JOYIL 2 - Sumi Naga CL (Re-edited) Bible (BSI)

Ampeu Tsala

¹ Zion lo afuko küighalo; I kimthe toghi lo kütüghülo! Aghakhu lo küami kümtsü no khokhoshi pelo, kughengu Ampeu tsala chenie, ti ye kupunuvae,

² aküzü eno züchiyi keu tsala, akimhi eno aküzü kutho tsala! Akumtomi kütsasa no aküzü kutho toi naghutoqo nhakhape ani, titoi keu ye khilemu shiju mphi, itaghi panoqo thiumu tiqheli kupuju lo khilemu ithulumo nani.

³ Ami no panoqo züuno piti eno ami mili no pano thiuno iqü. Panoqo zülo ayeghi ye Eden ghutu toi ikemu pano thiu ye küghüküghaleike sayeqha toi kiunomu tipaqo zülo povemlae.

⁴ Panoqo ye khurshi koghe mihi, eno aghüshi khurshiqo toi poke.

⁵ Khurkuluqo no kokoshi ketoi panoqo no naghuto shou ikawu, ami mili no pepeshi atsüni pitive ketoie, akumtomi ghüshimi no aghüshiqa lo ilo niye kutope aketoi ke.

⁶ Panoqo zülo timiqo ye iju ani; kümtsü no agi phalaive anie.

⁷ Panongu no aghütomi toi leighi; ghüshimi toi aliwo mili ikue. Panongu ye pütüta lalo chewu; eno hula-hila kugho wuve moe.

⁸ Panongu ye kichishi kilemoe; kümtsü no müzüchoi chewue; panoqo no azüta-angu puxüsü wu kelo khunomu hakha mlae.

⁹ Panongu no aphughi shou ilheiku, aliwo kuptu shouno po, eno akiqo shou mugho ikughi no küpkami toi alashe lono iloghi.

¹⁰ Panoqo zülo ayeghi no ithae; atsütsü no khokhoshie. Khetsünhe ngo aqhi no zümoive, eno ayepuqo no aküvü tsümove.

¹¹ Ampeu no Paw ghüshimi zülono asheshu, kughengu Paw ghüshimi ghazü ye shishe kijeke; Khuu no Pa tsa pecheni keno Pa ye aküka kumtou ke. Kughengu Ampeu tsala ye kije eno shishe aküighüpu; khuu no ti puqhelu nani kea?

Ampeu lau Xaide Ighilo

¹² Ampeu no pi, “Itehi nomu nongu mlo tsüqhiyi shino kümvü keu, aküqa eno akumlo lono I lau xaide ighilo;

¹³ eno nongu phimini kumono nongu mlo süxülo.” Ampeu nongu Lhou lau xaidelo, kughengu Pa ye küpükini eno kimiyekiniu, asheshi no amloide cheni, iqemokeu kikimiye no kupukuno eno amhekiqi süchileve chekeu ke.

¹⁴ Khuu no ithi ani kea Pa mlo kilive no kükümgha süghi tsüluvi, eno Ampeu nongu Lhou mllalu pe kepushi athi ngo atsaizü kümllagho tsüluvi ke.

¹⁵ Zion lo afuko küighalo; Kümvü kepu do kophelo; akimchi hoho kusülo;

¹⁶ timiqo hekütsü lo. Aqoahomi kishekimthe tsülo; layemi kukumqo lo; itimi eno akichhelo kupu nga kutolo hekütsü lo. Külapuu no pa chebo qhivelo, külaliu no li kungo-a qhivelo.

¹⁷ Ahukikha ngo akiptia dolono achinemi, Ampeu qemi no qa ghi pilo, “O Ampeu, Ow timi kipimi qhitsü lo, eno O mheghi pesü shiyeqo zülo atichepu shivepe kevilo. Kushiye ashiaye zülono pano pelo ishi pi apeni kea, ‘Pano Lhou ye khile ani kea?’”

Ampeu no Amloighi

¹⁸ Tileno Ampeu no Pa yeghi ghenguno amlo piti eno Paw timiqo shou amloighive.

¹⁹ Ampeu no Paw timiqo khochile no pi, “Julo, I no nongu lau athi, atsaizü, eno thazü puwu tsü ani, nongu no aghakiqi shilu nani; eno Ni ye nongu pesü shiyeqo zülo atichepu shive pemoae.

²⁰ “I no ahuumi hape nongu launo putou qhai eno yenguyi keu yeghi lo puwuve nani, paw amihemi pesü kipela züghi lo eno ashekhami no kulola züghi lo vesüve nani; Pa kumo no tsümüna ipeghive nani, kughengu pa no alhoksa kümla kije shive kehue.

²¹ “Msa kevilo, O ayeghi; amlokiqi shino alovi lo, kughengu Ampeu no thime kije shive tsüae!

²² Msa kevilo, nongu aluza lo tüghashiqo, kughengu yenguyike-a lo achu kümza-a ye xüthilei ani; asübo no pa xathi pithi ani; mububo ngo atsaibo no kupukuno shi pithi ani.

²³ “Alovilo, O Zion nuliqo, eno Ampeu no Lhou lau alovilo, kughengu Pa no nongu saphu ghi tsütsüghu aitheu tsüvae; Püzüu toi aitheu eno amunuu tsütsüghu Pa no pofushi leqhitsü.

²⁴ “Aniqa lo athi no chhive nani; atughukoqo lo atsaiji ngo thazü no yeli-qole nani.

²⁵ Tülhaqu no chuve tsüke mpe lo sala I no athoputho tsü nani, Iw ghüshimi tütüghü, ningami, amthsü, I no nongu lau puwuke.

²⁶ “Nongu no kupukuno shi chuno aghapiqilu nani, eno Ampeu nongu Lhou khuu no akümzapu shi nongu lau mla keno, Pa je sheqhe nani. Eno Iw timi ye khilemu shikukujo kitheve monani.

²⁷ Ni ye Israelmi gholo anie pi nongu no ithi nani, Ni ye Ampeu nongu Lhou eno I nguno kütami ye kühae. Iw timi ye khilemu shikukujo kitheve monani.

Ampeu no Pa Ghungu Puwu nani

²⁸ “Ado hami thiu I no timi kümtsü shou I Ghungu lepuku tsü nani; no tianuli kiptimi totimiqo no tungkupu tsa pi nani, now muchomiqo no asamo pumo eno lhothemiqo no kungunhetsü ithulu nani.

²⁹ Tipau ghuloki lo I no aqemi kiptimi ngo totimi shou ghi I Ghungu lepukutsü nani.

³⁰ “Eno atsütsü ngo ayeghi shou I no akümzapu, aji ngo ami eno amchhi kupho piye nani.

³¹ Ampeu tsala kije eno akümzapu ighi mphilo khetsünhe no zümoive nani eno aqhi no aji toive nani.

³² Eno ado hu ighi kelo khukhumu Ampeu je kulu keu ye xaluve nani. Kughengu Ampeu no pike toi khami ye Zion Toghi lo eno Jerusalem lo pove nani, eno tipaqo gholo Ampeu no kuluve keqo anani.