakeu lo peithamoe,

¹⁴ kughengu ti ye pesü Ampeu kilo akümla kishimi jume shitsü ke.

¹⁵ Panongu ye akümla lo ampi shitsü akemi kümtsü amikuchomi likhi kehu, ghükayi kishi peithave keno kihikülai keu khumoe.

¹⁶ Akipimi kümllagho ngo axine kümllagho lono iloghi keu ghükayi ye Ampeu kilo süghimoe; ti ye achinemi sala shiche.

¹⁷ Tipa ghuloki lo Syria kükau Hazael no Gath sasü aghü shino leluve. Ikemu kughou Hazael no Jerusalem küdau pa gi kugho puwo keno,

¹⁸ Judah kükau Joash no pa züu Judah kükami Jehoshaphat ngo Joram eno papu Ahaziah no akimthe kümllagho tsükeu, paw akimthe kümllagho gholono Ampeu kilo akini pekükütsü chebo, akükau kilo ameshoyi aghikeu kümtsü pesü Syria kükau Hazael tsü puwuve. Tileno Hazael ye Jerusalem lono idewove.

Joash Kithi

¹⁹ Joash kümla küghütha kütau eno pa no kiu shi keno kümtsü, Judah Kükami Yekikithi Kaku lo yepüani ke kumo keshea?

²⁰ Paw hiyampemi no küsüqeve no, Silla lo iqiche keu laghi lo, Millo ki lono Joash ghiqhi pithive.

²¹ Paw kijemi Shimeath nu Jozacar ngo Shomer nu Jehozabad pama no pa heqhive. Panongu no David phughi lo pa puasüqo gholo pa shiqhove, eno pa nu Amaziah no pa thisü luve.