Kolosiami 4 - Sumi Naga CL (Re-edited) Bible (BSI)

¹ Ampemiqo, achipiu eno aghibiu lono nongu qemi peitha lo, nongu ghi kungugha lo Ampeu anie pi ithilo.

Akükütsü Alau

² Tamono mtotoi akighini shi alo, shikimthikütsü gholono tsükhüi khekuto alo.

³ Tipau gholono ni ghengu ghi inikhu tsülo, tishianguno atsakiviu ghenguno Alhou no ni lau ahukikha khaqhi tsüno Khristow tuqhou pesü sheshulu peni, hi ghenguno ni ye akughu shi ani.

⁴ I no pikepu shi akeu lo mtsümishei pilu penike khu tsülo.

⁵ Ado akiviu peitha no khalaumi zülo alokütsü lono xüpiye lo.

⁶ Pülhapuju nongu tsapi lo küpüqhiyi eno jumghai shilo, tishianguno timi lakhikhi lau kishi khochile kepu keno nongu no ithi nani.

Kishekha Petha

⁷ I no mlaitha keu kümtsü Tychicus no nongu vilo pi nani. Pa ye kimiye chekeu athiküzüu eno pükhükulupu qeu eno Ampeu kümla mla küqha chekemi ke.

⁸ Ningu ye kishi ani keno nongu pelo ithi no nongu mlo shikumtotsü peni keu kimji lono nongu lau pa puwu ani,

⁹ eno pükhükuluu ni thiküzüu Onesimus, khuu nongu gholo lakhi keno, pa gholo puwu ani. Pama no hilau kiu shive akeno nongu vilo thokha pi nani.

¹⁰ I gholo akughu shi akeu Aristarchus no petha nongu tsü ani, eno Barnabas tikishiu Mark ghi petha nongu tsü ani (pa vehu nongu no chiluve ake—pa no nongu lau ighi aye pa ikhilu lo),

¹¹ eno Justus ipi chekeu, Jisü ghi petha tsüpuwu ani. Alhou yekipe ghenguno I sasü mla küqha chekemi aphighüyiko ghave kemi ye hipaqo likhi ke, panongu no I lokughunotsü cheni.

¹² Ampeu Jisü Khristo qeu Epaphras, nongu gholo lakhi huno petha nongu tsü ani, pa kighini lo alhokuthu nongu ghenguno kükhakulu acheni, tishianguno nongu pelo Alhou pulou kümtsü lo tekhoi eno thebeilu peniye ke.

¹³ Kughengu ni ampi no ashepe shitsü anike pa ye nongu ghenguno mla ani, eno Laodicea ngo Hierapolis ghengu ghi mla anie.

¹⁴ Kimiye chekeu shikipiviu Luke ngo Demas pama ghi petha nongu tsüpuwu ani.

¹⁵ Laodicea lo athiküzümi, Nympha eno li kilo akukuhou lau petha tsülo.

¹⁶ Kughou nongu gholo yesü hipau phisüveni keno, Laodicea kukuhou lo ghi phisü lo, eno Laodicea launo yesü tsükeu ghi phisü lo.

¹⁷ Archippus vilo pilo, “Akümlapu khikhi Ampeu launo ithulu keno no ye shikupu tsü masae.”

¹⁸ Ni Paul, no I u ampi no ye ani, I yikichhe kümsülu lo. Alhouw küpükini no nongu gholo apeniu.