KUKAMI AKINIU 1 - Sumi Naga CL (Re-edited) Bible (BSI)

Elijah eno Akükau Ahaziah

¹ Ahab thive kethiu Moabmi no Israelmi mjochile thuve.

² Ahaziah ye Samaria lo kükaki kunguu chebo lo ake lono ikiqive no aloqhi izave. Tileno pa no aghinimi khami hape pi puwu, “Wulo, eno Baal-zebub, Ekron lhou vilo ni ye vilu nani kemo keno ighiju lo.”

³ Ikemu AMPEUw kungumi no Tishbe lono ighikeu tungkupu Elijah vilo pi, “Ithulo eno akükau Ahaziah ghinimi sasü kusholo, eno panongu vilo pilo, ‘Israel lo Alhou kühave akesheno nongu ye Ekron lhou Baal-zebub kushoni ye wu cheni kea?

⁴ Tighenguno itehi Akükau vilo Ampeu no ishi piani, no ye izave keu zübo lono ideithughi moae eno mtsüqheino thive niae.’” Ikehu Elijah no wuve.

⁵ Aghinimi no akükau lau ideighi kelo pa no pi, “Nongu ye kushiye ide ighive akea?”

⁶ Panongu no khochile, “Timi lakhi no ningu sasü kushoni ye ighi no pi, ‘Akükau khuu nongu puwu keno pa lau idewo no pa vilo pilo, Ampeu no ishi piani, Israel lo Alhou kühave akesheno no ye Ekron lhou Baal-zebub vilo ighiju penike aghinimi puwu ani kea? Tighenguno no ye izave keu zübo lono ideithughi moae eno mtsüqheino thive niae.’”

⁷ Pa no panongu vilo pi, “Nongu sasü kusho keu eno hipaqo pikeu timi huye kiutoi kemi kea?”

⁸ Panongu no khochile, “Pa ye amhiphi pepu cheni, eno ashiyiko no pokha pucheni,” Ikelo pa no pi, “Ti ye Tishbemi Elijah kena.”

⁹ Ikehu akükau no ghüshimi lhopungu shou kepten gholo paw ghüshimi lhopungu Elijah lau puwu. Elijah no atoghi kütsüqa lo ake lono pa no ighi no pi, “O Alhouw timi, akükau no, ‘Hilau iqighi lo,’ ipi ani.”

¹⁰ Ikemu Elijah no lhopungu shou kepten khochile, “Tsala I no Alhouw timi shi aghi aye kungugha lono ami iqighi no no eno ow timi lhopungu pitive pe nani.” Ikelo ami no kungugha lono iqighi no pa eno paw timi lhopungu pitive.

¹¹ Akükau no itaghi ghüshimi lhopungu shou kepten gholo paw ghüshimi lhopungu pa lau puwu. Pa no Elijah vilo pi, “O Alhouw timi, hi ye akükau za, ‘Mtazü hilau iqighi lo.’”

¹² Ikemu Elijah no panongu khochile, “I no Alhouw timi shi aghi aye kungugha lono ami iqighi no no eno ow timi lhopungu pitive pe nani.” Ikelo Alhou mi no kungugha lono iqighi no pa eno paw timi lhopungu pitive.

¹³ Akükau no itaghi aküthüu ghüshimi lhopungu shou kepten gholo paw ghüshimi lhopungu pa lau puwu. Kepten aküthüu no iqhoghi no Elijah zülo qhoqhünhepe pa vilo pi, “O Alhouw timi, kimiyeno ni eno o qemi lhopungu küxü o nhethe lo küpüqhiyi tsülo.

¹⁴ Julo, ami no kungugha lono iqighi no kepten atüghüu pama eno pamaw timi lhopungu pitivae, ikemu itehi ye o nhethe lo I küxü küpüqhiyi tsülo.”

¹⁵ Tile Ampeuw kungumi no Elijah vilo pi, “Pa gholono iqilo eno pa msa kevilo.” Elijah no pa gholono akükau lau iqi

¹⁶ eno pa vilo pi, “Ampeu no ishi piani, ‘Nono atsapemi Ekron lhou Baal-zebub lau puwu keu ye Israel lo ighijulu kepu Alhou kühave keu ghenguno keshea? Tighenguno no ye izave keu zübo lono ideithughi moae ikemu no ye mtsüqheino thive niae.’”

¹⁷ Ikehu Elijah no Ampeu tsa pikeu kiqi lono pa ye thive. Judah kükau, Jehoshaphat nu Jehoram küka mpe akiniu lono Joram no Ahaziah züqhulo akükau shive kughengu Ahaziah ye anu küha ke.

¹⁸ Ahaziah no mlakeu kütau kümtsü Israelmi kükami Yekikithi kaku lo yepüani ke kumo keshea?