KUKAMI AKINIU 11 - Sumi Naga CL (Re-edited) Bible (BSI)

Athaliah no Judah lo Kalu

¹ Kughou Ahaziah paza Athaliah no li nu thive keu sütsa chilu keno, li no akükau kibolomi kümtsü pithive.

² Ikemu akükau nuliqo pithi akelono, akükau Joram nga Jehosheba, khuu Ahaziah chepu keno, li no Ahaziah nu Joash küsüpe wuve no pa ngo pa saputhu akeu aqeliu pama achebo lo qhive. Hitoi panongu no Athaliah launo pa küsüve eno pa ye pithi move.

³ Athaliah no ayepe ake dolo anu ye Jehosheba gholo ampe tsügho Ampeu kilo itshüpe ngove.

Joash no Judah Kükau Shive

⁴ Ikemu ampe akütsüniu lo achineu Jehoiada no ghüshimi ngo aghukhemi kijemi puwu no Ampeu kilo ighipe. Pa no tipaqo sasü puloshoqhi shino Ampeu ki lono tushoqhipe, eno pa no akükau nu panongu piye.

⁵ Pa no azah panongu tsü, “Nongu ye hitoi shini: kikije küthü lo lakhi khunoqo Sabbath tsalani aghukhe lo wumono akükau ki khecheni keno,

⁶ tipaqo no kükaki kheni (kikije lakhi no Sur khagho lo kheni eno lakhi no khagho lo akemi thiu kheni).

⁷ Nongu amqo kini khunoqo Sabbath tsalani ighi no akükau züqhushi Ampeu ki khecheni keno,

⁸ nongu no aghünanu au lo pesü akükau bothape pa süshoni eno akükau no ipeilo kelo pa khelo. Khukhumu tile kijemi kupunu ighi keu ye pithiveni.”

⁹ Keptenqo no achineu Jehoiada no mije tsükeu kiqi lono shive, eno pütüta no panow timi khunoqo Sabbath tsalani aghukhe do shimo keno tipaqo saghi, eno khunoqo Sabbath tsalani aghukhe dolo ighi niye akeno tipaqo sasü achineu Jehoiada lau ighi.

¹⁰ Achineu no akükau David ngu eno azüto Ampeu kilo akeqo pesü keptenqo tsüve.

¹¹ Aghukhemi no pütüta ghünanu au lo tsüqüpe akükau züqhushi, aki apeu no ahuu kutolo, akümlla-khache ngo aki homxape kheluve.

¹² Tishino Jehoiada no akükau nu saipeghi no aküka kütsükuqho pa pipe eno ashepe pa tsü. Panongu no pa pesü akükau kepi shuphe eno nukisheve, tishino panongu no au kukhu ishi pi, “Akükau axüshu peniu!”

¹³ Kughou Athaliah no aghukhemi eno timiqo ghügha chilu keno li no Ampeu kilo timiqo lau ighi.

¹⁴ Li no jukelo akükau ye akhuaye kiqi lono atsükucho phivilo puthugho aghi, eno keptenqo, afuko küighami ngo timi kümtsü no alokivi shi igha no afuko igha aghi. Athaliah no li phi süxüve no ighamku, “Pishikiqhi! Pishikiqhi!”

¹⁵ Tile achineu Jehoiada no ghüshimi shou keptenqo azah tsü, “Kijemi dolono li sasü ipeghi lo eno khuu no li pape cheghini keno pithive lo.” Kughengu achineu no pike, “Ampeu kilo ye li pithi kevilo.”

¹⁶ Tighenguno panongu no li sünhe sasü kükaki ikulo lo khurshi khagho vechesü tilau no pithive.

¹⁷ Jehoiada no Ampeu eno akükau ngo timiqo dolo puloshoqhi shipe, ti ye panongu ye Ampeuw timi shinie pikeu shoqhi, eno akükau ngo timiqo dolo ghi shipe.

¹⁸ Timi kümtsü no Baal chineki lo wuno atachu shi hephove tsü; panongu no akiptia ngo ajulho kubove tsü, eno akiptia zülono Baal chineu Mattan pithive. Tishino achineu no Ampeu kilo aghukhemi pelo khepe.

¹⁹ Pa no keptenqo, ghüshimi, kükaki ghukhemi, eno timi kümtsü sasü Ampeu ki lono akükau sasü aghukhemi khagho kathasü kükaki lo wuve. Akükau no kükalakhü lo iqave.

²⁰ Ikehu aghakhu lo timi kümtsü no alovi, eno akükau ki lono azütakikihi no Athaliah pithive kethiu mishighüna ye qümüive.

Joash no Judah lo Kalu

²¹ Joash ye apunu mpe tsüni shi akelono ayepe thuve.