JOYIL 3 - Sumi Naga CL (Re-edited) Bible (BSI)

Shiyeqo shou Küghathabe

¹ “Kughengu julo, tipa ghuloki eno atüqhüdo lo kughou I no Judah ngo Jerusalem küakini tsüchileni keno,

² shiye kümtsü I no hekütsü sasü Jehoshaphat Khila lo ighi nani. Eno tilauno I no Iw timi eno I mheghi Israelmi züqhushi panoqo shou küghathabe nani, kughengu panongu no I timi pesü shiyeqo dolo hakiphive tsüno I yeghi kijetha luve,

³ Iw timi ghenguno asaqhi, apu-itimi pelo kütüqha peniye jesüve, eno aji ghenguno anga jechuve no shomzü ke.

⁴ “I zülo nongu ye kiu kea, O Tyre ngo Sidon, eno Philistia tokukujo lo akeqo? Nongu ye kiuala ghenguno I lochile ani keo? Tsala nongu no I lochile aghi aye, I no mtazü eno papashi nongu lochileve nani.

⁵ Kughengu nongu no Iw ghükayi ngo ameshoyi luve, eno I küakiniqo xapu nongu chineki lo süveke.

⁶ Nongu no Judah ngo Jerusalemmi pesü pano lughi lono putou puwuveni ye Greekmi lau jesüve.

⁷ Julo, nongu no jepuwuve keu-a lono I no panoqo xukuthoni eno I no nongu lochileni.

⁸ I no Judah timiqo u lo no tianuliqo jesüve nani, eno panongu no putou akemi shiye Sabeami lau jepuwuve nani, kughengu Ampeu no piqhivae.”

⁹ Shiyeqo lau hi sheshu lo: Aghüshi ghenguno kuto lo; aghükivimiqo xukutho lo. Ghüshimi pelo kupunu ighi pelo; panoqo pelo ighi pelo.

¹⁰ Nongu kuphu hephape azütakikihi mlalo, eno akuhoyi pesü angupa mlalo; miqemlei kemi no ishi pi pelo, “Ni ye ghüshimie.”

¹¹ Hokümxa lo shiye akeqo kümtsü, mtazü ighilo, nongu ampi no tile hekütsü lo. Ow ghüshimi süghilo, O Ampeu.

¹² Shiyeqo pelo panongu dolono xukutho pelo eno Jehoshaphat Khila lo ighi pelo; kughengu tileno I no hokümxa lo shiye akeqo kümtsü shou küghathabeni ke iqa nani.

¹³ Ayevü pesü ghothu lo, kughengu aghi ye nivae. Wuno qole lo, kughengu atsaithi kütsüghübo ye chhitoivae. Atughuko no qole ani, kughengu panow küsakügha ye kije ke.

¹⁴ Aqokitikhi, aqokitikhi no küghakütha khila lo anie! Kughengu küghakütha khila lo Ampeu tsala ye kupunuvae.

¹⁵ Khetsünhe ngo aqhi no zümoi, eno ayepuqo no aküvü tsümovae.

¹⁶ Ampeu no Zion lono igha, eno Jerusalem lono sheshu ani; eno atsütsü ngo ayeghi no ithae. Ikemu Ampeu ye Paw timi ghenguno sükusho-a, Israelmi qoghe kumto ke.

Judah Juküvüpu chekeu

¹⁷ “Tileno nongu no Ni ye Ampeu no Lhou, I kimthe toghi Zion lo achekeu pi ithi nani. Jerusalem ye akimthe shinani, eno inaghami ye khilemu itaghi tipau le kithemo nani.

¹⁸ “Eno tipa ghuloki lo naghutoqo no atsaiji kungo kighijiqhi nani, atoghi lono akichhizü qo nani, Judah lo aghoki kümtsü lono azü qowu nani; azüpuki lakhi Ampeu ki lono qoipeghi no Shittim Khila vapütsü nani.

¹⁹ “Judah timiqo lau alhoksa shike ghenguno Egypt ye pighive nani, Edom ye yenguyike-a shive nani, kughengu panongu no Judah lo pimimo kemi ji pele ke.

²⁰ Ikemu Judah ngo Jerusalem ye alholo tiqheli kümtsü lo küghüna acheuve nani.

²¹ Aji peleve keu mkhü Ni ye lumphi ke I no amkhü lunani, kughengu Ampeu ye Zion lo anie.”