KUKAMI AKINIU 10 - Sumi Naga CL (Re-edited) Bible (BSI)

Ahab Laghami Pithikhave

¹ Ahab ye anu lhotsüni Samaria lo ache. Ikehu Jehu no yesü hitoi yepe Samaria lo yepemi lau, layemi eno Ahab nuli jukükütsümi kümtsü lau tsüpuwu,

² “Nongu mpeu nuliqo nongu gholo ani, nongu gholo khurkulu ngo khurshiqo ani, nongu ye aliwo kumto mishighünaqo lo ani, eno aghünanu ani, itehi yesü hipau nongu to kemtsa,

³ akükau nuli dolo juno akiviu eno akumtou kishepe papu kükalakhü lo qhino, nongu mpeu ghenguno aghü shilo.”

⁴ Ikemu panongu ye thüghüive no pi, “Julo, kükami kini thotsü pa zülo puthugho mlave ke ningu ye kishino pa mjochile luni kea?”

⁵ Ikehu kükaki jukütsü akeu ngo aphughi jukütsü akeu pama no layemi ngo jukükütsümi sasü küqha no Jehu lau pi puwu, “Ningu ye o qemi eno nono kiukiu pimu shini. Ningu ye khumu pesü akükau shimoe. Nono kiu no akiviu keno shilo.”

⁶ Pa no yesü akiniu panongu lau yepuwu, “Nongu no I gholo aghi aye eno I yezah papeni ke pulo aye, thoghiu hipa ghuloki lo nongu kükau Ahab nuliqo kütsü lupe Jezreel lo I pütsa ighilo.” Akükau nuli pano lhotsüni ye mishighüna tipau lo akighichemi no saputhu ae.

⁷ Yesü wo panongu to kemtsa, panongu no akükau nuli pano lhotsüni sawo pithive no panongu kütsü michepe ashoghi lo süno Jezreel lo Jehu lau tsüpuwu.

⁸ Kughou atsapeu no ighi no pa vilo, “Panongu no akükau nuli kütsüqo peighi ani,” ipi keno, pa no pi, “Akütsüqo amqo kini shino aphughi khagho lo thanau kutolo qhivelo.”

⁹ Thanau pa no khalau ipe no timi kümtsü vilo pi, “Nongu ye akipimi kühae, I no amqü shino I mpeu pithive, ikemu khuu no hipaqo heqhive kea?

¹⁰ Tishiaye hi ithi lo, Ampeu no Ahab kibolomi ghenguno pikeu tsa lakhimu shikupu mono ayeghi lo ikiqive monani, kughengu Ampeu no pa qeu Elisha vecheo kiu pi keno ti shivae.”

¹¹ Tishino Jehu no Ahab kibolomi kütami Jezreel lo achili akemi, paw kijemi, pa poshumi, eno pa chinemi lakhimu püxümo no pithi khave.

¹² Tithiu Jehu no Samaria lo wuve. Kughou pa no Ambekhemi Ghüna lo chekeno,

¹³ pa no Ahaziah kibolomi sasü kusholu no pi, “Nongu ye khuno kea?” Panongu no khochile, “Ningu ye Ahaziah kibolomi, eno ningu ye kükapumi ngo kükaliu nuli pütsani ke iqighi.”

¹⁴ Pa no pi, “Aküxü no panongu küghaluve lo.” Panongu no tipaqo küghaluve, ti ye pano lhobidi kini eno lakhimu qhimo no Beth-eked lo aqo akeu lono pithi khave.

¹⁵ Jehu no tileno wuche kelo Rekhab nu Jehonadab no pa sasü kusho niye ighi. Jehu no petha tsüno pi, “I mlo no o lau kuchou shi aketoi, o mlo ye I lau tishi anima?” Jehonadab no khochile, “Tishi ani.” Jehu no pi, “Tishi aghi aye, o u I tsülo.” Jehu no pa sünhepe khurkulu lo pukuve.

¹⁶ Pa no pi, “I gholo ighilo eno I no Ampeu lau amlo tsüche keu julo.” Ikehu Jehu no pa paw khurkulu lono pa sasü wu.

