Kolosiami 3 - Sumi Naga CL (Re-edited) Bible (BSI)

Aküxü Kithe Pepulo

¹ Tsala Khristo gholono nongu xüputhu püaghi aye, kungugha khile Khristo no Alhou u ajeu iqa ani keno, tilau thime akeqo shou nongu mlo belo.

² Ayeghi lo thimeqo shou kumono kunguu thimeqo shou kümsü pukulo.

³ Kughengu nongu ye thivae, eno nongu küxü ye Khristo gholono Alhou lau küsüvae.

⁴ Khristo, khuu nongu küxü keno, pa no ipeghi kelo, nongu ghi ajuküvü lono pa gholo ipeghi nani.

⁵ Tighenguno nongu lolo ayeghilo ghola akeu pithive lo: ashupu asalha, mithekumo, ngosükümla, alhoksa kükümsü, alakimne, hi ye ajulho kümlla ke.

⁶ Hipaqo ghenguno Alhou loghu cheni.

⁷ Nongu no xüighive keu lo nongu ye hipaqo lo checheke.

⁸ Ikemu itehi nongu ye amlo kighide, aloghu, axeküsü, piküptha, eno nongu kichi lono atsa lhoksa, hi kümtsü pheve masae.

⁹ Lakhino lakhi lau miki kevilo, kughengu nongu ye aküxü aqau lhoayeqo phevae,

¹⁰ eno alhoaye kithe pepu luvae, ti ye Lhoküsüu no Pa ithitoilu penike Pa kimihi shitsü acheni.

¹¹ Hipau loye Greekmi eno Jewmi, aphighüyiko ghave kemi eno ghamo kemi, ayekümthami, tüghashi toi xükemi, aqemi eno ililai kemi kühae; ikemu Khristo no thokha ke, eno kümtsü lo ani.

¹² Tighenguno Alhouw kishekiphe, akimthe eno kimiyeqhiyi kemi akehu, kimiyekini mlo, amlo ighiqhiyi keu, akümtsha, aküghüvü, eno kutuukulu pepulo.

¹³ Lakhino lakhi lau kheakulu shino mopi kepu aghi namu akipimi pevetsü kilelo, Ampeu no nongu kipimi qhive tsüke toi nongu ghi lakhino lakhi kipimi qhitsü masae.

¹⁴ Hi kümtsü nguno alau kikimiye pepulo, kughengu kikimiye no thokha kupukülai tsügha küqhatsü cheni.

¹⁵ Khristow aloino keu no nongu mlo lo ayepe pelo, hipau ghenguno aphimpi lakhi lo nongu kuluve ake. Eno shikimthi qhiyi lo.

¹⁶ Khristo tsa pelo nongu lolo kinikülü shi apelo, alokütsü lono shika eno qophe kile, nongu mlo lono Alhou shikimthi ghi leshele, akishe le, eno aghungulo le phelo.

¹⁷ Nongu no kiukiu mla namu, atsapi eno akümla lo Ampeu Jisü je lono Apu Alhou shikimthi ghi thokha shilo.

Khristomi Kibo Khuaye

¹⁸ Anipuqo, nongu kimi qhoqhü lo, hi no Ampeu küdau achipi ke.

¹⁹ Akimiqo, nongu nipu kimiye lo, eno panongu lau mghachhoi kevilo.

²⁰ Atianuliqo, thokha lo nongu puaza gholu lo, kughengu hi no Ampeu lopushi cheni.

²¹ Apunoqo, nongu tianuli ghashikighide kevilo, tikumo aye panongu ye aghüthi süve nosae.

²² Aqemiqo, thokha lo nonguw ayeghilo mpemi gholu lo, pano mlopiqi tsüniye aküa lo likhino mla kevilo, ikemu Ampeu sükümsa lono amlo tsüqhiyi shilo.

²³ Nono kiukiu mla namu timi ghenguno kumono Ampeu lau mla akeshi amloqi qhiyi mlaitha lo,

²⁴ Ampeu launo amheghi shi o saxü ithulu nani kepi ithilo. No ye Ampeu Khristo qe anie.

²⁵ Kughengu alhoksa kümlami ye pa lhoksa kümla ghenguno agikuju kühano ajume tsüchile nani.