Jude 1 - Sumi Naga CL (Re-edited) Bible (BSI)

Pethakütsü

¹ Jisü Khristo qeu eno James thiküzüu Jude, Alhou no kuluve kemi, Apu Alhouw kikimiye lo akemi, eno Jisü Khristo ghenguno süsho püakemi lau yelu ani:

² Kimiyekini, aloino keu eno kikimiye no nongu lau kighishe tsü peniu.

Kichile Kükütsümi

³ Kimiye chekeqo, ninguw aqü xakulupu akeu vehu yenishi kütü akemu Alhou no aküpülü khikhi ghuthu khavino küpülümi kümtsü lau tsü keno, tiu süsho penike ni ye nongu ghutu ghi ye masave.

⁴ Kughengu khunomu mthano ake lono Alhou kümthami khami no tuqhouno ningu gholo iloghivae. Panongu ye khaghi no kileqhive nike amichi shipe qhive keqo, ni Lhouw küpükini pesü pano shiaji pulou lo süve no ni Mpeu lakhi likhi akeu Jisü Khristo milive keqo ke.

⁵ Itehi ni ye nongu no püzüu no ithive keu tsa pesü ghutu kitheni shiani, ike Ampeu khuu no Egypt yeghi lono timiqo xaphelu keno, athiu ye pülümo keqo pithive ke.

⁶ Eno kungumi khunono pano kungo-a kuchou qhive no kükagha peitha move keno, küghakütha tsala kije ighi moke kutolo, Pa no aküzü kutho lo lhokta yikichhe pesü tipaqo tshüpe qhivae.

⁷ Sodom ngo Gomorrah eno hokümxa lo mishighünaqo lo ghi ashupu asalha eno ashiaji pulou phukeu lono lhokta mi pesü aghime tsükeu huno kichekipiye shike.

⁸ Titoi timi hipaqo ghi pano samo pükhüpe aphimpi shipixi, yepemi milive eno ajuküvüpu timiqo thaigha ke.

⁹ Ikemu kughou kungumi tou Michael no tüghami sasü Moses sükumo kohakishi akeno, pa ye küthaküghapu tsa pimono ishi pi, “Ampeu no o lomipi nani.”

¹⁰ Ikemu timi hipaqo ye panongu no vethamla keu thaqhü ye thaigha cheni, eno akükümsü küküha lhoxüqo toi panongu no kiu vethalu cheni keno tino panongu kütsaküngove cheni.

¹¹ Pano hasapue! Kughengu panongu ye Cain laghi lo pülache, pisa kimne ghenguno Balaam no küqüve keu lo kitimeve eno Korah no hebide ipeghi keu lono pühavae.

¹² Hipaqo no ighümo no nongu gholo kuposhu kelo nonguw kikimiye ghulhu tichetighepu shivetsü ani, ambekhemi no panongu ampi loji aketoi; tsütsüghu küha keu khüngküsü amülhü no fupe chekeshi; tixi lo axathi pithimo keu sübo, akuhu lono nhüve no thi kitheve ketoi;

¹³ azüghi zü fukukucho no pano kukujopu fukighide aketoi; itsükiche yepuqo toi, pano ghenguno aküzü kutho lo alhokupuju ghenguno a-a kutope qhipüani.

¹⁴ Hipaqo ghenguno itaghi Adam lono tiqheli akütsüniu lo Enoch no tungkuptsa ishi pike, “Julo, Ampeu no Paw akimthemi qhethonhe chighi sasü cheni,

¹⁵ eno Alhou kümthami no Alhou sümo keu kümla shi püakeu kümtsü shou küghathabe nani, Alhou kümthami axinemi no Alhou shou alhoksa tsa pipuku keu kümtsü pesü panoqo shou küghatha puku nani.”

¹⁶ Hipaqo ye nhenheshi eno aghaqimla chekemi, pano xine pulou pape chekemi; aqheküza tsa zale eno pano lapu shiniye akumou lono kütami sheqhe chekemi ke.

Puqhekulu Shilo

¹⁷ Ikemu kimiye chekeqo, nongu ye ni Mpeu Jisü Khristow apostolmi no pichhotsü keqo kümsüchile lulo.

¹⁸ Panongu no nongu vilo pi ke, “Ashekha tsala loye jukünatha kemi ipeghi no Alhou sümo keu ngosükümla lhoaye pape nani.”

¹⁹ Ayeghi küxü lo amlo kütsümi, Aghungu Kimthe küha kemi hipaqo no kijetha keu süghi cheni.

²⁰ Ikemu kimiye chekeqo, nonguw shishe akimthe küpülü shiqhe puku eno Aghungu Kimthe lono inikhu keu vecheo,

²¹ lhokta küxü lo sawu chekeu ni Mpeu Jisü Khristow kimiyekini huqhe ghi nongu ye Alhou kikimiye lo alo.

²² Eno lipi chekeqo lau kimiyekini piyelo;

²³ ami lono kütami süxaphepe xalulo; sükümsa shi khami lau kimiyekini piyelo, ikemu ashi pulou lono aphimini lo axine hedave keu ye mithilo.

Shekiqhe Le

²⁴ Itehi ye khuu no nongu pelo küpxa pemo eno tukutiye küha no Pa juküvü zülo shishe alokivishi nongu ikhiphepe tsülu nani keno,

²⁵ ni Mpeu Jisü Khristo vecheo, ni xakuluu Alhou lau ajuküvü, kükanguagha, ayekipe, eno kükagha, khaghi wovekeu lono itehi eno alholo ache pelo. Amen.