¹⁷ Kughou pa no Samaria tolu keno Ahab bolomi achili aghi kemi lakhimu ghümo no pithi khave, ti ye Ampeu no Elijah vilo pikeu kiqi lono ke.

Baal Tungkupmi Pithikhave

¹⁸ Jehu no timi kümtsü kukütsü no pi, “Ahab ye kitila likhi Baal mllae, ikemu Jehu ye kutomo pesü pa huthuni.

¹⁹ Tighenguno itehi Baal tungkupmi kümtsü I lau kukütsü lo, pa mlla chekemi eno pa chinemi kümtsü kulo. Khumu vezüpe kevi, kughengu ni ye aghakishi kije pesü Baal mllani cheni. Khukhumu vezüve keu ye xümo nani.” Ikemu Jehu no hi shikeu ye Baal kümllami kümtsü pithive niye amqü shike.

²⁰ Jehu no azah tsü, “Baal ghenguno akimthe hoho kusü lo.” Ikehu panongu no sheshu.

²¹ Jehu no Israel qha kümtsü lo puwu, kuchono Baal kümllami lakhimu vezü mono ighie. Panongu no Baal chineki lo ilo kelo halau no halau kutolo shekithi khoive.

²² Pa no Baal kümllami phimini shou ampeu shi akeu azah tsü, “Baal kümllami kümtsü ghenguno aphimini ikhiphe lo.”

²³ Tishino Jehu no Rekhab nu Jehonadab sasü Baal chineki lo ilo, eno Baal kümllami vilo pi, “Baal kümllami likhi kumo aye Ampeu qemi lakhimu hile aghi nosake phuju lo.”

²⁴ Tishino pama no akümllagho ngo akipti kümllagho tsünike ilove. Jehu no timi lhotache pesü khalau ngokhepe eno pi, “Khuu no I no nongu u lo sütsü keu lakhimu pupoveni keno, pa küxü pühave tsüni.”

²⁵ Jehu no akipti kümllagho tsüve kemtsa, pa no aghukhemi ngo kijemi vilo pi, “Ilo no panongu ghiqhive lo; milakhimu pokape kevilo.” Ikehu kughou panongu no tipaqo ghiqhive keno, aghukhemi ngo kijemi no Baal chineki lo achebo alou lo ilove,

²⁶ eno achineki tsükucho pesü ipeghi no pitive tsü.

²⁷ Panongu no Baal tsükucho eno achineki xaleqhive tsü, eno tipau pesü ishi kutolo kübakupujo-a shivetsü.

Jehu no Israel lo Kalu

²⁸ Hitoi Jehu no Israel lono Baal shipühave tsü.

²⁹ Ikemu Jehu ye Nebat nu Jeroboam no Israel pelo axine shipe keu xine lono tsüghüve moke—ti ye Bethel ngo Dan lo ameshoyi mishitsü julho.

³⁰ Ampeu no Jehu vilo pi, “Nono I nhethe lo kiu no achipi keno ti shike ghenguno, eno Ahab kibolomi lau I mlo lo akeu kiqi lono thokha shi kehu, o lagha lono tiqheli bidi kutolo Israel kükalakhü lo iqa nani.”

³¹ Ikemu Jehu ye tsaqütsalei Ampeu, Israel Lhou yezah lono checheni keu shimove. Pa ye Jeroboam xine khikhi no Israel pelo axine shivepe keno, tipau lono tsüghü move.

³² Tipa ghuloki lo, Ampeu no Israel kijetha thuve. Hazael no Israelmi yeghi kutomo leluve tsü:

³³ Jordan kipelau Gilead yeghi, Gadmi yeghi, Reubenmi eno Manassehmi yeghi; Arnon khila, Aroer lono Gilead vechesü wo Bashan qha kutolo.

³⁴ Jehu kümla küghütha kütau eno pa no kiu shikeno kümtsü eno pa küka kumto ghili kümtsü, Israelmi Kükami Yekikithi Kaku lo yepüani ke kumo keshea?

³⁵ Jehu ye pa puasüqo gholo zühuve eno panongu no Samaria lo pa kumo shiqhove tsü. Pa nu Jehoahaz no pa thisü luve.

³⁶ Jehu no ampe muku tache Samaria lono Israel shou ayepelu.