Kolosiami 1 - Sumi Naga CL (Re-edited) Bible (BSI)

Pethakütsü

¹ Paul, Alhou pulou lono Khristo Jisüw apostol, eno ni thiküzüu Timothy no,

² Colossae lo Khristo küpülümi eno pükhükulumi athiküzümi lau: Ningu Papu Alhou launo küpükini eno aloino keu tsü ani.

Shikimthikütsü eno Akighini

³ Kughou nongu ghenguno inikhuni keno, ningu ye alhokuthu ni Mpeu Jisü Khristo Papu Alhou shikimthi acheni,

⁴ kughengu nongu küpülü Khristo Jisü lau akeu, eno küpülümi kümtsü ghenguno kikimiye akeu ningu no chiluvae,

⁵ kughengu kuchou tsape, atsakiviu nongu lau atüghüshi ighi kelo tino nongu sala kungugha lo lajupu kike püatsü anie pi nongu chiluke.

⁶ Atsakiviu khikhi nongu lau ighive akeno, nongu no ti chilu no kuchou lono Alhouw küpükini vethalu keu tsala lono athi pithi eno ikowo aketoi ayeghiqha kümtsü lo tishi ani.

⁷ Nongu no ni qhuu aküsau eno aqeu Epaphras launo ti shikalu ke. Pa ye nongu züqhushi Khristow pükhükulupu qemi

⁸ eno Aghungu lono nonguw kikimiye ningu lau piye tsüke.

⁹ Ikehu, ningu ye ti chiluke tsala lono nongu ghenguno inikhu tave mphie. Alhou vilo Pa pulou kighithi lono aghungu lo lokütsü eno vethakulu kümtsü pesü nongu shepichhi tsü penike ningu no khu ani,

¹⁰ tishikeu lono nongu pelo qhoi Ampeu lopushi ameküapu küxü xülu: akümla kivi kümtsü lo athi pithilu eno Alhou kighithi ikowolu peni;

¹¹ Pa juküvü kumto lono aküka kümtsü pesü nongu shikumto luno alokivi shi thokha puqhelu eno kutuulu peni;

¹² Apu khuu no nongu pesü aküvü lo küpülümi mheghi küsaje lupe keno Pa shikimthi tsü peniye ke.

¹³ Pa no aküzü yekipeqha lono ningu xaphelu no petsüghü sawo Pa qhuu Nu yekipe lo ighike.

¹⁴ Pa launo ningu ye xachilekulu, axine qhikütsü ithulue.

Khristo no Kümtsü Züu

¹⁵ Pa ye ithukümla Lhou jukimihi, pulhoküsü kümtsü dolo amsüu.

¹⁶ Kughengu pa vecheo kungugha lo eno ayeghi shou, ithukulu eno ithukümla, kükalakhü, kükaqha, yepemi, kükagha kipemi—thokha kümtsü pa vecheo eno pa ghenguno lhoke.

¹⁷ Pa ye thokha kümtsü züu, eno pa gholono thokha kime küqhape ani.

¹⁸ Pa no aphimpi, ti ye akukuhou, kütsü ke. Pa no hukuthuu, akithi lono xüthughive keu amsüu, ikehu thokha kümtsü lo pa no azüu ke.

¹⁹ Kughengu Alhou no Pa züküvü shi Paw kupukülai keu lhoaye Anu lolo sütsü,

²⁰ eno ayeghi lona kungugha lomu Anu vecheo thokha Pa lau alupekili niye kros lono pa ji pele keu vecheo külashi tsüe.

²¹ Nongu khunoqo ghuthu lakhi lo Alhou launo tüsümi shi aghümi shino alhoksa kümla shiche keno,

²² itehi ye Pa Nu kithi vecheo Pa lau alupekili luvae, eno nongu pesü akimthe, tukutiye eno tichetighe küha no Pa zülo saghi niyeke,

²³ ikemu nongu ye thebei aküpülü lono puthugholu, ithamo no mtotoilu, lajupu tsakiviu nongu no chiluve keu lono iqeve mono amasae. Atsakiviu hi ye atsütsü qholo pulhoküsü kümtsü lau sheshuve keu, ni Paul ye tipau shepemi lakhi ke.

Akukuhou lau Paul Kümla

²⁴ Nongu ghenguno itehi I no aghime sholu akelo ni ye alovi ani, eno I phimpi lono Khristo no pa phimpi, ti ye akukuhou, ghenguno aghime shiwo tomono akeu I no shikupu tsü ani,

²⁵ khipau ghenguno Alhou no I pelo nongu lau Alhou tsa kupukülai pikülha penike I pesü aqemi shi süsüe,

²⁶ hi ye wove keu tiqheli lo tuqhou shi küsü püache kemu itehi ye küpülümi lau pephe piyevae.

²⁷ Alhou no panongu kishelu no Jewkumomi gholo ajuküvüpu kini kije pephe tsüke, ajuküvü lajupu huye Khristo nongu lolo akeu ke.

²⁸ Ningu no Khristo pesü sheshu cheni, kümtsü kütüghü eno shika cheni, tishianguno kümtsü pelo Khristo lau tekhoilu peniye ke.

²⁹ Hi ghenguno ni ye Khristo no I lolo sütsü keu kumto kümtsü pesü aghime shi mla cheni.