Kolosiami 2 - Sumi Naga CL (Re-edited) Bible (BSI)

¹ Nongu eno Laodicea lo küami ngo khunoqo I sasü kusholu mphi keno, ni ye nongu ghenguno ime mla akeu nongu pelo ithi penishi ani,

² tishianguno panongu mlo shikumtolu, kikimiye lo ghoküqha luno Alhouw tuqhou kighithi, ti ye Khristo, thebei eno kupukuno shi ithikuthulu penie.

³ Khristo lau alokütsü eno akighithi kini khuki kümtsü küsüpe püani.

⁴ I no hi pi akeu ye khuu pelomu kighekithi tsa pesü nongu pishiqhive pemonie.

⁵ Kughengu I phimpi ye nongu gholo küha pinamu aghungu lono ni ye nongu gholo ani, nongu no kithikiyi eno aküpülü lo mtotoi Khristo lau akeu alokivi shi ithuluni shi ani.

Khristo Gholo Xüani

⁶ Tighenguno nongu no Khristo Jisü ye Ampeu kepi ikhiluve ketoi, pa gholo cheche lo,

⁷ pa gholo akuhu qüsü no shiqhe pukulo, eno nongu shikave ketoi aküpülü shikumto luno shikimthikütsü no qochili alo.

⁸ Khristo kükütsü ghola kumono timi süqe kighithi, abokümsa pishikiqhi, timi no pekishe chekeu khuaye momu tsütsü yeghi ghawu no nongu tshüluve pemoni ke jukuto lo.

⁹ Kughengu Khristo lolo Alhou lhoaye kuchopu kupukülai ani,

¹⁰ eno nongu ye pa launo chhikhoi luvae, pa no ayekipe eno kükagha kümtsü shou akütsü ke.

¹¹ Pa gholono nongu ghi timi u no aphimpi shi ikhive keu kumono Khristo no shikeu ghola lono aphighüyiko ghavae,

¹² nongu ye baptiz shikeu lono pa gholo qhove, eno Alhou khuu akithi lono pa xüputhu keno, Pa küka kumto kümla lono nongu ghi aküpülü vecheo pa gholono xüputhuvae.

¹³ Nongu khunoqo axine eno aphighüyiko ghamo keu lo thi ache keno, Alhou no ni xine kümtsü qhive tsüno Khristo gholono xüputhu tsüke,

¹⁴ ti ye ayezah kiqi lo ningu pi-ashe yekithi püakeu no ningu shou kükhaküla akeu ikhive tsüke. Pa no kros lo ti yedave tsükeu lono ikhive tsüe.

¹⁵ Pa no yepemi ngo aküka jeli liluve tsüno panongu shou toluve keu vecheo ikhikiphe shi panongu shikujove.

Nongu Kideqhive Pekevilo

¹⁶ Tighenguno timi khunomu chuqu-kusho, tiqhetini, aqhi kithe, momu Sabbath pine ghenguno nongu shou küghathabe pekevilo.

¹⁷ Hipaqo ye ighini ye akeu thimeqo yekibide ke, ikemu athi kuchou ye Khristo gholo ani.

¹⁸ Khunomu nongu kideqhive pekevilo, panongu no alikhi ampi milive no kungumi mlla, kungunhetsü ithukulu, eno akiqi küha keu ashi lo kimne kükümsü küdau hakite sawu cheni,

¹⁹ eno Khristo khuu Akütsü, khuu launo aphimpi kuchopu tuchomjo tsüno aqü anhü tshü küqhape Alhou launo ighikeu lono thukuu pesü thuwu lupe cheni keno, pa gholo kimepe move pecheni.

²⁰ Khristo gholono nongu no ayeghi lo aghawuqo lau thive aghi aye, kushiye itehi ghi ayeghi laumi toi ayezah qhoqhü ghi—

²¹ “Hi peitha kevi, Micheju kevi, Bukevilo” ipi cheni kea?

²² (Thime hi kümtsü peithave aye pühaveni keu)—hipaqo ye timi yezah eno shikükaqo ke.

²³ Hipaqo ye akutoshi no iqükeu chine thuwu peni keu lokütsü lono ipeghi ani, eno alikhi ampi milive no aphimpi ghime chekeu, ikemu ashi lo pishikiqhi hipaqo ye kiumu ame kühae.